Khuangchera

Mi pakhat hian maurawkel (hmeichhe tuibur lai ) hi khaw pakhata pa-ho thu khawm zingah hian a va zuar a. An zinga Khuangchera chuan, “Kan nu’n a duh kha, khi mai khi kan in alawm, han zawrh tawh,” a lo ti a. Mikhual chuan Khuangchera in lam a pan pah chuan Khuangchera nupui bum dan tur a ngaihtuah ta a. Khuangchera nupui hnenah chuan, “Kan nu’n a duh kha, lo han zawrh la, a man erawh chuan vawi khat lo han mutpui mai tawh, a ti,” tiin a hrilh a. Khuangchera nupui chuan a awih lo hle mai a. Mahse mikhual chuan, “I duh leh zawt la,” a tih ngam hial avang chuan Khuangchera nupui chuan an leika atang chuan, sawi ngam chiah si lo hian, “I ti tak tak em ni?“ tiin a zuk ral auh a. Khuangchera lah chuan eng nge a zawh pawh hre hlei lo chuan vin hlur hian, “Aw, ti ti ti, kan tih lohin kan rawn tir hlei na’ng,” a lo ti mai si a. Pasalte berin rem ti miau si chu maurawkal hlawnah a pe ta teh poh a. An tih zawh veleh chuan mikhuapa chuan khua chu a chhuahsan nghal ta vang vang a.

Kawng lakah Pawite darkhuang zuar hi a tawk a. Chu mikhual chuan Khuangchera khan rawn um ngeia a rin avangin Pawite chu a bum leh ta a. Khuangchera laka himna tur ngaihtuahin Pawi hnenah chuan, “Pawia, darkhuang hi ka awhzawng tak a ni a, mahse a man tur ka nei zo si lo va, hnungah sawn ka bawih pakhatin min rawn um a, chu chu i lo man ang a,i darkhuang hi ka lo nei mai ang e,” tiin a thlen thlu leh ta a.Chuta tang chuan mipa hi mipa darkhuang man tih emaw pachang darkhuagn man tih emaw tawng hi a lo pian phah ta a.

Khuangchera han haw chu a nupuiin thil awmdan a han hrilh nak chuan a thinur ta em em a. Mikhual chu man tumin a um ta vang vang a.Mahse Khuangchera chu Pawi sumdawngte chuan an lo man a, an kal bopui ta daih mai a.A bona chin tuman an hriat loh avangin chuta tang chuan bona chin hriat loha bo daih sawi nan Khuangchera bo emaw Khuangcher bo emaw an ti ta a.

Khuangchera khuate chuan Khuangchera chu zawn ngaihna hi an hre lo khawp mai a.An zingah cuan Zeldina hi a tel ve a.Khuangchera bo dan zeldin thiam tumah an awm loh laiin Zeldina chuan, “Ka rin dan chuan, chhim lamah emaw hmar lamah emaw, chhak lamah emaw thlang lamah emaw, a nih loh leh vanah a lawn emaw leiah a lut emaw a ni ang,” tiin ani mi huih phai lam chuan a zeldin a.Chuta tang chuan zeldin thubawl tih tawng hi a lo piang leh ta a ni, an ti.

Sawi dan dang leh chu:-

Maimaia leh Teiveta, mi tihder hmang tak, mi buma sumdawng thin v eve la inhre ngai hauh lo hi an awm a.Teiveta chuan changel bul hi khawipui-hnun anga uluk taka funin a zuar a.Maimaia thung chuan vut hi a hmet khawm a, kawl chikhawn zawrhin a zuar thung a.Tumah leisaktu hmu lo ve ve beidawng chu kawng lakah an intawk ta a.Inleitir tumin an thil zawrh chu an insawi mawisiak ta a.A tawpah zawng an inthleng ta nge nge a.An inkalsan hnu-a an thil zawrh an han chian dun nak chuan an intihder ve ve tih hria-in inhmuh leh thua an tum dun ta ran a.An han inhmuh leh chuan an inkawp thiann dun ta phian a, an sumdang dun ta a.

An zinna khaw pakhata thirdeng Khuangchera chu Maimaia chuan dartawnsuk a chhertir a.Teiveta erawh chuan vaibel chhungphum a chhertir thung a.Khuangchera chuan, “In thil ka chher dawn si a, khum hnuaia tuboh te kha zu la teh u,” tiin a tir a.Anni thian duh tuboh zu la tur chuan Khuangchera nupui chauh lo awm chu tihderin, “Ka pi, in pa’n kan nu kha lo zu mutpui tau la, tin, thul mawnga ka thihna kha rawn la bawk ang che u, min ti,” tiin an zu tihder a.

Khuangchera nupui chuan a rin lo hem avang chuan sumhmun atang hian , “I ti em ni?” tiin a han ral zawh a. Ani lah chuan, “Ti e,” a lo ti mai si a.Mahse a la rinhlelh fo avangin, “I ti tak tak maw?” a han ti leh a.Ani Khuangchera chuan, “Ti tak tak ang chu, lo pe thuai la a ni mai,” vin zet hian a lo ti hlur a. A nupui chuan hreh zetin an pahnih chuan an thil dil chu a pe ta ve ve a. Anni thian dun chuan thihna chu an ak sawk sawk a, arang arangin an chhuak nghal ta vang vang a.

Chumi hnu lawka a nupuiin thil awmdan a han hrilh chuan a pasal thinrim chuan thah tumin a um ta vang vang a.Thui fe a um hnu-ah kawng laka an chaw chhum lai a va nang a. Khuangchera chuan, “Ka nupui min uire-sak bakah ka thihna in la bawk a, ka man dawn che u a ni,” a ti a. Anni chuan, “ Ni e, kan sual a, i bawihah chuan kan awm tur alawm,” an ti sauh sauh a. Mahse Khuangchera chu a tlan hah em avangin rei lo te hnu-ah a muhil ta bawrh bawrh a. Chutia Khuangchera a muthilh ngheh lai tak chuan Pawi-ho silai zuar hi an lo kal a.Anni thian dun chuan, “In silai chu he kan bawih hian kan lo lei mai ang e,” tiin an dawn a, an inrem ta a. “Mahse a lo harh hunah chuah in hruai dawn nia,” ti-a a chah hnuah Maimaia leh Teiveta chu an kal nghal ta vang vang a.

Khuangchera muhil a lo harh chuan Pawi-ho chuan an man a, an khaw lamah an hawpui ta daih a.Tuman an hruaina chin an hriat tak loh avangin bona chin hriat loha bo pil vang vang sawi nan ‘Khuangchera bo ’ an ti ta a. Ani Khuangchera bo ta chu an khawtlangin an zawng a, a hnuhma leh sulhnu hmuh tur awm bawk si lo chu ngaihruat dan pawh an hre lo va. An zinga awm ve Khuangchera unaupa Zeldina chuan, “Tlak lamah emaw chhuah lamah emaw a awm ang,” a ti mai mai a.Chu chu zeldin thubawl lo chhuahna bul chu a ni, an ti bawk.

Thulakna: Tawng Un Hrilhfiahna by James Dokhuma