'A HLEINGA ZAN' AN TI

08/02/2010 12:51

-K.L.Liana

Zanin thla a eng hle mai,
    A bial a ni a hleinga zan an ti;
    Thlaa englo dum awm khi enge ni?
    Mizo chuan Bungpui a ni an ti,
    Mahse a dik lo, kawr te thuk tak a ni zawk,

tia Primary sikula kan zir thin lai te kha ka hre chhuak uar uar a. Zirtawp zan a ni a, chu chu January ni 29, 2010 kha a ni. Current chu a awm lo a, zana tum khat rei iak eng awm lo hi chu a tur ve rengah kan ngai tawh a, ngaiah kan nei tawh a ni ber. Mahse hemi zan hi chuan kei ka tan chuan malsawmna a ni ve thung lawi a! Chu chu eng dang vang mah a ni lo ve, thla bial zan a nih avang zawk mai a ni si a.

Calender siamtu tam berte chuan inrinni zan, ni 30 chu a bial zan angin an dah , thenkhat thung chuan ni 29 an ti bawk. Pialleiah inthen mah ila, Si-ar lungrualah i chuang dun ang, tih hla ang deuh khan a takin la inhmu lo mah ila, Churachanpur, Sialkot- a zan thla enga ka lungrualpui, nula ni ngei tura ka ngaih, nih lah a ni bawk reng a, J.N.Hmar chuan, “ Pu, janina i thlapui meuh cu ava ropui tk m. k lo thlr hwh ag o, ka dim ag, roh suh k t bal hauh lo vag, a eg c…nagcu i reiek tlag nen i thlr thei bk wm c a…” tiin an hallo bur teah hian thu min rawn thawn a. Chumi awmzia nia ka lo hriat dan chu hetiang hi a ni a. ” Pu, zanina i thlapui meuh chu a va ropui tak em. Ka lo thlir hawh ang aw, roh suh ka tibal hauh lo vang, a eng si… nang chu i Reiek tlang nen i thlir thei bik awm si a,” tihna a ni. An tunlai thu thawn hawrawp bal rim rem hi keini ang duang tan chuan lehlin fe a ngai fo thin reng a.

Nia, dim lo taka an thlira an tihbalh dawn ai chuan an thlir ve phal loh mai ka chin thin avangin ani pawh chuan a dim tur thu min hrilh lawk hmasa te tein en hawh min rawn dil a ni bawk a, ui hauh loin ka lo phalsak ta kha a ni a. Ka Reiek tlang hmuh chak ve tak tak, la hmu si lo hi an awm fur reng a, thla en zan chuan min awt thin ngawt ang chu. Thla en zan hi chuan Pu, ka rawn hre chhuak thin che a, min titu, kan Mizo nula zaithiam ka Star, Monica pawh chu min dil hmain a thlir ve ka phal thu ka han hrilh vat a, a lawm ngawt ang.

Aizawl Civil Hospital Casualty-a langsar taka a sana dar inziakah chuan dar 4:13 a ni a, a takah erawh chuan zan dar 7.45 a ni thung a, ka han hawi a, ngaiteh heti hi a ni a, khua chu a thiang em em a, a la vawt hle thung a, chhum hmuh tur reng hi khi van zawl zau khawvel khuhtu zawng zawngah khian pakhat te mah hmuh tur a awm lo. Thla chu a bial kulh a, a a eng a ni mai lo va, a var hian a var pup a ni ber mai. Casualty-a Doctor duty-te chu an hah hle a, mahse chuti chung chuan an fel em em bawk a, an hmel pawh a tha a, Nurse duty-te lah hmelah chuan ka phu loh an nih chu thu dang, an fel hle bawk a. Naupang te te an chiua an tap rawng rawng thawm hriat erawh chu a hrehawm hle thung a, chutihlai karah hmanhmawh thlak tak tak lo kal an awm reng a, kan Police-ten zu rui an man an rawn endiktir tawk bo hek suh, mi thianghlim then lohna ram an sawi ang deuhin awl reng nei loin an buai char char hi a ni ber, mawngvawm ba an sawi hi an ang ber awm e.

Chutianga mangang leh damlo, a buapuitu nen an zik nuai nuai lai chuan kei erawh chuan thla eng chu ka thlir bang thei mawlh lo thung a, chutah meizial ka zuk a hun ta raih a! Mahse damdawi in hung chhungah chuan zuk phal a ni lo, tih chu an tar kuau a, hman deuha zuk phalna an siam, chulaia tui ti taka zah pawh dawn lova duhtak lungchim taka kan fawh vawng vawngna hmunte chu khapna chuan a lo huam tawh a, chuvangin hung chhung atanga kal chhuakin dan bawhchhe hauh loin Mizo vaihlo zial diktak, lachhum hring ngeia tawn tui tak mai zu chunga chu zan thla eng var pup han thlir zet chu a manhla tih loh rual zawng a ni lo a lawm. Kum tam tak liam tawha chu lai hmuna kal a, a ni, thla eng em em hnuaia Aizawl khawpui tlak lam lungleng taka ka thlir laite chu ka thinlungah hian a lo thar uar uar a, mahse ka kal chhan ber pawh chuan Pialral a kal tawh tih pawh chu ka thinlungah hian theihnghilh chi zawng a ni mawlh lo mai.

Aw i thlir ang Zion khawpui, Lungduh lenrualte an kimna, Hmangaihte mittui nen kan thente khan, Ni tin thlirin min lo nghak reng, Chatuan lawm hla sain, a ni e, zan thla engah pawh min nghak reng a ni, tih lah chu a chiang hle si. Chutiang zan thla eng hnuiah chuan, Aw lunglen a thar nang vangin… ka tan tahna mai i lo ni… tih mai hi a awl fo thin zawng a lo ni e. Ka tan chuan e, chunglai hmun chu nun hlui min ngaihtirtu a ni lo thei lo va. Thangkhat lian zet zawng a ni ta, mahse nimina thil thleng ang tlukin ka thinlung ngaihtuahna leh mitthlaah thung chuan a la thar a, aw nun hlui ngai reng reng hian dam chhung hun kan hmang dawn zawng a nih hi, engtikah mah a lo kir tawh lo vang a, ani pawh chu khawvelah hi chuan ka hmu leh tawh dawn lo tih chu ka hria, mahse….thla a han en chang leh chulai hmun kher atanga ka han thlir erawh chuan thinlung mu hnu a kai tho zawng a ni e. Kei pawh ka dam lai ni a ral hun chuan, Hlimna khawpui tual laiah ka leng ang, kalvari thihna zaia faktute, lawmna chuai thei tawh loin ka pawl ang.

Kan thlang lawkah chuan kan Mizoram Law College thin chu a awm a, chulai atang chuan zanah thla engte lungleng takin kan tlir vawng vawng thin a, tunah erawh a awm tawh lo, a ni e, ani pawh a awm tawh lo va, mahse kan sulhnu zan thla eng a hleinga zanin ka fang a, ka tan chuan ka dam chhunga ka theihnghilh ngai tawh loh tur hmun a ni si a. Damlo an zawn nawl nawl laiin kei erawh hmanlai nun hlui ngai reng rengin ka kai kun thung a, mipui an thuhmun fo thei lo, tih hi a ni leh mai si thin. Mahse awmzia reng a nei lo va- lunglen khawhar i-pikna mai lo chu! Hei erawh min hriatthiampui ka duh a, chutiangin nun hlui tu emaw avangin ngaiin lungleng khawhar teh mah ila, dan zirpui ka duh che a ni e.

A hleinga zana an sawi tho Inrin zan, ni 30 -1-2010 khua han thian em emzia tak kha aw, sawi thiam a har zawk a.Thla pawh chu a rawn bial eng kulh a, thu leh hla lama kan kungpui Rem Remi Pa pawhin a tuar zo lo a ni ang, Lunglei atangin, “ I THLAPUI khi nem pil teh…” a rawn ti a, chutihlai chuan Lalrinmawia Khiangte chuan khawchhak lam hla tak atangin,”Pa KL, i thlapui roh khi ka lo thlir hawh ve aw. Lung a tileng khawp mai” a rawn ti bawk a. Chutihlai vek chuan Churachanpura ka fanu, mahse he khawvela ka la hmuh loh leh ani pawhin mi la hmuh loh Buongi chuan, “ Thla a eng e.. lung a leng ngei mai..” a rawn ti a, ka thlapui chu inthlahrung hauh lova lo thlir tura ka hrilh chu a lawmzia a rawn sawi a. Tin, heti hi a ni a, Mahmuni chuan Nursery atangin, “ I thlapui khi ka lo thlir hawh ve ang aw..” a rawn ti bawk a, ani pawh ka lo phalsak a, a lawm hle. Leitlangpui lama kan Zo-Star nula zaithiam Lalropuii Pachuau nau Mapuii chuan Lawngtlai atangin a enzia chu min rawn hrilh bawk a. Kum li kal ta vela Lelte a, Ruatfela Nuin, “K.L.Liana thlapui..” a tih atang khan kei pawhin ka thlapui a ni, tih hi ka lo hre ve ta kha a ni a, tam takin an pawm a, chutiang bawkin Ka Reiek tlang pawh ka ta tih an pawm bawk a, ka lawm hle!?

Khatia chu Pawltlak thla hleinga zan khaw thiang em ema lungleng taka nun hlui ngaia ka van ruai ruaia chung lama thla eng ka thlir vawng vawng ang khan, keini mipate tan chuan maw, kum 2001 hma lam kha thlirin ngaihawmna chen a awm lo thei lo. Chu chu e, Cr.P.C. an tih mai chang 125 anga inenkawlna nupuiin emaw faten emaw an phutna dan a ni, kan zir tur chu. Nupui pasal inthen ni khua chang hian fate hian pa aiin nu an bel fo thin. A chhan pawh khawvelah hian nu hmangaihna tluka thuk leh nasa hi a awm lo. Sum an chhuah emaw, sumlaitan emawa inthen a nih loh chuan, kan mak avanga inthen kan nih chuan nupui khan chawmna a rawn phut thei a. Mahse CHUAN lianpui a awm ve a, a inenkawl theih loh CHUAN, a ni thung. Fate naupang mahni inchawm thei lote tan a phut thei bawk a. Tin, nu leh pate pawhin tar an lo niha mahni inenkawl thei lo an nih chuan chawmna an phut thei.tin, chawm thei dinhmuna a awm CHUAN tih a ni.

Sanghnih pakhat hma lam kha chuan chawmna mi pakhat tan thla khatah cheng 500 thleng pe turin Court-in a ti thei a, zanga aia tama tih theih a ni lo va. Mahse kan sawi tak kum atang erawh kha chuan dan siamtuten khalai chang kha siam thain, cheng zanga tih kha an paih a, chawmna turin sang, sangnga leh sing thlengin pe turin a ti thei ta. Ngun zawka ngaihtuah chuan keini zan thla enga nun hlui mual liam tawh ngaia kan kur ang hian, zanga a nih lai kha chawm tura Court-in a tihte chuan an ngai ve lo thei lo vang. Hei hi a pawimawh a, Magistrate hnenah chawmna tura phutna lehkha kha theh luh mai tur a ni a. Khai, duhtawk leh rih phawt mai ang aw.qq

Thulakna:www.lelte.net

Back