Burma President atan Prime Minister Hlui Thein Sein-a, Eng Tak Ang Zel Ang Maw?

Burma Parliament chuan ni 4 February 2011, Zirtawpni khan Nipyidaw khawpuiah Prime Minister hlui Thein Sein-a chu President atan a thlang a, Tin Myint Oo-a leh Sai Muak Kham-a te chu Union Parliament vice President atan ruat an ni.

Kan hriat theuh angin, ni 7 November 2010 khan kum 20 chhunga a hmasa ber atan sipai venhimna khauh tak hnuaiah Myanmar(Burma) inthlanpui neih a ni a, Sipai sorkar din party - Union Solidarity and Development Party(USDP) chuan 77% vel vote an hmu niin an insawi. President atana thlan Thein Sein-a hi USDP party hotute zing ami a ni. Thein Sein-a hian kum 1997 khan sipai sorkar a zawm tan a, kum 1992 atanga Burma ram awptu General Than Shwe-a mi duh leh rin tak a ni. Burma ram hi kum 1962 atang khan sipai sorkarna-in a awp bet tawh a ni.

Kum 2010 inthlan, Parliament leh President thlan ilo hian Burma ramah zalenna dik hring chhuak a, mipuite hremawmna tibo a, Burma ram nuam a din a rinawm loh a, sipai sorkarna hnuaiah Burma ram chu a la awm reng niin, khawvel ram hrang hrangte chuan an hmu. Tin, chu chu Burma mipuite ngaih dan leh hmuh dan pawh a ni.

“Tun tum Burma President thlannaah hian engvang nge kum 1992 atanga rawng taka ram lo awptu – General Than Shwe-a a tel loh?” tih hi mi tam takte ngaihtuahna titamtu a ni. “Kum 77-a upa General Than Shwe-a hi President ni lo mah se, sipai hotu leh ram awptu ber a la ni dawn tho,” niin mithiamte chuan an ngai.