Chapchar Kût lam hawiin

- Rochungnunga

Kût phuahchawp leh ningnêl têtê kan siam chawp a, tu-khaw-kha hriatpui lêm lohvin kan lâwm ve lêt lêt a. Kan kût neih saho pawh Zoram mipui nghahhlelh leh ramdang mite tan hmuh leh tel ve châkawm khawpin kan la hmang hlei thei lo va, a hman dan kan duan lah Republic Day leh Independence Day te nena inang deuh rengin kan kan duang a, sorkar official tih loh chuan chuti tehchiam kan hlut lo niin alang.

Mizo kûtpui pathum zinga kan lawm uar ber Chapchâr Kût lawm dan chungchang hi nikum lam khan ziah a ni tawh a, mahse Kût lawm dan buaipuitute thêng athâwngah a lût lo a ni mai thei. Kan Kût neih ropui ber hi rilru sêng ve deuh pangngai tan chuan tuna kan hman dan aia ropui leh, mipuite leh hnamdangte tan pawha tel chakawm zawka hman dan tur hi ngaihtuah chhuah a har lêm lo va. Sorkar pawh hian chuti tehluain a ngaihsak lo emaw ni chu, tih theih turin Kût atana inbuatsaihna hun tha awm hman mang lova chawpchilhin a hman dan tur ruahmantu a siam chauh thin niin alang.

Rallêngho Hornbill Festival an tihropui thiamzia te, Rio Carnival-in ram hrang hrang atanga mipui a hîpkhawm hnem thinzia ngaihtuah hian Chapchâr Kût kan lawm ve leh laih thin chu a sitawm lam deuh chu a ni. Kût phuahchawp Anthurium Festival pawh hi mi nazawng tan chuan tel chhan tur leh, han thlakhlelh vak tur a awm lêm lo va; tourism lamah hma kan sawn phah tehchiamin a lang lo bawk a. Kan kût neih vete ai hian kohhran programme hian foreigner a hîp lût tam zaw mah mai thei. Chuvang chuan ramdang mi tam lehzual kan hîp luh duh chuan kan kût neihte hi a lawm dan tichangtlûng ila, state dang leh ramdanga puandarh kawngahte tan la bawk ila, tun ai hian kan hlawkpui ngei ang.

Kan kûtpui ber Chapchâr Kût tuna kan hman dan ang hi chuan official leh a lâm tur pâwl ni lo tan chuan tel chakawm a ni lo a. Hmanlai kha chuan an hlimna vawrtawp ruaiin an lantir thin a. Khaw pumin, nula, tlangval leh naupang chenin an ngahkhlel a, chhâwng an hnawt a, chaw leh sa an inbarh a, a khaw pumin, a ram pumin an hlimpui thin. Tunah chuan Chapchâr Kûta tel ai chuan ina awm a nuam zawk a, concert leh puipunna dangin min hîp zawk. Aizawl bikah phei chuan Lâmmualah kan hmang a, official-ho hmun tha laiah an thu tlar tuar a, thusawi leh zai kan ngaithla a, Mizo hnam lâm kan en a, Lâmmualah kan hmang khu luih luih a, hriselna atan pawh a that loh a rinawm. Republic Day-a school naupang leh sipai parade kha Mizo hnam lâmin kan thlak a, Chapchâr Kût ta viauah kan ngai a, a bak kal zel ngaihna kan hre lo niin alang.

Krismas dawn leh kumhlui thlah dawnah te No Vehicle Zone kan siam a, mipuiin nuam kan ti a, kan tei huai huai mai a. Chapchar Kûtah pawh hian hetiang deuha ti hian, Lâmmuala chai khup mup mup ringawt lo hian a hman theih a. Rio Carnival tiropuitu chu costume parade an nei thin hi a ni. Sikulpuikawn leh Chanmari kawn inkarah hian Mizo thuama inbelin, tableau nen costume parade te hi nei ta ila, veng vengin thawkchhuak ta ila, tun ai hian mipuiin kan hlutin, hmundang atang pawhin entu leh thlirtu kan ngah zawkin a rinawm. Lammual chauh hi Chapchâr Kût hmanna tura kan ngaih chhung chuan kan Kût hian khawvel hriat a hlawh har ngawt ang.

Kût pual hian Mizo hnam incheina leh thuam hrang hrangte man tlâwm zawka lei theih turin zawrh chhuah nise, sorkar tan pawh sum hmuhna tha tak a ni ang. Trade Fair leh hetiang lam chite buatsaih ta bawk ila, sumdawnna hun tha tak a tling thei ngei ang. Kan dawrkaite pawh hian Chapchâr Kût discount inneihsiak se a duhawm hle. Puja leh vai kûtah te pawh discount eng eng emaw an siam theih chuan Chapchâr Kût puala discount siam hi thil har hranpa tak a nih a rinawm lem loh.

Ni khat chauh kan hman thin avangin a hman dan tur ruahmantute tan pawh ropui taka kan hman theihna tura ruahman a harsa ang. Kan Kût neih ropui ve hi hapta khat chhung pisa châwla hman pawh a phu ve a, hapta khat em em kan thei lo a nih pawhin ni hnih ni thum vel tal pisa chawlin hmang ila, a hman dan tur ruahmantute tan pawh ropui zawka hman theih dan tur duan a awlsam ngei ang. A pualin kan kawtthler leh pisa te, mimal inte hi Mizona tilang thei turin chei ila, a hmu ngai lo tan chuan heng ringawt pawh hi hmuhnawm a tling ngeiin a rinawm.

Chhûn lam ringawta hmang lovin zanah concert emaw ten emaw he hun hi hmang ta bawk ila, mipui nawlpui rilruah he Kût hian awmzia a nei thei zawk ngei ang.

Kristianna tih Mizo dan kan mithiam ten an ngaihtuahin an buaipui bawk a, Chapchâr Kût denchhen hian kohhrante pawh inkhawm programme siam turin ngên ta ila, kohhran mipui ten Kût pual hian sermon tumkhat tal ngaithla ila, Mizote chu min hrût kim hlein a rinawm. Mexico leh Latin America-a Roman Catholic tam tak khuan an hnam tihdan leh Roman Catholic Kohhranin kût a neihte an chawhpawlh a, chu chuan an Kristianna a tinghet a, tradition ropui tak a neihtir bawk.

Tuna Chapchâr Kût kan hman dan hian mipui min hru rual lo va, mi tam ber hian sorkar mi pawimawh leh, lâm tur YMA branch te chauh telna turah kan ngai a. Chapchâr Kût kan hmang ta sa sa, sum tam tak kan sêng ta sa sa, tun aia ropui leh nuam zawk hian hman dan kan ngaihtuah a ngai a ni. Tun atang hian inbuatsaih a ngai a, March thla vel atang chauh a hman dan tur duan hi a tlai tawh. Kumin phei chuan Lâmmual hi lâm han thai nan a uiawm a, chuvang chuan Chapchâr Kût hman dan tha zawk leh, a khau kâpa tel phurawm tur thuneitu lam hian ngaihtuah teh se.

Thulakna: Vanglaini