Vawiin chhun khan Art & Culture Minister Pu P.C. Zoram Sangliana hovin March 4 a Chapchar Kut lo thleng tur atana ruahmanna lailawk sawiho a ni.
Pu P.C. Zoram Sangliana chuan Chapchar Kut hi Lal Isua tel vena tlak ngeia hlim taka hman a duh thu a sawi a. Kan hnam ziarang pholang chung leh mi zawng zawng huapzo chunga he kut pui hi kan hman a tul a; chuvang chuan hnam dang miten min rawn tawiawm a, min rawn hlut pui deuh deuh theihna turin rilru zau tak i pu ang u, a ti.
He meeting-ah hian programme kim chang duang tur inruatfel a ni a. MUP, MHIP, CYMA leh a kaihhnawih department officer te an tel kim hle. Programme ziktluak duang tura ruatte chu Art & Culture Secretary Pi B. Sairengpuii hovin ni 24 January hian an thukhawm ang.
Chapchar Kut hi ruahman lailawk dan chuan ni 2 chhung hman tum a ni a. Hemi chhung hian pangpar khawi entirna te, lemziak pholan te bakah Pipu sulhnu vantlang en theiha Vanapa Hall-a neih tur a ni. Lammual (AR Ground) chu chei mek anih avangin Chapchar Kut hmanna atan hian Joint YMA Field, Vaivakawn chu tintuah lailawk a ni bawk.- DIPR