"Cheng Vbc. 6.5 Bo MNF Sawrkar Tihbo" "Rs. 9,75,60,687 La Bo Bawk"

MIZO AW: Health Minister Pu Lalrinliana Sailo chuan MNF party-in press release chhuaha Aizawl Civil Hospital tihchangkan nana sawrkar laipuiin pawisa a rawn pek a\anga cheng vaibelchhe 6.5, a awmna hriat loh an tih chu central sawrkar zawhfiah mek a ni a, pawisa rawn pek hun hi MNF sawrkar lai March 31, 2007 daih tawh kha a ni a, amah sawrkara a la awm hma leh tuna Mizorama National Rural Health Mission bultumtu official-te pawh an la awm hma a ni a, an bangbo ang reng hle a ni a ti.

       Nimin khan a pisa pindan chhunga chanchinbumite a kawmnaah Pu Rina Sailo chuan NRHM pawisa Rs.6.50,00,000 bo chungchangah hian Congress sawrkar pawh hi a lu a hai hle a ni a ti a. Central sawrkarin Aizawl Civil Hospital Upgradation atana ruahman zawng zawng Rs.54,23,00,000 atanga Rs.16,50,00,000 rawn release tawh anga a rawn sawi hi Health department-a lehkha dawn tawh zawng zawng chhuiletin Rs.10,00,00,000 sanction-na chauh hmuh theih a ni a, Rs.6,50,00,000 sanction-na leh a hmanna lehkhate hmuh zawh a ni lo a, sawrkar laipuiah Rs.16,50,00,000 rawn pe tawh anga an insawi hi an tihsual palh em ni ang tih zawhfiah mek a ni a ti.

Pu Rina Sailo chuan he pawisa hi kum 2007,2008, 2009 atan a ni a ti a.Rs.10 crore a\ang hian hmanraw changkang te lei nan leh \ul dangah Rs.4,14,87,758/- hman tawh niin a lang a, a la awm tur Rs.5,85,12,242 pawh hi a takin pawisa a awm tawh lova, thil dangah hman pen a ni mai thei a, mahse, eng atan nge hman a nih chiah chhui chian theih a ni lo a ti.

MNF press release-in Tantia Construction Pvt.Limited mi B.L.Ajit Saria -an cheng nuaingaa tham a tum, a peklet leh thu vawiin thlenga hriatzui a ni lo a tih chu Pu Rina chuan a pekletleh thu hi amah leh Pathian inkar-a a fel chuan tiin mipui hriat atan a duh loh avanga puangzar lo a nih thu a sawi a. Ni 11.6,2009 chhun dar 1:15 p.m. khan ama office-ah ngei B.L.Ajit Saria hi a peklet thu a sawi. Hriatpuitu zingah chanchinbumi Pu V.Z.Kaia, Aizawl Thupuan, Pu Tuikhuahthanga, Zozam Weekly leh Pu Zoa Tlau, Evening Post te pawh an tel a ni a ti a. Anni bakah Congress hruaitu Pu Lalpianthanga, Gen.Secretary leh Pu K.Lalchhuanawma, Secretary, MPCC pawh an awm a ni a ti.

Chanchinbumite hi an awm ve em, engatinge an puanzar loh tia Mizo Aw-in a zawh chuan an awm ve thu, a peklet thu leh puanzar hi Minister hian a remtih loh thu an sawi.

Civil Hospital Aizawl tihchangkan hna thawk tur leh Champhai Civil Hospital khum 100 awmna hna thawk tura Pu Ajit Saria thlan a nih leh a chunga cheng nuainga thamna inpek MNF press release-in a sawizawm chungchangah Health Minister chuan heng hnate hi ni 22 December 2008, Congress-in sawrkarna a chan tawh hnua pek ni mah se Congress Ministry chuan engmah a hriatpui lo a ni a ti a. He contract hna inpek dan hi a felhlel hle a, single tender-a tih a ni a, dan kalh a ni a ti. Tender chu 27th.May 2008-a chhuah a ni.

Pu Rina chuan MNF chuan an press release-ah chuan Champhai Civil Hospital sak nana ruahmanna cheng nuai 260 an tih chu Rs. 26.34 crore zawk a ni a, heta \ang hian Rs.1,50,00,000 rawn pek tawh a ni a, MNF sawrkarah khan consultation fee-ah Rs.81,60,220 leh 5% mobilization-ah Rs.60,00,000 lo hman tawh a ni a. A vaiin Rs.1,41,60,220 lo hman tawh a ni a ti. La hman bang Rs.8,39,780.

Tender-a Aizawl Civil Hospital upgrade-na chu Rs.1,659.673 lakhs a nih laiin contract pekna chu Rs.,22,71,48,584 a ni a, Champhai Civil Hospital tender amount pawh Rs.1,403.495 lakhs a nih laiin contract pekna chu Rs.19,61,40,842 a ni.

Health Minister chuan District Hospital paruk Kolasib, Mamit, Serchhip, Lunglei, Lawngtlai leh Saiha District Hospital sak\hat leh tihchangtlun nana Rs.100 \heuh NRHM hnuaia pek leh CHC Kawrthah, Biakte leh Hnahthial sak\hat leh tihchangtlun nana pawisa peka pawisa hmanna hriat si loh, la awm tur awm si lo Rs.9,75,60,687 a awm bawk a ni a ti. "Hengte hi kan sawrkar hma thil thleng kha a ni" a ti.

Pu Lalrinliana Sailo chuan MNF sawrkar khan Health department-ah cheng vaibelchhe 12 chuang a hnutchhiah nia sawiin cheng vaibelchhe 12 chuang leiba a awm a ni a ti a. Sawrkar laipui a\anga sum hmuh leh hman dante chu MNF sawrkar leh Congress sawrkarah felfai takin account a hrana vawn a ni a ti a. "A hlui leh a thar kan chawhpawlh lo, feltakin account kan maintain a, en theih vek a ni" a ti.