Vawi khat chu Chepachangeldepa hian kawng chhak lama changel kung hi a lo dep ngar ngar mai a. Chutih lai chuan Savawn hi a lo kal a, Chepa khawsak dan vel chu a hmuh chuan mak a ti hle a, ding meuhvin a thlir vung vung a. “Che-a eng i ti nge, changel te i dep tak ngar ngar mai le? ” a han ti a. Che-a chuan, “A eng dang a ni law, ka dep tlu thei emaw chu ka han inchhin vel a nih hi,” a ti a. Vawma chuan a dep chhin ve chak ta tlat mai a, “Khawi nge ka inchhin ve teh reng ang,” a ti a. Chepa chuan, “Ngawi rih teh kan en hmasa phawt ang e,” a ti a. A rilru in Vawma chu tih hluma a sa ei a duh avangin changel chu a vel that that a, a zungte chu a seh chat ta hlawm a.
Chutia changel zungte a seh chhum hnu chuan, “Khai le, Vawma han dep ve chhin teh le,” a ti a. Savawm chuan a dep ve ta a, a dep tlu ta mai a, a hmun a awi si a, inring hman heklo, changel nen chuan an lum dun ta chiam a. Chepa chuan a thih ngei ringin a umzui a, a lumna tawp a zuk thlen chuan Vawma chu him pialin a zuk hmu a, mak a ti hle a. Savawm chu a lo thinrim hle mai a, Chepa chu man tumin a um ta chiam a. Mahse, a man thei lo va.
Vawi khat chu kham ko thing awn de du-ah hian Che-a hian bawm a tah a, a lo awm der der a, Vawma’n a hmuh chuan a nawm hmel hlein a hria a, Che-a hnenah cuan, “Che-a ka lo awm ve teh ang,” a ti a. Ani cuan, “A dawl dawn che emaw kan siam tha ang e,” a ti a, bawm phuarna hrui chu a han seh rek a, “Vawma han awm ve rawh le, ti hi chuan a dawl ngei ang che,” a ti a. Savawm chu a han awm ve ta a. A rih em avangin bawmrang tawnna chuan a dawl ta lo va, a tawnna a chat a, a lum ta chiam a. Chepa chuan a thih ngei ringin Vawma lumna hmunah chuan hmanhmawh takin a zuk kal a, Vawma chu a lo thi si lo va, mak a ti rilru hle a. Vawma thinrim chuan a um leh ta chiam a. Nimahsela, a man thei chuang lo va,
Hmun pakhatah hian Chepa chuan buhhawp a lo chhum a, Vawma’n a hmuh chuan a buhhawp chu a ei ve chak ta tlat mai a, “Che-a, i buhhawp chhum chu ka lo ei ve,” a va ti duk duk a, Che-a chuan, “A la hmin lo deuh,” a ti tlat a. A buhhawp chhum chu mei a vur belh sauh sauh va, a sat vanglai takin, “Vawma, engtin nge kan ei ang, a suah chhuahna tur kan nei si lo va, i dul vun kha kan hmang mai dawn em ni?,” a han ti a, Vawma chuan, “Ni ang hmiang,” a ti a, a dul vun chu a pawt fan dur dur a. Che-a chuan Vawma dul vun pawh fanah chuan a buhhawp chhum chu a sat vanglai takin a chhung ta bawrh mai a, Vawma sa ti chuan a dul chu a nuai pilh ta duai a. A thinrim chuan Chepa chu man tumin a um leh ta chiam a.
A tawp a tawpah chuan Vawma chuan Chepa chu a man ta nge nge a. Tihhlum mai a tum laiin Che-a chuan, “Thing min chheh hnan la min hal hnan dawn nia, min hal hlum theih chuan ka nupui i nei ang a, min hal hlum loh erawh chuan i nupui ka neihsak vet hung ang che,” a ti a. Vawma chuan a remti a. Che-a chu thing a chheh hnan ta tlut tlut a, Che-a chuan rang takin kua a hreuh thuai thuai a, a kua chu a hnawh ping ta tlat a. Vawma chuan mei chu a chhem alh ta hluah hluah mai a, A thih ngei a ring a, mei a alh rem hnu chuan meihawl tlang lian deuhte chu, “Hei chu Che-a ruang a ni ang,” a ti a, a thial keh buaih buaih a. Mei sa a reh hnu chuan Che-a chu a kua atangin meivap kai li liai hian a rawn chhuak a. Vawma chuan mak a ti hle mai a, “Che-a i la thi nang e?” a ti a. Che-a chuan, “Thi suh e, mipa te chuan kan chhem kiang zel mai alawm le,” a ti a.
Chepa chuan intithei takin, “Vawma mipa i nih leh nih lo hi fiah ve ang hmiang,” a han ti a. Vawma chuan Che-a mah thi lo chu a thih bik a ring lo va, “Ni ang hmiang,” a ti ve leh ta ngawt a, Vawma chu Che-a chuan thing a chheh hnan ve leh ta a, a duh tawk a tam a chheh hnu chuan a hal ve ta ale, Vawma chu a kang hlum ta der mai a. Tichuan, Che-a chuan Pi Vawmi chu nupuiah a nei ta a. Ropui tain ruai an theh a, an ruai sa chu ramsa zawng zawngin an ei ta alawm.
Thulakna: Mizo Thawnthu Vol II by Lalhmachhuana Zofa