Chhantu Mamawh Lammual

- Tetea

Lammuala Chapchar Kut an hman nia ka sms dawn 100 chuang zingah, "Carpet hring man to tak lei la, i thenawmpa inah phah ta che?" tih hi a tel a, football khelhna tura an phah, football sawh dan mil tura rubber nawi leh sailungvar nawi an chhûn khah vek chunga an kût ta mai chu a hrethiam lo a ni - kei pawh.

Lammual uitute
SMS thahnem tak ka dawng a, phone call-te pawh ka dawng a, TV-ah ka en nileng deuh thak a, Minister leh MLA thenkhate nen pawh kan inbe ve reng bawk a, ka SMS dawn thekhat kan tlangzarh teh ang:

"Tih theih kan nei si lo, thinlung erawh a rûm a nih hi. Kan PULPIT ah pawn lam thil an lalut miau si a," tiin footbal atchilhtu patling tak pakhat chuan a rawn thawn. Pakhat ve thung chuan, "Vote zawnna'n Lammual hman nawn an tum a, football fans vote chu an chân vek dawn a nih hi," tiin a politics zawngin a rawn ti ve thung.

"Khelmual tha khelmual tha, damaged by the Chapchar Kut Organising Committee," tia rawn thawn an awm a, "Kan football khelhna tura an phah chu dim miah loin a chilin an chil a nih saw," an rawn ti bawk. SMS pakhat hian ngaihtuah a tithui a, "Tete, Lammual dim turin vawi khatmah au tawh suh, hre reng chungin an hmantir a, rap chhe vek law law rawh se," tiin a titau nghawng nghawng a ni ber.

"Inah ka awm, TV-ah ka en, an thil eiin an invawm nasa, ka thin a va rim em, ka tap lo chauh a ni," tih te, "In ui ve em em a, sorkar hian a ui ve miah lo a nih hi," tih te, "Hlauh ang ngei ngeiin mipui a duh duh an luhtir ta e," tih te, "Sweet kawr, chhang them etc chu a chhar leh theih, favai hi chu a har tawh ngawt ang," tiin favai an theh darhlaiin SMS ka dawng bawk.

Footballl ngaihsak reng reng loa ka ngaih doctor pakhatin, "TV-ah Lammuala an kût hmang ka thlir a, ka rilru a dam bik mawlh lo," a rawn ti. Hei hi ka SMS dawn tho a ni, "Fill in the blanks : Lammual built by________, Lammual killed by_______" tih a ni!
Ka phone dawn pakhatah phei chuan, "Khelmual tha, khelmual tha tia au zingah khan ka tel a, heti mai maia kan au chhuah sa an khawih chingpen hi kei chu ka lungawi lo teh mai a nia, lungawi lohna lantir in rawt chuan kei leh ka thiante chu kan tel ve sa," a rawn ti!

Nihawichi leh zu
Chapchar Kut programme a tawp rual chiahin Lammual ka pan ve nghal a, inkhelhna tura an siam Lammuala an sapatalna hnuhma ka va en chiang a. Mi rama an dim em em thin artificial grass chungah thutthleng leh sofa set rit tak takte an dah a, a uiawm ngei mai - a delh chin grass-in ngai a awh leh ka ring tawh lo.

|henret thialna hnu hmuh tur a tam em em a, a tuk zingah khawnvartui nen an tifai tih ka lo hria a, ngaiawh tawh lo mahse a lawmawm deuh e. Kuhna chhâkna hnuhma te, artui leh chhang nawi te, thil eina kawr chi hrang hrangte a tam mai a, huatthlala em em mai chu nihawichi khehna kawrte kha a ni - Tunah chuan USA atanga an chah rubber nawi leh sailungvar nawite leh Chapchar Kut hmangtute nihawichi khehna kawrte a inpawlh vek tawh.

Thin tiur zualtu chu hei hi a ni, zu funna sarang chhia a awm kha ka hrethiam a, zu nam rum rum khawpa khelmualah ngei zu an in kha football ngainatute tan chuan inhmuhsitna ang hial a tling ang. Zu an tihbuakna nam rum rumte ka hre thei a, kût laia awm ka thianpa chuan police duty zingah Lammuala zu fûn lo pet lawp lawpte pawh a hmu - a pawi ngawt mai.

Chu mai a ni lo, ka awmlai ngeiin artificial grass chungah ngat zurui pahnih an insual! Mi ramah chuan mipui nawlpui an chhuah hum hum ngai lo, kan ramah chuan zu an in mai a ni lo, zurui insualna a chang zo ta...

Ti tawh suh se
Lammual chhunga chhawng an hnawha artui leh chhang an paih darh hma daih tawh khan, mipui punkhawmna atana kan khelmual chei thar hman hi a that loh thu ka ziak tawh, thlâwptu pawh an awm nualin ka hria. Thuneitu lam kan ni lo a, kan tih theih chhun chu hmang lo tura ngen a ni a, an hmang lui ta ngei a, kha kha kan hmuh chu a ni.

Lammual chhungah ngei chhawng an hnawtte kha a pawi a ni mai lo a, a thinurthlak a ni. An rel danah chuan mipuite chu khelmuala lut ve lo tura tih an ni awm a, ka hriat tirhah pawh, "A theih loh, an lut tho tho ang, chuvangin hmang lo se a tha ber ang," ka lo ti ve a; nimahsela football khelhna tur bika an siam artificial grass chu USA atangin an chah chhuak tê tê a, artui thema invawmna hmunah an chhuah ta mai mai.

A tûk Inrinnia football entute chuan kan hmu vek - Lammual kha a bel em em mai a, hnim a bâl a, an chhuan em em line rin tam tak chu a reh titih tawh. An line rinna rawng hi reh mai mai tawh lo tur, USA atanga an lakluh a nih thu engineer ngeiin an rin dawnin min hrilh a; nimahsela tournament hmasa ber khelh zawh hmain a reh duak mai - ballboot-a an rah zeuh zeuh tura ngaih mipui nawlpuiin nepnawi thlauh chunga kan chil vang a ni.

Kan Lammual hi
A siam laiin an engineer ka bia a, a grass-a an dah rubber râwt dip leh sailungvar râwt dipte hi football khelmual ang thei tur bera tih a ni a, grass tak taka football sawh dan anga sawt thei tur te, ball lirh chak zawng thlenga inmil tur a nih thu min hrilh - tunah chuan artui uih te, chhang them te, meizial bung te, kuhva eina chhakna hnuhmate nen a awm ta nuai mai.

A chhunga mipui lutte kha demawm thei viau mahse, kei chuan ka dem teh vak lo a, Lammual ber hman an phal tawh chuan an chil ang a, an rap ang a, a hnim lo pawt tawk an awm ang, mipui pungkhawm an ni tlat - Lammuala punkhawm phalsaktute ka dem.

Mipui pungkhawmte kha a fing fing thlan chhuah an ni lo chiang mai a, mahni khelmual tha dim nachang pawh an hre lo - hetiang mite khelmuala luh phalsaktute hi Lammual tichhetu hmasaah ka puh e (A na deuh a nih pawhin Lammual an chil ni khan football fans rilru hi a na hle asin).

Ka sawi nawn leh dawn, Lammual pawna hman theih reng Chapchar Kut Lammuala hman rawttute hi ka dem lo thei lo a, football leh infiamna ngainatute chuan 'kan khelmual' he ti mai maia an chil hi kan ui vek a ni.

Ka SMS dawn bawkin kan tlip teh ang, "Lammual hi lo sawi lo sawi ve duh suh, in tha­hnemngaihna ang hi politician-in an pu ve phak lo, a tam thei ang ber lut se, Congress fak luai luai se an ti zawk a lawm, in au thlawn mai mai ang," tih a ni. Kei erawh chuan heti hian ka chhâng, "Sports Minister nen Chapchar Kût niin kan inbe reng a, amah ngei pawhin a rilru a nat thu min hrilh a, a khuhna tur carpet an lei hma chu mipui nawlpui luhna atan hman a tih chi tawh loh thu min hrilh," tiin - Lammual min siamsaktu Sports Minister hi Lammual chhantu leh vengtu turin kei ka ring tawk e!

Thulakna: Vanglaini