Chhuanlam Tliang Lo : PRISM

Aizawl 22^nd July, 2011: Prism chuan Ni 21.7.2011 (Ningani)-a Mizoram Assembly House Budget Session-a Chief Minister Pu Lal Thanhawla’n a kaihhruai sorkarin Vigilance Commission vawiin thlenga ala din lohna chhan a sawi chu chhuanlam tlingah kan ngai lo va, sorkarna an chelh chhung ngeia din turin kan phut tlat a ni.

Kum 2008 MLA Election-a an party manifesto bul tanna, rorelna tha nei tura an intiamah pawh a hmasa ber Mizorama corruption chungchang chhui tur Vigilance Commission din an intiam chu tihhlawhtlin an tum leh loh thu House-ah CM-in a puang hi anmahni thlangtlingtu mipui zah lohna leh ngaihnepnaahkan ngai a. An din lohna chhan hrang hrang a sawi: (1) sum dinhmun that tawh loh vang, (2) ACB tihchak a nih vang, (3) Engtiklai pawha koh luh theih tura CBI an awm tho vang, (4) Lokpal Bill pass a nih chuan state tinah hman a nih dawn tho vang, (5) Chief Vigilance Officer-in Vigilance Commission tih theih a tih theih tho avangin VC din ni ta se thubuai lutte tihkhawtlaina a nih phah theih zawk a hlauhawm vang a tih te hi belhchian dawl lo chhuanlam, mahni thutiam tihhlawhtlin tum loh avanga insawi mawi tumna maiah kan ngai.

Pu Hawla kaihhruai party-in sorkarna an chelh atanga reiloteah “Corruption a zung nen kan phoro ang” tih a zau thei ang bera an puan dum dum avang khan mipuiin beiseina sang tak nen he sorkar hi kan lo thlir a; mahse, corruption phorona tura hmanraw tha ber nia anmahni vekin an sawi Vigilance Commission din an tum loh thu an sawi leh si hian corruption an haw tak tak lo tih a tarlan bakah mahni thutiamah pawh ding ngam lo an nihzia a tarlang niin kan ngai lo thei lo.

Prism chuan Pu Hawla kaihhruai sorkarin an sorkar chhung ngeia Mizoram mipui hnena thu min tiam tawh anga Vigilance Commission an din ngei theih nan kan theih ang anga hmalak zel kan tum bawk.