‘Chibai’ tih hi Mizo inlawmna leh inchawimawina tawngkam hman lar tak, eng lai pawha hman a ni. Hmanlaiin Mizo pi leh puten chi an harsat em em a, vai lam chi an la hmuh phak loh avangin luite tui al awm ang ang er-in zan tam riakin chi an teng thin a. A chitui al a tak loh bakah an tenna bel a lian bawk si lo. An ten khang ang chu ‘chi-khawn’ an ti a, an roh em em a. Azawng aza pawhin an ei phal lo a. Naupang khawih phak loh turah maurawthei chhungah khungin an thukru a. A narana an bai alna chu mauhnuh emaw, buhpawl emaw hneh taka rawh vapin bai an al thin a ni. Chutianga bai al lah chu a chingal al roh a, a bak hlur maia a tui vak lo hle. An chi neihchhun an thukru chu kut ni vangthla leh duhsak zawng chaw an eipui nikhua hunah chauh an hmang a. Kut ni-ah pawh chi an nghei fo avangin hrilhhai sawi nan pawh ‘kut chi lo hawi’ an tih phah a ni. Mikhual duhsak zawng an thlen tum a chi ngata bai an chhuan sak pawhin an mikhual chu a lawm em em a, “Ka thlenin te chuan min duhsak khawp a chi ngata bai min hmehpui asin,” an ti hial a, induhsakna sang tak a tling hial a ni. Chuvangin, ‘chibai’ tih chu induhsakna ropui tak a niin tun thlengin a tha lamah kan tawngkam chelek ber a ni ta a ni. Chi ngata bai chu a tui bik avangin, thil ei luat avanga kaw dik lo pawh, “Michhe al ei ngai lo-in ka’n ei ve a, ka kua-in a dik loh phah,” an tih fo tak reng hi.
Thulakna: Tawng Un Hrilhfiahna