DFO-IN RAMSA AN MANSA A HALRAL

Nimin khan Forest Dept.-in Ramsa leh Sava sa leh Sava Thang an mankhawm te chu RO Office kawtahDFO Pu Vanlalena`n a halral.
  
 Inrinni kalta khan Forest Dept. chuan bazar chech-in Sava 48 (khai 8) Sakuhsa hrang 11 (khai 2) leh Sava thang 17 an man a. Sava thangte hi Chhungte Zo-a Sih an kam atanga man sak an ni a, Sih te hi hung phui vekin a luhna pakhat chauh an siam a, hetah hian thang kamin Sava te hi an awk thin a, Forest Guard ten Zirtawp ni khan an man sak a ni. Champhai RO Pu GLK Thanga chuan Champhai Bazar hi Ramsa zuar tamna hmun a ni a, DFO in a ngaih pawimawh avangin kan check thin a, a tirah chuan  intiamkamna neih tirin kan chhuah leh mai a, a hnuah pawisa chawi tirin  kan chhuah leh mai a, a hnuah pawisa chawi tirin intiamkamna kanneih tir leh a, hemi hnu pawha la sim lote chu kan halralsak ta a ni, a ti.
   
DFO Pu C. Vanlalena rawn awm hnuah Far thing a ruka kihte zawn hna pawh ngawrh takin thawh chhunzawm a ni a, nimin khan Zote dai-a Far thing kih sa 407 Motor phur 2 an mansak a, BRTF ho lo kawlsa te nen tunhnaia Far thing an man zat hi tum (log)  2069 a ni a, hei hi Cubic Metre 136 (Cubic feet 4781) anga chhut a ni a. Far thingte hi chempuiin an tei a, chumi hnuah Thingzaikhawlah kalpui in Chartin (4x3) ah siamin Chartin pakhat hi Rs. 150 in an hralh a, mi pakhatin ni khatah Far tlawn 4/5 te an tei zo hman thin a ni. Heng bakah hian DFO hian Far thing zaina atana hman Thingzaina Ha 5, Ara 1, Hreipui 10, Chempui 3, Tuthulh leh Suahdur pakhat ve ve an man bawk.Far thing an mante hi ramhnuai ami anih avangin Forest Dept. hian Hlawhfa leh Motor Hire-in Far thing te hi an lakhawm a, Far thing kittu mihring te rawh an bikbo hman zel avang in leh Signal inpek dan an neih that em avangin an man thei thin lo a ni.
   
Hei bakah hian Ramsa kah tuma Sapel hnen atangin DFO hian Silai 4 a mansakbawk a, heng zinga 3 chu N. Vanlalphai Division huamchhung, Biate khaw ta anih avang in N. Vanlaiphai DFO hnenah a hlan a, a dang pakhat chu tunah hian RO Office ah an kawlmek a ni. Ramsa leh Far thing kih ruk kaihhnawihah hian mi 7 hnenah thubuai siamsak mek a nih thu a sawi.
  
DFO Pu Vanlalena chuan mi thenkhatin Far thing an ruk avanga kan ramngaw a chereu nasa tawh lutuk chu pawi a tih thu sawiin hei vang hian a kum telin Champhai pawh a lum telh telh a, Kangmei chhuah a hlauhawmin Tuihna pawh a tlem telh telh dawn a ni, tiin mipuite Thing leh Mau humhalh kawnga kan than harh meuhchuan khua a tlai hman tawh thu a sawi a, far thing ruksa man tura a Staff te fehchhuak chuan hahin an fakawm tak zet a ni, a ti bawk.

Thulakna:https://champhai.net