Hmangaihna Alphabet

- Samuel C.Zaithankhuma

Hmangaihna tih tawngkam hi khawvela hrilhfiah har ber zinga mi, a tel lova kan khawsak theih si loh a ni a. A awmze hrilhfiah tumtuten hrilhfiah an tum nasat poh leh a rilzia an hre tulh tulh a. Siamtu kutchhuak zingah chuan a tha famkim ber hial awm e. He tawngkam  tawite hian thil zawng zawng a pai vek tih theih a ni. Chu hmangaihna ril tak mai chu Sap alphabet A-Z hmanga hrilhfiah i han tum dawn teh ang.

Accept (pawm) : Khawvelah tumah famkim kan awm lo. Mi kan va hmangaih tawh a nih chuan a nihna (dinhmun) chu kan pawm thei tur a ni. Thatna chauh pawma inhmangaihna chuan a daih rei lo. A chhiatna lai pawh kan pawm tur a ni.

Belief (Rinna) : Hmangaihna-ah chuan rinna a tel. Mi kan rinhlelha amahah kan innghat ngam lo a nih chuan kan hmangaih thei lo. Min hmangaihna pawh kan ringngam tur a ni. Inrin tawnna a awm loh chuan a tawpah inthenna a thleng nge nge thin.

Care (Ngaihsakna) : Kan hmangaihte chu kan ngaihsak thin. Ngaihsakna hian amah kan veizia a tilang. "Kha i dam tawh maw?", "A vawt sia kawr lum ha rawh," tih tawngkam mai mai pawh hian thil a tithei riau. Inngaihsakna tawngkam hi a dawngtu tan a tangkai vek loh a nih pawhin a rilruah hlimna engemaw a thlen thin.

Devoted (Rinawma inpumpek) : Lal pahnih rawng bawl a theih loh. Hmangaih nei duah chunga pakhata inpumpek a awm thei lo. Kan hmangaih pakhat chauh hnena rinawm taka inhlan a tul. Rinawm lohna hian inthenna bak hrin chhuah a nei dawn lo. Kan hmagaih leh duh ber tan chauh kan inpumpek ang a, chumi rah thlum tak chu kan ei dawn a ni.

Enjoy (Hlimpui) : Kan hmangaih ber chu lungawina famkim nena kan pawm tawh a nih chuan hmangaihna rah hlimna, nawmnate chu kan ta a lo ni ang. Inhmangaihte inkarah hlimna a awm loh chuan chu hmangaihna chuan rei a  daih lo vang.

Freedom (Zalenna) : Inneih hnuah pawh kawppuite chuan an mimal zalenna an nei tur a ni. Inkhuahkhirh tlatna hian chungpikna a thlen. Mimal thuruk engemaw pawh a la nei zel thei a ni. Ka nupui/pasal a lo nih tak avanga lung in tang ang maia a inngaih chuan a fel lo hle ang. Mimal zalenna a nei tur a ni.

Give (Hlan) : Hmangaihna kan tih hi kan inpek zawh dan azira kan hnena lo kir leh chu a ni lo. Mahse, pek kan neih loh chuan lak tur kan nei hauh lo vang. A laka kan inpekna ang chiah min pe ve a nih chuan chu chu hmangaihna dik a ni.

Heart (Thinlung) : Hmangaihna pawimawh ber chu thinlung zawng zawnga hmangaihna hi a ni. Thinlung chhungril ber atanga hmangaihna ni lo, rosum umna ngawt hi hmangaihna dik tak a tling lo.

Independence (Rinchhan loh) : Tawngkam thiam tak chuan, "I tana lo piang ka ni," an ti thin. Mahse, mi tin hian mahni inrinchhanna hi engemaw chen kan nei theuh. Kan hmangaih chu kan rinchhan lutuk a nih chuan phurrit siamsakin a rilru kan tihah thlawn mai a ni ang.

Jealousy (Thikthu chhiatna) : Thikthu chhiatna tluangtlam tak chuan kan hmangaih chu kan tana a pawimawhzia kan entir thei a. Thikthu chhiat chhan dik tak avanga thikthu chhiatna hi chu a awm ve reng reng. Mahse, thikthu chhiatna tur pawh awm lova thikthu lo tihchhiat vak hian kan hmangaih chu thil tul lo kan tihtir thei. Hnam culture azirin thikthu chhiat chhan a danglam thei bawk.

Kiss (Infawhna/fawp) : Vawi khat infawh hian tawngkam sing tam aiin awmzia a nei thei an ti a. Dim tak leh hmangaih taka kan hmangaih kan fawhna hian kan duhna chu kan tilang thei. Kan hmangaihte fawh hi kan hreh tur a ni lo. Uikawm chi a ni lo.

Love (Ka hmangaih che) : Hmangaihna leh ngainatna hi a thuhmun lo. Kan hmangaihte lakah chuan eng pawh kan huam a. A lakah kan zawr a ni. thil kan tihsak tam theih poh leh a titu a lawm a, tihsak zel duhna chu a lo piang chhuak tam tual tual lehnghal. Hmangaihna hi zawng a mak a ni.! An hmel leh pianzia hmuh mai pawhin lei vanram a temtir a, an aw mawi tak hriat chuan lei hringnun hi a partir thin. Chuvangin, "Ka hmangaih che" tih tawngkam thlum tak hi thilpek hlu tak tak ai pawhin a lo dawngtu thinlung a hneh thei a.Khawvel hi par ang a vultir thin.

Mature (Puitling) : Engvang nge mi thenkhatte hi an tawntrih di te nen runhmun an len loh? A chhan zinga pakhat chu tleirawl lungmawl lai a ni a, naupang chhe rilru mai mai an la put thin vang a ni. Awmze nei lova pangchang nghur nghur reng maite duh dan chu englai pawha zawm reng theih a ni lo. Mihring kan puitlin hian kan hmangaihna pawh a puitling nge nge a, a par mawi pawh lawh tur a awm hma thin.

Natural (Nihphung dik tak, zia) : Inneih tirh chuan tupawhin mahni sapanna lai theuh chu kan thup hram hram a. Kum a lo vei a, a rawn lang tual tual a. Chuvangin, kan hmangaih phat atangin kan nihphung dik tak hmangin kan hmangaih nghal tur a ni. Lemchan chawp a awm loh phawt chuan chu hmangaihna chuan a daih rei ngei ang.

Observe (Chik taka zir) : Kan hmangaihte ngainat zawng (hobby) leh duh zawngte chik taka zira kan hmuhsak thiam chuan anmahni hriatthiamna kan nei ang a, an rin phak baka ropui chu kan tihsak thei ang. Entir nan, Magazine kan en dun laiin a sana duh zawng chu a sawi a, a birthday-ah chu a  sana duhzawng chu leisak ta ila kan rin aiin a lawm hle ang. kan thilpek hlutna lam aiin amah kan ngaihven zia a hriat khan amah a tilawm a ni.

Protect (Veng him) : Mipain hmeichhia a veng him hi thil nihphung a ni a. Chutih laiin hmeichhia pawhin a hmangaiha hlutna leh thatna chu a humtur a ni. Mi laka a zahna tur leh rilru natna lak ata a veng him tur a ni. Hei hi hmeichhe fel zia a ni. Perfect girl  ni tur hian hmel that, pian nalh, zeite bakah fel a tul.

Quarter (Ngaihdamna) : Ngaihdamna (zawldawhna) hi hmangaihna bung leh change pawimawh tak a ni. Kan hmangaihte dik tawk lohna/fel lohna chu kan ngaidam tur a ni. A chhan chu kan hmangaih ber a nih vang a ni. Rilru sei tak pua ngaihdam theih a tul.

Receive (Dawng, lo lawm) : Hmangaihten min pek chu kan duhzawng a ni emaw, ni lo emaw lawm takin kan lo dawng thiam tur a ni. Kan ngainat zawng a nih loh avanga hmel hlim lo taka lo dawn a fuh lo. An rilru kan tinain kan tihnual thei. Hmangaihte min pek chu hlim taka lo pawm thiamna hian hmangaihte inkarah hlimna leh inhmangaihna a puntir thin.

Share (Sem) : Kan inhamngaih tawn tak tak tawh a nih chuan kan nuna hlimna, lawmna, harsatna leh buaina tawnte chu kan inhrilh tawn ngei tur a ni. Hei hi kan tih tur tluang tlam tak a ni.

Tender (Nem, no, dimdawi) : Hmangaihnaah hian nem leh no tak hi a awm. Nem no tak hi awm lova a ro deuh tan a nih chuan hmangaih thla a la tawh lo. Tun lai tawngin, "Hmangaih a chakawm loh". Hmangaihna rorum aiin hmangaihna nem tak hi a fuh zel zawng a nih hi!

Understand (Hre thiam) : Kan hmangaihte thiltih chu kan hre thiam lo a nih chuan hmangaihna chu a mal din thuai a, inbiak pawhna thlengin a ngawng chhe thei. An rilru sukthlek dan atanga suangtuahpui an tul. Chu chuan hriat thiamna a hring.

Verity (Dikna, thu dik) : Hmangaihnaah dikna hi a pawimawh hle. He mi tel lo hi chuan hmangaihna hi a awm tak tak thei lo. Sawi ang chiaha khawsak a tul hle.

Wait (Nghak) : Hmangaihna dik chuan a nghak peih. A dawhtheih. A tuar hram hram. A hmanhmawh lo. A tisek lo. A zar buai lo. Hringnun lam tluang kan zawh dunnaah innghah tawn a tul. Pakhat a kal chak lutuk chuan inkalsan a ni mai.

X (Puntir chhinchhiahna) : Kan hmangaihna chu nitina kan puntir phawt chuan tawp chin nei lo hmangaihna a lo piang a ni ang.

Yield (Tlawm) : Mi pahnih awmnaah chuan inhnialna hi a tlem a tamin a lo chhuak ngei ngei. Inhmangaih ber berte inkarah pawh a thleng lo thei lo. Hetih huna hlu tak chu hnung lama ke pen a ni. Tlawm zawk nihna hian thinurna meipui pawh a tidai thei a. Buai chhan tak tak hriat hmaa 'inthen mai ang' tih sam et tur pawh a ni lo. Rilru so sang a tlak hniam hnuah a chhan dik tak zawna kawng dap hi tih dan tha ber a ni. Hmangaihna chuan tlawmna a keng tel.

Zero (Bul tan hun chiah) : Kan nupa boruak chu a nghet ta emaw kan inhmangaihna chu a nghet ta emaw kan tih laia kan hriat reng tur chu intawn tirh lai boruak kha a ni. Kan hmangaihna chu nitin a piang thar zel tur a ni. Kan tawn tirh, inneih tirha kan hmangaihna thar sar kha a chul mai tur a ni lo. A thar reng zawk tur a ni. Vawiin hi hmangaih bul kan tan hun chiah a nih zel chuan hmangaihna a chul thei lo. Hmangaihna awmzia hrilhfiahtu mi tam tak an lo awm tawh a. Hrilhfiahna tha ber ber pawhin a awmze rilzia hi an phawk chhuak zo lo. Hmangaihna chungchang chhuitute hian a daih rei dan tur te, a kal kawng dik leh hlimawmnate an chhui thin. Mahse, chhui zawh rual a ni lo. Nula hmel tha leh  zei tak mai, pian nalh leh fel tak han hmangaih tak tak hi chuan mipa fing ber pawh a â der thei a, huaisen ber pawh dawizep berah a tang leh thin. Nula pawh an lem chuang lo. Tlangval aiin an huai deuh em aw? tih ang vel chauh an ni. Engpawh nise, sap alphabet A-Z hmanga he hrilhfiahna tlem te hian hmangaihna kawng kan zawhnaah eng emaw ti tala tangkaina min pek theih beiseiin kan han sep ve a ni e. "Hmangaihnaah thil engkim a awm"!