Mizote hi Mizoram mai ni lo - India ram hmun hrang hrang,Bangladesh leh Burma mai bakah ram hrang hrangah kan inpharh nasa ta a,hei hi hui-tui-luangin min len dan a ni ve tlat a.Tin, hei hi hmasawnna lanna kawng khat a ni a tih theih bawk.Hetianga hmun hrang hranga kan awmnaah hian Mizo ngaih hlut leh hnam ziarangte hi vawn nun zel tumin tan kan lak a pawimawh a,hmun hrang hrangah cheng mah ila,inpawh taka kan awmho a pawimawh tak zet a ni.
Khawi hmunah pawh awmin eng hun pawh tawng ila,Mizo kan ni a,kan tawng leh kan nunphung-ziarang kan humhalh tlat a tul.He'ng Mizona lanchhuahna Zonunmawi / Tlawmngaihna ang te hi thangtharten an chhawm nun zel theih nan tan kan lak a pawimawh.Chuti chuan he khawvelah hian hnam ni ve tura duan kan lo nih angin,"Mizo" hi a lo vul chhuak ang a,thangtharten "Mizo" nih hi nuam an la rawn ti deuh deuh ngei ang.
Heile,khawvela Mizoten "Kan Mizoram" kan tih ve theih chhun,Mizo tam zawkte chenna - Mizoram chuan Chapchar Kut 2010 12.3.2010 (Thawhlehni)-ah khawvel mit hmuha Mizote lanna turin hma a la nasa ta le!Khawvel a ber kaite ziakna bu Guiness World Record-ah "Cheraw Kan" chu chuantir tum a ni.Mizote tan chanchin lawmawm a ni kan ti lo thei lo.Hawh u,hmun hrang hranga awm Mizoten kan Mizo Cheraw hi hnam dang hriattirin,hemi ni hian "Cheraw" kan ve heih heih ang u.Mizo Kut zinga ropui ber Chapchar Kut te hi i hmang rual thup ang u.Chuti chuan Mizo Mizona a lo lang a,Mizo nih hi a lo nuam deuh deuh dawn a ni.Hawh u,kan Hnam Nunphung-Ziarang te hi i hlut ang u.