Mizo pi-pute ngaihdanin nupui pasal inneih pawh an duh loh,"Thlado" tia an lo serh Thi tin thla(August) hian mitthi thlaraute chu Mitthi khua / Pialral panin an kal thin a.Rihlipui paltlangin Hringlang Tlangah an kal a,Hawilo Par thliakin Lungloh Tui an dawn a,tichuan Mithi khaw kawtchhuah an thleng ta a. Mitthi khaw khawtchhuahah chuan Pawla'n Thangchhuah pa an nih leh nih loh te,tlangval laia hmeichhe ngai ngai an nih leh nih loh te,Pasaltha an nih leh nih loh te,nulat laia mipa ngaih ngai an nih leh nih lohte a lo endik ta thin a ni.
Mihringin mitthi khaw kalkawng kan hmuh hlat theih ber chu Rihlipui a ni a, Rihlipui piahah chuan Hringlang Tlang(Mihring lan theihna tlang) a awm a,chu erawh chu minungin kan hmu ve thei tawh lo.Hringlang Tlang atang chuan thlaraute chuan khawvel hi an rawn hmu thei a, an lung a leng em em thin.
Mizo thlahtu kal hmasate kha ram leh hnam tan theihtawp chhuahin an theihna zawng an lo hlan a,a thenin an nun hial an lo hlan a nih kha!Kal hmasate chuan Hringlang Tlang atang chuan min thlir ang a, vawiina kan nundan leh ilo vel zawng zawng hi an rawn hmu ang a,engtin tak min ngai ang maw?Chu Hringlang Tlang atang chuan thlahtuten min thlir reng awm si a...