Mizo hmeichhe thenkhatte hian an thusawi dawn apiang maia, “I hria em? Hria em?” tih an telh hmasa thin hi chu mawi lo leh chuangtlai tak niin ka hria. A enga hma hma-a, “I hria em?” tia min han zawt ngawt thin hi chu(h) – hre ve lo kei pa mawl tan chuan, “Ka hre lo.Hre lo,” tia chhan mai bak tih theih ka nei thin lo.
Engmah an sawi hmaa, “I hria em? Hria em?” tia bul tan thinte hi a tlangpuiin hmeichhia an ni a, mipa pawh an awm ve pheuh pheuh. Engvanga sawi nge an nih a, enge an sawi tum kei chuan ka hre pha lo.
Hetia thusawi bul tan thinte hi Mizo hmeichhe thenkhat chauh an ni lo. Mizo hnahthlak hnam hrang hrang hmeichhiate, Kawl hmeichhia te, Shan hmeichhia te, Chinese hmeichhia te leh Malaysian hmeichhiate kawmin an zingah ka khawsa tawh ngai a, “I hria em? Hria em?”-a thusawi bul tan thin ka hre nual. Engmah an sawi hma leh engmah min hrilh hma hauha, ka hriat leh hriat loh min zawt hmasa ngawt thin hian min va tibuai thin tak em! An sawi phawt loh chuan kei chuan ka hre lo a ni ber e.