KA NGAI MANG E

-Kawlthangpuia Hmar

Siamtu'n duh taka a duan khuavelan,
Hringfa ni ve turin mim ang ka lo piang;
Saisentet nun mawi leh thiang,
Thinlai lunglai sual kai lo,
Lungkham mangan buaina piah ram,
Senlai nun hlimawm zawngte kha,
Ka ngai mang e!

Lenrual lungduhte nen,
Hlimlai vawrin ka nui hiau;
Engdang tudang ngai lovin kan leng,
Lung kan rual ngei kan za ten;
Tunah erawh lenna tlang a hrang ta si!
Tuan tul lenrual hluite leh fam tate kha,
Ka ngai mang e!

Mi ang sa ang ni tur leh,
Rualpawla tuan tul nan tiin,
Zirthiam run ka bel hne hne;
An sawi phu loh Zawlkin Thiam Thang Run,
Ka lawinaa ze tin ze tang,
Ka zirpui lenrual zawng zawngte kha,
Ka ngai mang e!

Mi faten ram leh hnam chhan nan-
Tiin nun hial an hlan,
Kei erawh zawng chakna thahrui reng ka nei lo;
Ka theih ang tawk tiin Mizo hnam tan,
MSF hming chawi a,
Ka rawngbawlpui thenrual duhawm takte kha,
Ka ngai mang e!

Chung Khuanu remruat leh duan,
Hringfate nun hlimna petu,
An sawi 'Hmangaihna' khurah,
Ka cheng ve hring dan tiin;
Mahse,awmlai hrang vanga,
Ka tawna par vul ta lo ka di te kha,
Ka ngai mang e!

Zuapa ti-a a tang belh hun tur,
Dawna hringnun chhiarin;
Beiseina nen nunchan zira,
Tawn leh ni tur ka thlir laiin,
Thlafam a chan ni pawh hre lova,
Liam ta Zuapa duhawm tak kha,
Ka ngai mang e!

Hmana kan Han khawpui,
Elrel hmuhsit ngai lohna vangkhua,
Tapte tahpuia lawmte lawmpuiin,
A thlum a al ei zaa chingal saum in ban tawnin,
A lian a te awm lova tual kan chaina,
Lungrual tea kan lailai kha,
Ka ngai mang e!

Nunhlui mual liam hnu,
Ngaia rum hi sawt lovin,
Hmatiang sawnna ni lo mahse,
Sawt lo ngaia rum hi!
Hringnun pianken,lunglen thiang,
Kan nih ang ngeia kan la tih tur chu,
Ka ngai mang e!

Thulakna: Zawlkin Huiva,2008