Ka Nu Kur Duam Duam

- M.S.Dawngliana

“Ka nu kur duam duam
  Ka nu phunchawng Darhniangi,
  Ka nu kur duam duam”

"Fate ngaihdam hi nu leh pate tan chuan kan hna a ni ber mai a," tiin  ziaktu pakhat chuan a sawi a. A dik thui hle awm e. China hnam ang  bawkin Mizote hi fapa an lo pianin an lawmna a sang thin a. Mahse an  lo sei lian a, nu leh pa timangangtu mai an ni chawk thin.  "Kan fapa chu a sual hle mai a. Ka awm loh hlanin chhungkaw ei tura ka  dah te hial a lo la ru thin a. A nu meuh pawh velh a lo tum thin a.” Tharum nen meuha ka nawr zawi hnuah thu tha han hrilh meuh chuan, "Kei pawhin sual hi chu nuam ka ti bik hlei nem! Thei ila sim ka duh ve tho a sin. Hmun dangah lehkha zir turin min dah ula, ka tha ve deuh ang a, lehkha pawh ka thiam ve ang chu," a ti roh a. “Chu tawngkam ngawt pawh chuan min tilawm viau mai a. A tan kawng tha ngaihtuah ka duh hle a ni," tia pa thenkhatin an sawi te kan hre ta nual mai. “Chu kam chhuak ngawt pawh chu nu leh pa tan chuan RIMAWI a tling ngei a ni. Hei, neih zawng zawng sengin kan rawn in hruai thla ve rawih mai a ni," ti hlawl pa thenkhat te pawh hmuh tur an tam hle ta! Heng  zawng zawngah hian:

Ka sen laiin tunge mi enkawl?
“Ka nu, ka nu duh tak chu;
Ka dam lo va, a tlaivar a,
Ka tap a, min lo chawimu thin;
Hah takin, chak lo chung pawhin,
Ka nu, ka nu duh tak chu”, tih nachang hre lo, tithiam reng reng lo te tana nu leh pa inpek zawh zia a lang chiang kher mai.

Nu leh pa te hian an fate tan an kur zel a, an tlin loh thleng thlengin an kur duam duam hi a lo ni reng mai. Hmasang Mizo nuna thil lang chiang tak pakhat chu, nu hrawnte an nunrawng em em kha a ni. Kawng leh lama thlir chuan hringtu nu tak te hlutzia Mizo thawnthu hian min zirtir fiah nasa. Fahrah rethei thawnthuah pawh khan, a nuhrawn khan a tirethei em em a, chaw tha pawh pe ve lovin, sazu ek leh favai inpawlh chawin a chawm a, hna hahthlak tinreng a thawhtir bawk si a. A nu tak chu Phunchawngah a chang a, a zar duai mai a. A par vul chuk a, a zu a tlan dawn a piang hian:

Ka nu, kur duam duam,
kan nu Phunchawng Darhniangi,
Ka nu, kur duam duam...,,
a ti a nih kha. A nuhrawn thu avanga a pain a kih thlengin, rawl raih thlengin Phunchawng Darhniangi chu a fa tan akur duam duam thin a ni. Vawiin ni thleng hian nu leh pa te chu an fate tan an la kur reng a, an kur zel dawn a ni. A theih dan kawng tinrengin, an fate thatna tur a nih dawn phawt chuan, ral raih thlengin an kur zel dawn a ni.