Kan Tlai Tep Ta Mai...

- lallawmawma Chhakchhuak

Ka vei em em, Mizoram hmel hmang danglam dawrhna tur nia ka hriat ka tarlang dawn a, thenkhat tan ngaihthlak hrehawm a ni mai thei a, ram leh hnam tan tiin ka insûm duh bik lo.

MPSC hna lak chung chang
Kan hma lawk February thla vel khi chuan kan rama hna sâng tak MF&AS lak nan written exam a awm leh mai dawn a, a hnu thla hnih velah MCS pawh a awm leh tur a duan niin form pawh fill-up vek a ni tawh. MPSC-in Mizoram chhunga hna a lakah chuan hna sâng leh chhenfakawm tak an ni a, mahse hetah hian ram leilung fate kan in duhsak hmasak a va ngai ta em! Ka article hmasaah khan rawtna tlem ka siam a, an tih hlawhtlin ka la hre lo a, sorkar leh NGO’s atangte in hmalakna pakhat mah ka hre lo hian ka rilru a tibuai. Mizorama hna thawk tur chuan Mizo-tawng hmang ngei, kan nula tlangval te hi ni teh se.

Ka hriat danin kan hnung lawk khan heng exam rawn bei tur hian Manipur State atangte in form an rawn fill-up nasa a, communication address-ah helama an hmelhriatte an hmang mai a, tlang mi (Scheduled Tribe) ni ve loten kan ramah ngei kan thalaite hna tur min rawn chuhpui ngam hian ka thin a tirim. Kan naute ai chuan a thiam pawh an thiam mai thei e, mahse ram leilung fa (Son of the soil) te hi priority kan pek hmasak a ngai a, thuneituten security tha zawk in pek hi ka phut tlat a ni. A ven nan chuan common question Mizo subject-ah siam ni sela, hetah hian Mizo ka ni tichuan an chhan thiam theih loh tur awmin ka hre lo. An siam hman lo a nih chuan exam hun hi sawn hla mai teh se, hnam dang tan heng hnate hi ka phal lo; kan tlai tep a nia. Neinung zawk fate thiamna sâng zawk nei a vairama coaching kal te pawhin kan Mizotawng ngei hi an exam ve tur a ni; a chhan chu Mizorama thawk tura hnalak a nih avangin. Chu mai bakah State pawnlam atanga min chuh puitute laka kan himna a nih avangin a pawimawhin a tul hrim hrim bawk.

Kan Chief Minister thusawi zingah State pawnlam a miten Mizo intiduh si lova kan ram chhung hi eizawn nan (job field) ah an rawn hmang thin a duh lohzia a sawi khan ka lawm hle a, ka pawmpui bawk a. Kan Legislature-te hi dan siam tur leh ram enkawl tura kan thlan tlin in ni a, nangmahni puarna ringawt khan ram a siam tha dawn lo. I ram neih chhun i ven loh chuan hna sang tak takah hnam dang an thu ang a, anmahni chipui an in duhsak thiam nasa si a, kan ram hian internal assimilation kan tawk mai ang. Dan tha zawk in zam thuai loh chuan ram leilung fate zawk hi kan la hawihil dawn. Chief Minister, Home Minister, Education Minister, YMA leh MZP te an chet vat a tul ta. Quality education kan buaipui a, kan ven hmasak loh chuan result tha kan nei chuangin ka ring lo.

Tin, MCS exam hmasa ah khan optional paper-ah scale mark an siam anga sawi a ni a, a bikin Mizo subject-ah. A lo awm tak tak a nih chuan a tha lo hle in ka hre bawk. Optional paper a nih angin a duhin Mizo subject an la a, a awl vang emaw chhan a har loh vang emawa scale mark siamsak ringawt bik hi tha ka ti lo. Mizo in ti si a mahni tawng la ngam lo te duhsakna emaw, mahni tawng hmuhsitnaah ka ngai tlat. Abikin Mizo Paper II-ah mark 40 hmu pha awm mahse an pel tam lo khawp mai, hei hian Mizo subject la te a ti hnualin lak an chak loh phah hle a, mahni tawng (Mizotawng) a hlutna tihsan leh humhalh  a tul tehreng nen a pawi tak tak a ni. Miin a subject a thlan tawh chuan a mark hmuh ang ang kha a chan pual a ni ve mai. Mahni beisei aia mark hmu tlem tam tak an awm a, helai mark an siam dan chung chang pawh hi en fiah a tha hle bawk.

Ration kham lo
Ration buhfai a tlem lutuk tiin Sorkar kan puh thin a, mipui leh sorkar hian kan tih tur kan tih loh te, kan tih loh tur kan lo tih thin te a awm ve mai thei. Tunlai hian Bru lak kir kan buaipui hle a, kan sorkar hotu lam tawngkam atang pawhin Central beng thleng phak khawpa an buaipui tawh thu kan hriat kha. Raltlan an ni a, kan buaipui pawhin kan hna a ni, kan ram mi leh sa an nih phawt chuan. Nimahsela Central Sorkar pawh ka demin, Mizoram sorkar hian hma a la ve lo nge kan state pawn atanga raltlan lo lut a sing tel hi an inthiar chhuak ve tlat lo. Hman kum lawk khan chi leh chi in tihbuai avangin kan thenawm state atangin mi tam tak an rawn tlan lut a, kan ram chhung District hrang hrangah in bengbelin awm hmun an khuar a, heng mi tam tak te hi vote zawn nan ID card leh ration card siam sak an ni. Engtin nge kan ram budget, kan Ration buhfai te hi kan kham tehreng ang le, min ei ral puitute hi kan ram mi pawh an ni lo a, Bru kan ko kir ang hian an awmna State-ah an kir leh tur a ni. Sorkar leh NGO’s hrang hrang hian hma in lak loh chuan mimala hmalak ngawt theih a ni lova, kan theih tawk chanchinbu a rawn tial mai chauh lo chu.

Central YMA leh MZP te pawh in thanharh a hun ta e, kan ram ngei-ah kan fairel bel min zen puitute an tam tak avanga kan ration dawn tur kan kham ta lo lutuk hian thawh harh a hun tih kan hriat a tul. Kan Supply Minister leh Director te pawh hetiang kawngah hian thangharh se, Zoram tan ke i pen tlang ang u.

A tawp berah chuan hetiang lama ram leh hnam vei tam tak in awm tih ka hria a, he ka thu ziak hi a diklohnaah sawiselin kawng tha Mizo mipuite tan in rawn chhawp chhuah ka duh hle mai. Tihdam aiin inven a tha zawk tih kan hriat angin heng kan ram tana pawimawh nia kan hriat kimchang lo takte hian thuneitu leh hma la thei zawkte au ei sela, mipui pawh tangrual ila, a rang lama hmalak a ngai. Kan ram leh hnam tan i thawk tlang teh ang u.

Thulakna: Vanglaini