Kau Tlabung leh Tuipanglui PIL Principle Bench-ah Transfer

- Vanlalruata Pachuau

Vawiin dated 7th March, 2011 hian Gauhati High Court, Aizawl Bench-ah Kau-Tlabung leh Tuipanglui Mini Hydel Project chhuina chungchanga Prism in PIL an thehluh chu hearing neih a ni a. May thlaa Principal Bench, Guwahati-a ngaihtuah nawn leh tura tih a ni.

Kau Tlabung leh Tuipanglui Mini Hydel Project thawhnaah mipui sum nasa taka tihchingpen anih avangin October 3, 2008 khan Prism chuan Anti Corruption Bureau, Mizoram hnenah FIR an lo thehlut tawh a. He case hi uluk taka chhui anih hnuah Vigilance Department chuan criminal case ni ngeia ngaiin May, 2010 khan ACB te chu criminal case ziaklut turin thu a pe a. Hemi case-a mawhphurtu Engineer 13 te chuan anticipatory bail te an dil chuk chuk a ni. Mipui sum chheprelh leh tichingpentu te chungchangah hian sorkarin action a la ngei dawn nia ngaih anih laiin a chhan pakhatmah sawi lovin criminal case hi withdraw turin July 2010 khan sorkar chuan thutlukna a siam leh thut a. ACB te pawh criminal case an buaipui lai titawp nghal turin July 2, 2010 khan hrilh an ni a. Hetianga thil a awm takah hian Prism chuan, mipui duhdan tihhlawhtlin anih theihnan, Gauhati High Court, Principal Bernch-ah August 2010 khan PIL an file a. He PIL hi Principal Bench chuan ngaihtuah zui lovin Aizawl Bench-a file turin Prism hi hriattir an ni a. Hemi bawhzui hian Prism chuan Aizawl Bench-ah PIL hi an file leh a ni.He PIL hi October ni 10, 2010 khan High Court chuan a lo hnawl sak a. PRISM chuan Restoration Petition an file leh a. He Restoration Petition hi February 15, 2011 khan High Court chuan a admit a.Vawiin hian hearing neih leh niin Court chuan thuremna siam nghal lovin ngaihtuah nawn leh turin a ti a. May thlaah a tira Prism in PIL an file a, ngaihtuah theih lohna Principal Bench-ah ngaihtuah a ni dawn a ni.

Kum 2005 atanga thawh tan Kau Tlabung leh Tuipang lui Hydel Project hi original estimate leh thawh zawh nana senso a inthlau nasa hle. Kau Tlabung hi Original estimate chu Rs 21,80,78,000 a nih laiin, thawh zawh a nih meuh chuan Rs. 32,08,73,890 sen a ni a, Tupanglui Hydel Project pawh a original estimate Rs. 9,41,31,000 a nih laiin, thawh zawh nan chuan Rs. 36,76,00,000 hman zawh a ni a. He sum hman dan rinhlelhawm tak tak hi ACB in chhui zo vek tawhin a mawhphurtu-ah pawh PWD leh P&E engineer 13 an puh fel thlap tawh a ni.