KUMPUAN BAWHZUI DAN TURAH YMA LEH POLICE AN INRAWN

THE ZOZAM TIMES : Vawiin (17.2.10) khan Aizawl SP Office-ah Central YMA hnuaia Kumpuan Sub-Committee te leh Police Officer ten YMA kumpuan 'Khawtlang Nun Siamthat' chungchanga hmalak dan tur 'Kaihhhruaina' thlirin inpawh zawk leh thawhhona tha zawk a awm theih dan turte an sawiho.
 
Aizawl SP Lalbiakthanga Khiangte chuan YMA-in kum-puan bawhzuia hma an lak dan tur chungchangah hian fimkhur a pawimawh thu sawiin, a bik takin ruihhlo chungchangah ruihhlo leh zu te an man thei vek tih a sawi a. Hetih rual hian heng ruihhlo ti thinte hi an taksa a derdep tih erawh hriat tel a tul thung, a ti a. Hetiang mi man an nei a nih pawhin rei tak an tan kawl a remchan loh thu leh, hetiang mite buaipui kawngah Police te chu an inhuam thui hle tih sawiin, khawtlang nun siamthat kawnga an hmalaknaah hian Police lam pun uar lehzual turin a chah bawk.

Ruihhlo chungchangah hian a neitu hriat loh thil man a nih ve fo avangin, hetiang kawngah hian tlawmngai pawl chauh ni lo, Police te ngei pawh hmingchhiat mai theihna a awm thin avangin fimkhur a tul hle a ni, a ti a. Hotu leh hruaitu lamte felin rintlak viau mahse, a nawlpui zingah thil felfai tawk lo a awm theih avangin dan lam kengkawhtu Excise hnenah a rang lama hlan thin tur te, Excise lam an remchan loh lai a nih pawhin hemi lo buaipui kawngah hian Police te pawh an inhuam hle tih a sawi.

Aizawl SP chuan YMA Kumpuan bawhzuina-ah chhia leh tha hriatna tluang pangngai taka an hman chhung chuan chetsual emaw kal sual palh emaw an neih a rin loh thu a sawi a. Police leh mipui (public) inrintawnna a pawimawh ber a, a bikin hawhaw-a thiltih nikhua leh crime lianthamah phei chuan thawhhona hi a pawimawh a, VC te pun thiam a pawi mawh bawk, a ti
 Central YMA Vice President, Kumpuan Sub-Committee Chairman ni bawk chuan ruihhlo a tam chuan crime a pung lo thei lo a, Zoram hi a ke a lo bai deuh a nih pawhin a la zeng em lo a, chhanchhuah theih a la ni tih chu YMA te ngaihdan a nih thu a sawi a. Police lamin kumpuan bawhzuina kawnga hriat tul leh tha an tih an sawichhuahte chu YMA member lamah a tam thei ang ber lo inhrilhhriat an tum tih a sawi bawk.

He joint meeting hi Central YMA, YMA Kumpuan Sub-Committee Chairman-in kaihruaiin Police Officer leh Kumpuan Committee atang hian an ngaimawh leh ngaihpawimawh zawngte inpawh takin an sawiho a ni.