Kumtin Ramngaw Nuai 31 Hu A Kang Chhia : H.Rohluna

Mizoramah kumtin ramngaw cheng 31,16,535 hu a kang chhe thin niin Environment & Forest Minister H.Rohluna chuan a sawi a. ‘Kum 1995 atanga 2010 inkar chhung khan kumtin ramngaw hectare 6148.97 a kang thin a ni,’ a ti bawk.

Kangmei laka fimkhurna hapta ‘Fire Prevention Week’ hawnna inkhawm nimina I & PR Auditorium-a buatsaihah H.Rohluna chuan, India ram pumpuiah ramngaw-in 21.02% an awh laiin, Mizoramah chuan 91.27% an awh thei tih a sawi a. He-tihrual hian India ram pumah rambua (ram tha lo) 8.77% a awm laiin, Mizoramah chuan a ram zau zawng atanga chhuta 60.98% zet chu rambua a nih thu a sawi bawk.

‘India rama ramkang 90% vel hi mihring hal palh a ni a, Europe ramah chuan 95% vel hi tek vang te, thing innawt vang te leh chhan hrang hrang vang a ni a. Mizoramah chuan 100% hi mihring tihkan a ni,’ H.Rohluna chuan a ti bawk.

‘Ram kang chuan lei thatna a tichhia a, micro leh macro nutrients te a ei ral thin. Ramngaw hian ruahtui 20-25% vel hi lei hnuaiah a hip lut a. Ram a kan chuan ruahtui hipluttu a awm lova, a luang ral mai thin. Ram kang hian boruak bawlhhlawh (pollution) a siam a, boruak a tilum a, global warming a siam thei a ni,’ Environment & Forest Minister chuan a ti.

Ram tikangtute chu, The Mizoram Forest Act, 1995 hmangin thla 6 Lung In tan a, cheng 500 chawi tir theih an nih thu minister chuan sawiin, ‘India Constitution Article 151 chuan ramngaw leh nungcha hum-halh hi khua leh tuite tihturah a dah a ni,’ a ti bawk.

Kangmei laka fimkhurna haptahawnna inkhawma khuallian Chief Minister Lal Thanhawla chuan, ram tikangtute chu an damchhunga an tih -nawn tawh lohna tura hmun leh hmuna ‘chapchar’ nghal mai thaa a hriat thu leh, a na thei ang bera hrem a duh thu a sawi a. Ram kang ven chu mitin mawhphurhna a nih thu a sawi.

‘Ram leilung fa ni lo, Zohnahthlak ni si ten nasa takin min rûn a, bank chhe mite leh thil dang dang hmangin min rûn a. Ram kang chungchangah pawh heng mite hi an nghal hle. Ram leilung fate hi hetiang mite lakah hian kan inven fimkhur a tul hle a ni,’ Chief Minister chuan a ti.

‘Pi leh pu mawl zawka ngaih te khan ram tihkan hlauin theihtawp an chhuah a, tunlaiah erawh chuan mei kawng sat tha peih pawh an awm tawh lo. Chuvang chuan sorkar thu awih a kan kal chuan ram kang hi nasa takin a pumpelh theih a ni,’ tiin Chief Minister chuan a sawi bawk.

Fire Prevention Week hi February ni 7 atanga ni 12 chhung hman tur a ni a, nimina hawnna inkhawmah hian MLA, Parliamentary Secretary, tlawmngai pawl aiawh leh sorkar mi pawimawh engemaw zat an tel a. District dangah chuan Thawhtanni khan he week hi hawn a ni tawh a ni.

=====

Forest Survey of India, 2009 in a tarlan dan chuan kum 2006-2007 chhung khan India ramah Mizoram chu ram tikang nasa ber a ni a, ram kang 2,733 a awm a, Andra Pradesh chu pahnihna niin 1,931 ram a kang a, Sikkim-ah chuan vawi khatmah ram a kang ve lo thung a ni.

Mizoram Economic Survey 2009-2010-in a tarlan dan chuan Mizoram chhung sq.km 19,240 hi ramngaw a ni a. Hemi chhungah hian damdawi atana hman theih thlai (medicinal plants) 400 vel zet awma ngaih niin, heng zinga 62 te hi hmuhchhuah thar (new medicinal plants) an ni. Mau chi hrang 22 awmin, Mizoram ramngaw a 14% chu Mau a ni.

Thulakna: The Zozam Times