District Khawpui thlunzawm tur Helicopter Service buaipui mek
Wing Cmdr. Lalzawma, Principal Consultant, Aviation Wing chuan, ILS atan hian test flight pawh thlawhna hrang hrangin an nei tawh tih sawiin, hman theih a nih tawh thu a sawi a. Amaherawhchu, AAI in ILS nena hmankawp theih tura a duan, ‘Precission Approved Path Indicator’ (PAPI) chu vuah leh a tul bakah a angle inanga dah a ngaih avangin a vuahna hmun te sawn leh a nih thu The Zozam Times a hrilh.
ILS hi thlawhna pathum vel-in an hmang chhin tawh a, a that thu an sawi vek a, nimin pawh khan thlawhna thenkhat chu test tir leh an ni.
ILS bun fel a nih chuan AAI hrilh an ni ang a, anni chuan Director General of Civil Aviation, Govt. of India an hriattir leh ang a, ani chuan airport tinah ‘notification’ chhuah-in Lengpui Airport-a ILS chu a hman theih tih a puang chhuak dawn a, hei bakah hian International Civil Aviation Organisation (ICAO) hnenah pawh notification hi a pe bawk ang, ‘Ni 10 chhung vel leka chinfel theih mai a nih a rinawm,’ tiin Principal Consultant chuan a sawi.
Hei bakah hian Lengpui Airport tih chang-tlunna tura ruahmanna awmsa chu bawhzui mek a ni bawk a. Runway tih sei belhna tur te, khawl thar vuahna tur atan te DoNER Ministry-ah Rs. vaibelchhe 55 dil mek a ni.
He pawisa hi hman theih a nih hun chuan ‘Doppler Very High Frequency Omni Directional Range’ (DVOR) pawh Hmunpui Tlangah bun tum a ni bawk.
Saitluk-a Airport siam tum mekah Project Report leh Survey neihna turin Planning Department kaltlangin North Eastern Council (NEC)-ah Rs. vaibelchhe 1 dil mek a ni bawk tih Principal Consultant chuan a sawi a, Kawmzawla Airport siamna tur Detailed Project Report (DPR) chu peih a ni tawh tih a sawi bawk.
District Headquarters tan Helicopter Service
Mizoram District Headquarters pariat thlunzawm turin Helicopter Service neih theih dan tur chu Aviation Wing-in a buaipui mek a. Tunah hian New Delhi-a hmunpui nei Pawan Hands te nen indawr mek a ni. He company hotute hi tunkar ningani hian Aizawl-ah an lo kal dawn a, a hmunah thil awmdan an enfiah dawn a ni.
Thudawnna in a sawi danin Pawan Hands te hian North East State hrang hrangah tunah hian Helicopter Service an operate mek. Pawan Hands hi private company ni lovin Govt. of India Undertaking an ni.
“Pawan Hands hian an operate theih dawn chuan tender chhuah hranpa a ngai lova, anni hi an remchang lo a nih chuan tender hi la chhuah leh tur a ni,’ tiin Lalzawma chuan a sawi.
Tender chhuah a nih a, Helicopter service hi mumal taka kalpui theih a nih chuan Central sorkar hian 75% subsidy a tum sak thin niin Principal Consultant chuan a sawi bawk.
Thulakna: The Zozam Times