Lengpui Airport-ah Thlawhna A Chesual

North East Shuttle, Imphal atanga thlawk chhuak chu tukin dar 10 (4/5/11) leh minute 42 khan Lengpui Airport a a tum tur a chesual a, vanneihthlak takin thi leh hliam na tak an awmlo.

He thlawhna, mi 9 phur thei chi Cessna Caravan  hi Runway tawp atanga metre 200 zeta hla, Mamit Phaileng panna kawngpui bula kawrah a tla thla a. Kawr thuk zawng hi Runway bul, Instrumental Landing System Antenna bunna atanga tehin meter 28 a thuk a ni a. Thlawhna hi a chhe hneh hle a, kangmei erawh a chhuaklo hlauh thung. Thlawhna tum dawn hnaih a Met Report, Airport atanga dar 10:30 am a lakah chuan visibility 2kms a ni a, hetiang thlawhna te chi hian tum turin visibility 3.6 kms vel a mamawh a ni. Thlawhna zang tak chi a nih avangin thli (surface wind condition) in nasa takin a khawih danglam thei a. A tum dawn hnaih hian thli tleh chak zawng (wind speed) a sang hle a, 12-14 Nautical Miles per hour vela chak a ni a. Thlawhna atana chhum hlauhawm ber chi CB Cloud (Cumulus Nimbus Cloud) chu hmar lam atangin thli hian a rawn chhem phei bawk niin a lang. Runway a tumna tur chu Pilot hian thui tak a tlan pela, tiding zo tawh lovin a thlanga kawrah a tla thla ta a ni.

Vanneihthlak takin he thlawhna a chuang mi pakuate hi an him  vek a, Pilot kum 22 mi Captain Saurajit Yadav pawhin hliam a tuar lova. An zinga mi pahnih Pi Zomawii (Pu P.L Thanga, Member Secy. State Planning Board thiannu) leh Pi N.C Thangvungi, Ramhlun Venglai chu Lengpui damdawiina dah an nih hnuah Ambulance in Aizawl Civil Hospital panpui an ni a, ngaihtuahawm erawh an ni lo. Passenger dangte pawh Lengpui damdawi in panpui an ni a, an hliam tawrh a nasat loh avangin Aizawl lam panin an haw leh vek a ni.

Naktuk May ni 5 a hawn tura ruahman Instrumental Landing System (ILS) Localizer Antenna chu vanduaithlak takin thlawhna hian a su chhia a. Antenna 20 bun zinga 2 chu a su chhe hneh hle. Principal Consultant, Aviation Wing, Wg. Cdr (Rtd.) Lalzawma sawi danin ILS siam tha tur hian hun rei tak a duh dawn a. Siam that a nih hnuah pawh Director General Civil Aviation (DGCA) hnen atangin hman phalna a thara lak leh a ngai dawn a ni.

Thlawhna chetsualna hmunhma leh thlawhna chhia hi DGCA atangin a enfiah tur an lokal hma chu khawihsawn phal a ni lo.

Mizoram sorkar chuan he chetsualna a thlen thu a hriat veleh rang takin a hmunah Transport Minister Pu PC Zoram Sangliana, MLA Pu K Liantlinga, Member Secy. State Planning Board Pu PL Thanga IAS (Rtd.), IGP Pu L. Hrangnawna IPS,  Wg. Cdr (Rtd.) Lalzawma leh Aizawl SP Lalbiakthanga Khiangte an tlan thla nghal a. Minister chuan vanduaina a thleng chu pawi a tih thu sawiin hetiang harsatna lo thleng thutah kan himna turin mipui ten dan leh thupek kengkawhtute thu kan ngaihchan thiam a pawimawh hle a ni, a ti a. Tun tum thil thlengah dan leh thupek tha taka kenkawh a ni  chu lawmawm a tih thu a sawi bawk a ni.

He thlawhna a chuang mi pakua te  hming chu:

 1) C.H. Haleni, Imphal, kum 25 

 2) HB Hari, Imphal, kum 62

 3) A. Rabindra Singh, SIB, kum 29

 4) NC Thangvungi, Ramhlun Venglai, kum 35

 5) Camillie Lalnunfeli, Ramhlun Venglai, kum 9

 6) Kimboi, Imphal, kum 20

 7) David Lalhmangaiha, Chaltlang, 32

 8) Pi Zomawii, Chaltlang, kum 60

 9) S. Haokip

Thulakna: DIPR