MAHNI DINHMUN IN HRECHIANG APIANG MIZO AN NI THIN - R. Lalzirliana

12/02/2010 21:04

-Zothankunga, IPRO

Mahni dinhmun in hrechiang apiang mi zahawm an ni thin a. Eng dinhmunah pawh ding sela mahni dinhmun leh mawhphurhna hriatchian hi thil pawimawh ber chu a ni. He thu hi Home Minister Pu R. Lalzirlianan vawiina Mizoram Government Driver’s Association General Conference vawi 23 na Chanmari YMA Hall-a a hmanpuina a a sawi a ni.

Home Minister chuan Mizoram sorkar driver te chu an dinhmun leh an mamawhte sorkar-in a hria a. Remchang leh a theih ang apiangin an hamthatna pawh a ngaihtuah sak thin a, an thil phutte awlsam taka tih hlawhtlin chang a awm lo a nih pawhin dawhthei taka nghak thiam thin turin a hrilh a ni. Driver-te mawhphurhna pawimawh zia tarlangin dan leh thupek kenkawhna ah te sorkar mi pawimawh an duhna hmun leh huna hruai thlengtu an nih thin avangte in an dinhmun hrechiang turin a hrilh a. Sorkar driver-te zingah mi hlemhle leh pamham pu te pawh bum duh workshop bill thlenga a hleihluaka che thin te hian an pu te mi rinawm tak tak hmel an ti bal thei a ni tiin dikna leh rinawmna nena hna thawk te chu an kham khawp Pathianin a pe tho tho thin a ni a ti a. Chuvangin sorkar driver-te phei chu ram leh hnam siamtu mi pawimawh tak an nih avangin rinawm leh taima taka hnathawk turin a chah a ni. Ram siam hna hi politician leh tlawmngai pawl, sorkar mi pawimawhte tih tur nilovin mipui mimir driver te thlenga kan thawh tlanna vek tur a ni Home Minister chuan a ti.

Vawiin MGDA General Conference-ah hian an pawl inrelbawl dan chungchang engemaw zat an rel a. 6th Pay thar lak an duh chungchang leh Voluntary Retirement Scheme Mizoram sorkar-in a ruahman sak chu Home Department pawh huam tir nise an duh thu an rel a. An pawl hruaitu thar an thlang bawk.

Thulakna:DIPR

Back