Malaysia-ah Sawm Loh Khual Lian leh Khual Zahawm

Ni 27-31, December 2010 khan Malaysia Mizoten sawm loh khual lian leh khual zahawm an mikhual. Singapore leh Malaysia fang (23-31/12/10 ) Mizo ziakmi zinga mipui ngainat, midang thlir dan lo deuh, a pang leh lam aţanga chhuia awmze nei ţha taka hnam leh khawtlang siamţhatna lam hawi ziaktu, Lengzem chanchinbu neitu leh editor, Mizo television network Zonet neitute zing ami – Vanneihtluanga, a nupui Lalawmpuii, Biakhluni, Jt. Director, Accounts & Treasuries, Ngurchhingi sumdawn leh rawlthar pakhat te chu Malaysia Mizo Christian Fellowship pastor pahnih, president, secretary leh midang pahnihin bus chawlhhmunah lawm takin an lo hmuak. An thlen ni ni 27 tlaiah MCF hruaitute leh mikhualte chuan Bukit Bintang Mizo Quarter-ah chawhlui an kilho a, a zanah Baptist biak in, Kuala Lumpur-ah sawm loh khual lian leh khual zahawm lawmna inkhawm an buatsaih. He inkhawmah hian mi 75 vel an pung khawm a ni.

Vanneihtluanga te thianza leh Malaysia Mizote inkawmhona inkhawmah hian Rokunga hlate tui takin an saho a, an zaithiamten Zoram Ngaih Hla, Khampat Bungpui, Duhaisam leh Pheilai I Vawr Ang U hlate sain, mipuiin an zui dual dual a, amah Vanneihtluanga’n Malaysia Mizote hnenah fuihna thu a sawi. Zawhna leh chhanna hun rei tak an hmang a, Malaysia Mizoten Mizoram an hmuh dante pawh an sawi nasa hle.

Ni 28 zanah Chhaktiang Zofa Zirlaite, Malaysia member-te’n Vanneihtluanga te nupa hi chawhlui an kilpui a, zawhna tam tak an inzawt a, an hlim tlang hle.

Mizo mi chhuanawm pakhatin Malaysia a tlawh leh inkawmhona neih a ni hi Mizo Christian Fellowship, Malaysia chuan lawmawm a tiin, Mizo kalsiam kawngah hmasawnna engemaw tak a hrinchhuah a beisei. Amaherawhchu, mipui pun khawm tam theih hun – Kristmas ni an hmanpui hman lo erawh pawi an ti hle (2010 Kristmas khan KLBC-ah Malaysia Mizo 500 rual zet inkhawmin, Krismas ruai an thehho thei a ni.). Mizo khawvela mi chhuanawm tak takten hetianga Malaysia Mizote an kan ta zeuh zeuh hi Mizo Christian Fellowship chuan lawmawm a ti a, a thla a muang hle a ni.

Amah Vanneihtluanga chuan he Malaysia an cham chhung hian anmahni lam aia Malaysia Mizote lam chanchin a tam thei ang bera hriat leh chhinchhiah chu Mizoram tan a hlu dawn nia a hriat thu a sawi a, Zonet atanga Zoram mipuite thlir atan Malaysia leh a chhunga cheng Mizote nun leh khawsak thahnem tak chhinchhiahin a khung tha a ni.

Vanneihtluanga te nupa leh an thian 3-te hi ni 31 December 2010, Zirtawpni tlai-ah Mizoram lam panin Malaysia an chhuahsan.

Vanneihtluanga an zawhna leh a chhanna ngaihnawm tak pawh ka rawn tarlang leh thuai dawn nia...