Mi Hausa Tawntaw General Than Shwe-a

Kawlram sipai luber Gen.Than Shwe-a leh a chhungte hian US dollar maktaduai sanghnih (2 million) an nei niin kawlram chhunga ram dang palai (ambassdor)te chuan Yangon-a Germany ram aiawh palai in-a an inhmuhkhawm tumin an sawiho tih,  Europe ram palai pakhat chuan Myanma Wikipedia-ah a tarlang. (US Dollar Maktaduai 2,000 chu kawlram pawisa  chuan chhiarsen a ni lo)

Kawlram nena sumdawnna thila inzawm ber ram (ram hming tarlan loh) palai chuan, Kawlram sipai luber leh a chhungte hi dollar maktaduai 2,000 aia tlem lo neiin an hausa hle ang tih a rin theih dan a sawi a. Kum 2004-a Gen. Khin Nyunt-a an man hma khan dollar maktaduai 400 vel neia rin a ni a, chung a neih zawng zawng leh Khin Nyunt-a kaihhruai mi dangte neih zawng zawng a laksakte bakah sumdawng mite hnen atang hian sum leh pai hi a surin a sur a ni ber a, chuvangin mi hausa tak a ni tawh ang, tiin an sawi.

Kawlram lal ber pui rauh hian kum khatah maktaduai 300 vel a lak lut laiin mi naran chuan  kawlramah  kum khatah maktaduai chanve (nuai 5)  pawh an la lut lo hrim hrim. Pu Than Shwe-a hian Singapore, China, Malaysia, N.Korea, Vietnam, Rusia, Uganda, Banglades leh Abram ram hmun thenkhatahte sumdawnna hmun pawimawh tak tak a nei a, Ugadan ramah ralthuam lam leina hmun lian tak a nei bawk. UAE ram Dubai khawpuia  super market thenkhatah sumdawnna lam a nei nual a. Singapore leh China ramah pawh in lian pui pui leh hmun zau tak tak a nei tih hriat a ni bawk.

Kum 20 chhung meuh Kawlram hausakna zuk a, duh tawka nuam tawl, khawngaihna leh leinatna pianpui map lo, mahni duhna leh hlawkna chauh ngaihtuahtu he mite chhungkua hi engtiang takin nge an hauhsak tih hi tuma hriat phak a ni lo. Kawlram chhuak lunghlu, rangkachak leh oil chi hrang hrang man atangin sum an la lut tok tok a, an leihbaw hiau hiau a ni ber. Chutiang zelin kumtinin leilet pa leh mi rethei te tein an thawhchhuahte chu an chhungkaw fairel belah a luang lut zel a, chu mai duh tawk lovin Tainn hmue (commander) te, Wun Gyee (minister) te, Myot dor wun (Mayor) hnen atangin thamna leh tlawnna pawisa a luanglut hum hum reng bawk.

Ram lal berin silai hmanga mipuite a rahbeh tlat avangin duh tawkin lal an hrawt lo thei lo va, mi retheite chan ai an hui zo va, a nei leh thiltithei apiangin an vur belh zel bawk a ni.

(11.1.11 Thuriya Journal)

Thulakna: MCF Palai, 16th January 2011