Kum tinin thiamna nei nau chhartu(expert) puihna lova nu maktaduai 48 (48 millions) velin nau an hrin avangin, nausen maktaduai 1.3 (1.3 millions) an thi thin, niin UK charity Save the Children chuan a tarlang.
Nu pathum zinga pakhat zelin thiamna nei nau chhartu puihna tel lovin nau an hring a, ni tinin nu 1000 leh nausen 2000 te chuan puihna tha dawn loh vangin nunna an chan thin. Khawvelin a mamawh thiamna nei nau chhartu (midwife) 350,000 chher chhuak belh ta ila, kum tinin nausen maktaduai 1 chuang nunna kan chhanhim thei dawn niin UK charity Save the Children chuan a sawi.
Save the Children chuan nausen piang hlim thihna chu ram rethei-ah a zual hle a, malaria natna vanga thi aiin oxygen thlak chham leh thil dang tlak chham vanga thi an tam daih zawk niin a sawi a, thiamna nei nau chhartu(midwife) chher belh kawngah khawvel ram hruaitute tan la sauh sauh turin a nawr.
Pumpelh theih he nausen thihna hi Afghanistan-ah a thleng nasa ber a ni. Afghan hmeichhia sawm pakhat-ah pakhat zel chu an rai lai leh fa an hrin laiin thihna kawr ruam zawh thei dinhmun hluahawmah an ding a, naupang panga-ah pakhat zel chu kum 5 an tlin hmain an thi thin. Nausen 1000 zingah 52 chu an pian hlimin an thi thin. Afghanistan-a nu, nausen leh naupang thihna tam ber chu an hnam nunphung leh sakhaw dan zui (practice) vanga thleng a ni.
Thiamna nei nau chhartu (midwife) indaih lohna hi ram rethei-ah a nasa zual hle. Entirnan: UK-a nau hring zawng zawng 1% lekin thiamna nei nau chhartu puihna tel lova nau an hrin laiin, Ethiopia-ah chuan nau hring zawng zawng 94% zetin puihna tel lovin nau an hring a ni! Tin, UK-ah kum tin nausen 749,000 vel an piang a, thiamna nei nau chhartu 26,825 vel an awm. Rwanda-ah erawh chuan kum tin nausen 400,000 vel an piang a, thiamna nei nau chhartu 46 chauh an awm thung!
UK charity Save the Children chuan, “Nu tam takte tan chuan nau hrin hi thihna hlim kawr ruam zawhna a ni. A nihna takah chuan nau hrin hi hlimna ni a ni tur a ni. Thi nghal mai tura piang nausen pakhat mah an awm lo,” tiin a sawi.
Thulakna: Save The Children-UK, BBC