Mimi Renthlei leh Mark Varte te’n ‘Tiam Tlat E’ ti dawn!

Thenkhat tan chuan hun liam chak dam em em hi hrilhfak a nih laiin, Mark Lalthanliana (MCS) BDO, Reiek RD Block leh Mimi Renthlei te tan chuan hun hi a kal muang mah mah a nih paw'n a awm lo hran lo.

April thla tawp emaw May thlatir khian Mission Veng Biak In-ah Koh-hran Dan thianghlima 'Tiam tlat e' ti turin thu an thlung fel ta a, 'Tur ni pui kal lai a chawl em ni' ti-a hun leh ni inher chhuak muang lutuk chu an tan sawitham lo tling teh reng pawh ni se, a awm hliah hliah bawk.

Mark-a hian thian atan Serchhip DIO, Andrew Lalremruata a hmang dawn a, Mimi hian naupangte a nih lai atanga a kawmngeih em em leh a second cousin ni bawk, Malsawmdawngliani (Madawngi) Kanan veng chu Mo thian atan a hmang ang. Madawngi hi naupangte an nih laia 'Pasal ka neih hunah ka thian tur a ni’ a lo tih thin a ni nghe nghe a, tunah hian a tak ram an hnaih ta hle a ni.

-----------

Mipaa ka duhthusam chu amahah hian a awm kim biai ni maiin ka hria!

 ----------

 A bula awm hi a nuam a, mi enkawl dan a thiam bawk. A nihna takah chuan amah zawk hian min enkawl ni maiin ka hria!

---------

Engtia intawng nge in nih le?

Mimi Renthlei: Kan inhmuh hmasak ber chu 2008 khan a ni a, Bangalore-a an hna pawimawh vanga an lo kal khan a ni. Chutianga inhriatna pawh kan nei lova, inbiak zuina pawh a awm lova, Aizawl-ah zawk hian boruak a awm tan zawk a, nikum atang khan kan inhre chho tak tak a, kan inzui ta chawt mai a ni

Mark Varte: Mimi-i unau nu hian min inhmelhriattir a, kan office-a thawk a ni nghe nghe a, zaithiam a ni tih ka hria a, a bak han hriatchianna em em ka nei hran lo. A bula han awm tâkah chuan a lo fel em em mai a, a hlim thei a, sawiselna tur engmah ka hre lo.

A mizia leh i duh em emna chhan?

Mimi Renthlei: A fel em em a, mihring puitling a ni a, 'Gentleman' an tih ang chi hi a ni. Mi a zahthiam a, min ngaihtuah thei em em a, a 'caring' em em bawk a, mipaa ka duhthusam chu amahah hian a awm kim biai ni maiin ka hria. Min duh leh min hmangaih em emna chhan hi (Hetah hian a tawp thut a, ‘Amah zawt la, a hrechiang zawk ang' a ti zet hman). Keimah ka nih avangin min hma-ngaihin, min duh niin, ka hria.

Mark Varte: A unau nu-in min biak sak hnu hian kan inkawm hmasa a, sawi tawh ang khan, zaithiam pangai ve mai nia ka lo ral hriat kha, a tak takah pawh a zaithiam em em a, a fel a, mi hlim thei tak a ni a. A bula awm hi a nuam a, mi enkawl dan a thiam bawk. A nihna takah chuan, amah zawk hian min enkawl ni maiin ka hria. (An pahnih hian kum 11-in an inthlau a ni)

Ni ropui (Big day) lo thleng tur chu i nghakhlel hle tawh lo maw?

Mimi Renthlei: (A nui hmasa te te a) Ka nu hmel ka en hi chuan pasal neih hi a huphurhawm thin a, mahse A hmel hmuh erawh hi chuan a hun hi lo thleng thuai thuai se ka ti.

Mark Varte: Hun hi a liam chak lo riau mai a, engpawhnise, nghakhlel takin, 'big day' lo thleng tur hi kan nghak tang tang a ni ang chu!

Pasal neih hi 'hun' i inti nge ni a, amah nena intawn tak avanga 'hun' i ti zawk?

Mimi Renthlei: Amah nena kan intawn avang hian 'hun' ka tithar thut a ni ber mai. Ni e, hnathawh leh tuizawng buaipui thin ka ni a, 'career oriented' an tih ang hi ka ni a. Zai chungchang a ni emaw, zirna ah pawh nise, nu leh pate'n phai-ah te min dah a, mahni tawka tum nei ve ran thin ka ni. Keimah takah hi chuan pasal neih te hi chu a la lang bik hlo. Nimahsela, Pathianin min inhmelhriat-tir a, tun hi kan lo thleng ta a ni

Zaimi innei an awm fova, i lo rilruk ve reng em?

Mimi Renthlei: Chutiangin, zaimi ka nih avanga zaimi pasal atan neih tih lam kha ka lo ngaihtuah ngai lova, tum em emna pawh ka nei ngai lo.

----------

Nimin zing dar 9:02 khan Mimi Renthlei chuan phur em em mai hian, "Message kha i lo hmu em?" a ti a, "Hman ni-a kan sawi zuai zuai kha tunah chuan kan tifel ta!" a ti zui nghal a. A hlim a, a phur hle tih chu hairual a ni lo. Mark Lalthanliana (Mark Varte) chu, 'Ka thlang tawh che Ainawn, kumtluangin' a ti ta a ni.  – The Zozam Times

@ Mark Lalthanliana leh Mimi Renthlei te hi fanau maltluang chawia hlim ni hmang dun a, Chung Khuanu’n malsawm zel turin Mimi Renthlei Facebook Friend list-a telve Zotui Thiang chuan duhsakna leh lawmpuina a hlan e. – Ed.