Mizo Hlakungpui Mual Bul Tan Dan leh Hmasawn Chhoh Zel Dan

Bul Ṭan Dân leh A Hmasawn Chhoh Zêl Dàn

Kim chang deuh taka ziak chuan ngaihnawm tham a awm ve tawh na a, he Note-ah hi chuan tawi deuh hlek, a tlángpui zawr zawr chauh sawi kan tum rih dawn a. Chhiar tham deuhin, lehkhabua ziak lamah tárlang turah ngai i la.

Bul ṭan dân:

Khawbung Branch YMA Committee ni 13 January 1983 zana ṭhu khawm chuan, tûn hma deuha an lo ngaihtuah tawh ṭhin, hmun hrang hranga awm Khawbung khaw chhuak intawh khawmna leh Khawbung pa, Zofate tana hla kungpui tling Patea leh Damhauhva te lung phun zai an rel a. Amaherawhchu sum lam harsat vang leh chak tawk loh deuh vang a ni mai thei, kum 1984 thleng khan hmasawnna a la awm thei lo.

Kum 1985 a lo her chhuah meuh chuan, Khawbung chhuak Pu B. Lalthangliana, Lecturer, Mandalay University chu an chhungkaw pawimawhin a lo zin hlauh mai a. YMA hruaitute nen inkawm hoin, Khawbung khaw chhuak intawh khawmna siam leh Patea leh Damhauhva lungphun ṭha an tih thu kum thum lai kal taa an ngaihtuah tawh ṭhin dân te an sawi a. Ani pawhin a lo suangtuah ve ṭhin dân leh a lo mitthla ve dân te a sawi ve bawk a.

Tichuan YMA hruaitu ni mek te, hruaitu hlun lo ni tawh te, khawtlâng hruaitute leh parâwn deuh deuh te ko khawmin, ni 19 March 1985 zanah awmze nei taka sawihona neih a ni a. An phur tlâng hlawm hle. Khawbung Branch YMA Committee chu ni 20 March 1985 zanah neih zui a ni a. Khawbung din kum 83-na lawm leh Hla Kungpui Patea leh Damhauhva chawimawina lung phun chu rel a ni ta ruau mai a. A hun atán ni 6-7 April 1986 ruahman chhin a ni a. Hetah hian Khawbung khaw chhuak hmun dang danga chêngte a kim thei ang bera inchah khawm ni se tih a ni bawk. Khawbung Branch YMA kutah dah a ni a, Hlakungpui Mual din kum 1986-a YMA hruaitute chu :

• President          - P.C. Rozika
• Vice President   - Pakunga
•     Secretary          - R. Lalngura
•     Asst. Secretary - Lalthanliana Sailo
•     Treasurer          - T. Vanlalhruaia
•     Fin. Secretary   - R.Limbu

te an ni a. Tlemin hun a kal hret a, tih tûrte a hautak êm avângin hruaitu leh Executive Member a hrana indah ṭhain Branch YMA Committee, ni 18 June 1985-a ṭhu khawm chuan a hria a, hêngte hi a ruat a:

•    Chairman           - F. Zanawla
•    Vice Chairman   - Ricky Laldawngliana
•    Secretaries       - P.C. Rozika

                                        - Lalthanliana Sailo

                                       - R. Lalngura

•     Treasurer         - Dr. Rothluanga
•      Fin. Secretaries - H. Roênga
•      Publication Secretaries:

                              - C. Chawngthangpuia

                              - P. Zahnuna

•      Western Zone - Khawbung Welfare Committee, Aizawl
•       Eastern Zone  - Thangṭhuama

                                         - B. Lalthangliana

Committee Member 51 lai ruat an ni bawk. Hetianga mawhphurtute inruat fel a nih hnu hian, a  theih ang anga inbuatsaih zêl a ni ta.

Thawh khatna 1986:

Branch YMA member-te chuan kawng hrang hrangin sum an tuak a, PWD hnuaia kawng laih te, Health Dept. hnuaia Quarter sak te leh Forest Dept. hnuaia thawh tûr awm apiang thawhte chu a langsar zual a ni a. Tin, hmun hrang hranga awm Khawbung khaw chhuakte pawh an theih ang tawk thawh tûra ngen an ni bawk. Committee ruat angin B. Lalthangliana chuan lungphun pianhmang tûr Artist a ziahtîr chu, lungphuna thu ziak tûrte nen 25 November 1985-ah a thawn a. An lo hmuh hnuin a hmun tûr tûna mi hi Committee-in a thlang fel a. Village Council lam pawhin a hmun zau tawk tak nen pek an lo remti ve bawk. A hmun buatsaiha YMA member rual, khawtlâng leh naupang chena phur êm êm kan han hnatlâng ṭhin te kha, sawi tûr a tam hle; mahse tûn ṭumah chuan i sawi rih lo mai ang.

Tin, Group 4 insiamin Patea hla leh Damhauhva hla pakhat ve vea intihsiak tûrin nu leh pa rualin zan tin hla an zir a. Hruaitute'n an tlawh kual a. An hlimzia leh nuam an tihzia tak kha aw, intihsiak tûr an nih an inhre chang lo! Pu Patea nupui Pi Kaphnuni, Kum 88 chu tel thei lo tûra ngaih vek a ni a. Mahse Tahan aṭangin a lo kal tih A.O. Office tlâng aṭangin mike-in zanriah ei khama an han puan meuh chuan, a khaw pumin an nghing suau tih tûr a ni ber mai. A tawi zawngin, 1986 March thlaah chuan engkim peih fel thawkhat a ni ta.

Patea ruang la tûrin ni 4 April 1986-ah chuan motor 4 kengin, mi 60 dawn lai chuan Samthang an pan a. Se dai theua hnatláng tûr nen an intawk hlauh mai a. Anniho pawh kir lehin Pu Patea fanu Pi Lalauvi in, Samthanga cheng mek inah chuan an sawiho ta a. YMA Branch Samthang hruaitute chuan an ui thu leh an khuaah ngei Patea ruang hi awm hlen se an duh thu thiam takin an sawi a, a ngaihnawm hle. Pu Patea fapa upa ber Pu Lalchungnunga’n, a pa an ngaihsan avânga lawmthu leh, a beisei phak loha ropuia Khawbungah a pa lungdawh an buatsaih thu te thiam tak leh zawldawh takin a sawi dap dap a. Tin, a pa ruang la tûra Khawbung YMA Branch hnena dilna a ziak chu an han phawrh ve bawk a. Ti chuan Samthang YMA hruaitute chuan zah an ngai a, an sawi zui zel ta lo. Hetianga sawiho hian dar 9:45 - 11:45  a awh a ni.

Samthang thlanmuala Patea ruang chu phawrh a ni ta a, dar 11:50 AM vela laih ṭan chu dar 1:30 pm-ah zawh fel a ni a. Samthang V/C thuchhuak angin intiamkamna thu te pawh ziak a ni a. (A hnuaia lehkha hi en la). Ti chuan nalh taka siam kuangah Patea ruang la awm ang angte chu dim taka khungin Khawbung panpui a ni. Hetih lai tak hian Pi Kaphnuni leh a tu leh faten Vaphei an thlen thu hriat a ni a, a hmuak tûrin motor tirh nghal a ni a. An innghah khawm fel hnu chuan Khawbung an pan thla ta nguai nguai hlawm a.

Khawbung khaw chhung an luh chuan, mipuiin puandum sinin a khawnâwtin an lo hmuak a. Patea ruang dahna kuang leh Pi Kaphnuni chuanna motor chuan hma a hruai a, Patea chanchin leh a hla phuah chungchang mike-a sawi zelin, mipui chuan zah takin, ngawi rengin an zui nguai nguai mai a. Hlakungpui Muala Patea ruang dahna tûra siam, a hla phuahna ṭhin lam hawiah chuan thlën a ni a. Inkhawmna tawi tê siamin Pu Zanawla’n a kaihruai a. Pastor R.B. Laitawia’n Hebrai 11:4 chhiarin hunserh a hmang a, Patea ruang chu uluk taka buatsaih Hlakungpui Muala amah chawimawina lungphun thuziak bulah chuan zah taka zalh a ni.

Damhauhva ruang  chu Khawbung khawpui veng thlanmual aṭangin ni 5 April (zirtawpni)-ah phawrh a ni ve leh a. Zing dar 9:05-ah laih ṭan a ni a, dar 10:50-ah zawh fel a ni a. Ruang dahna tûra siam kuang mawi takah chuan zah taka dah a ni a. Nula leh tlangvalte chuan puandum an sin vek a, mipui tam takin Hlakungpui Mual an panpui a; ngawi rengin, zah leh urhsun takin an kal nguai nguai a, Dar 1:30-ah chuan inkhawmna tawi te siamin Pu P.C. Rozika’n a kaihruai a, Envoy (S.A.) Vanramthanga’n hun serh a hmang a, Bible chhiara ṭawngtaia hun a hman hnuin, uluk taka buatsaih Hlakungpui Mual, a hla phuahna ṭhin lam hawi amah chawimawina lungphun thu ziak bulah a ruang chu zalh taka zalh a ni.

A hawn ni :

Hlakungpui Mual thawh khatna chu ni 7 April 1986-ah hawn a ni a, Pu Rokamlova, Education Minister-in a hawng a, Pu F. Zanawla’n a kaihruai thung. Minister chu Aizawl leh Champhaia officer lian tak takte'n an ṭawiawm a. Rev. Lalsawma, Executive Secretary, Mizoram Synod-in hun serh a hmang. Pu R. Vanlawma, Pu James Dokhuma, Pu C. Laitanga, Pu B. Lalthangliana te'n thu an sawi hlawm. Tin, Siampuii Sailo leh Nl. Lalenkawli (Tahan) te'n Patea leh Damhauhva hlate an sa a, mipuiin an ngaithla kham lo hle.

Tin, Patea hla 7 leh Damhauhva hla 7 thlan chhuah, Siampuii Sailo sak Cassettee, ‘Patea leh Damhauhva Hriatrengnate, Khawbung Branch YMA buatsaih, ‘Tuipui Ral Ram’ te, B. Lalthangliana ziak, ‘Patea leh Damhauhva Hnuhmâ’ te chu tlangzarh a ni a. Patea leh Damhauhva te kutziak hla te, thu ziak te, an hmanrua te pho lanna ‘Mini Exhibition’ pawh neih a ni nghe nghe.

A hawnna hi ni hnih (7 & 8 April) hman a ni a. A ni hniha ruai ṭheh ve ve a ni a. Ni khatnaah sial 1, bawng 3, vawk 3 leh ar 5 talh a ni a, hlui 750 velin ruai an ṭheh a. Ni hnihnaah lawi 1, bawng 3, vawk 3 leh ar 5 talh a ni leh a, hlui 696 velin ruai kan ṭheh leh bawk. Hmun hrang hrang aṭanga lokalte chu an vaiin 1,106 vel an tling a, chung zinga 550 vel chu lânga tel te an ni. Tin, Patea leh Damhauhva thlahte hian ranpui pakhat ve ve an thawh bawk. YMA thawh chhuah te, Khawbung khaw chhuak thawhkhawm te leh mimal ṭhahnemngai thawhte chu Rs. 68,000/- vel a tling a, senso nen a inmil tawk vel a ni. Hetiang hun chhinchhiah tlak buatsaih theih a ni hi kan lawm tlang hlawm ëm êm a ni.

Thawh hnihna - 1996:

Hlawhtling taka bul ṭan a nih hnu chuan, a hmun a remchangin a nuam bawk nen, miten an tlawh duh hle a. Khawbung Branch YMA chuan a enkawl hna an chhunzawm a. Kum 1996-ah kum 10 a lo thlen dawn tâkah chuan, kum 10 champha lawm ve ngei an duh a, a tlawhtute'n rawtna hrang hrang an siam leh Branch YMA pawhin zau zawk a kal pui chhoh zel an duhna chuan hmun a chang lian ta hle mai a.Chutachhapah, Khawbung Branch YMA kum 50-na (Golden Jubilee) nên a hun lo innang leh chiah bawk a.  Tichuan ngaihtuahna thuk leh zau zawk neiin, kum 10 dan zelah Thu leh Hlaa Zofate lo chawm ṭhin ‘Mi Bîkte’ seng luh zel tum a ni ta a. 'Hlakungpui Mual' tih chu 'Mizo Hlakungpui Mual' (Mizo Poets' Square) tihin thlâk a lo ni ta bawk a ni. He tih hun laia Khawbung Branch YMA hruaitute chu :

•     President            - P.C. Lalluia
•     Vice President     - F. Zothanmawia
•     Secretary           - K. Laldawla
•      Asst. Secretary  - H. Lalniliana
•     Treasurer           - R. Vantluanga
•      Fin. Secretary    - K. Lalmawia     te an ni.

Kum 1996-a Hlakungpui Mual kum 10-na leh Khawbung Branch YMA Kum 50-na (Golden Jubilee) lawmna turah Branch YMA chuan Committee hran a din ta a, chuta hruaitute chu: 

•     Chairman           - P.C. Rozika
•     Vice Chairman    - Pakunga
•     Secretary          - C. Chawngthangpuia
•     Joint Secretaries:

                              - C. Lalfela

                              - K. Laldawla

                             - R. Vantluanga

•      Treasurer         - P. Zahnuna
•      Fin. Secretary  - P.C. Lalluia

te an ni a, Executive Member 52 lai an awm bawk. Tin, Literature Committee din a ni bawk a. Chungte chu :

•      Chairman           - F. Zanawla
•      Secretary           - P.C. Lalluia
•       Member-te         - 1. B. Lalthangliana

                                            - 2. T. Khumtîra

                                            - 3. C. Chawngthangpuia.

                                            - 4. P.C. Rozika

                                           - 5. K. Laldawla

                                           - 6. F. Zothanmawia

                                            - 7. C. Lalfela    te an ni.

Hla Kungpui Muala seng luh tûrte thlan chungchangah hian fimkhur ṭul hlein Committee chuan a hria a, uluk takin vawi eng emaw zat a ngaihtuah a, ‘Mi Bîk’thlan chhuah dân tûr ‘Teh fung’ (Criteria) hetiang hian a siam a.

1. Mizo hnahthlak zawng zawng a huam ang.

2. An kutchhuak tam (quantity) aiin a hlutna (quality) ngaih pawimawh a ni ang.

3. Hla phuah thiam chu a tlem berah a hla ‘Panga’ tal a nung reng tûr a ni.

4. Thu ziak mi chu a kutchhuak a tlem berah ‘Pathum’ tal a nung reng tûr a ni.

5. An thih aṭang kum 5 (a Ni bikim) a ni tur a ni.

Seng luh tûrte chu lehkha an thiam leh thiam lohah te, an hausak leh hausak lohah te, dinhmun sang an chelh leh chelh lohah te, sulhnu an neih tam leh tam lohah te, an khua te, an hnam leh chite-ah en loin, thliar hranna awm hauh loin, kan tarlan tak ‘Teh fung’ tea innghat hian hnam ro tling kutchhuak an neih ṭhat dânah te enin thlen ṭhin tûra ruahman a ni.

Tichuan, kum 1996-a seng luh tûrte chu, taima taka lo zir lawk mi taimate rawt angin Committee chuan Hla phuah thiam sawm (10) leh ziak mi sawm (10) a thlang ta a.

Phur leh taima takin Branch YMA leh khawtlânga inbuatsaih sauh sauh a. Tichuan ni 4 April 1996 khan chawimawina lungphun tharte chu Pu Hrangthanga Colney, Industry Minister chuan a hawng a. Hemi ni vek hian ‘Tuipui ral Cultural Meet’ neih a ni bawk a, a ti changtlung hle. Tin, Committee ngen angin Hlakungpui Muala seng luh tawhte chanchin ziahna, C. Lalduhawma kutchhuak, Zoram Tuikeplungte tih bu tlangzarh a ni bawk a. Mipuiin ruai kan ṭheh nghal a ni.

Kan sawi hmaih phal hauh loh chu, ‘Khawbung kum 100 Lawmna’  2003 khan neih a ni a. Hemi rual hian Mizo Hlakungpui Muala chawimawite lungphun, lung pangngaia ziak ṭhin kha Edn Minister Dr.R.Lalthangliana leh Pu K.Vanlalauva, Bialtu MLA puihnaa Granite veka thlâk a ni.

Thawh thumna 2006:

Kum 2006 chu Hla Kungpuia seng luh thar leh hun, kum 1996 aṭanga kum sawm a lo ni leh ta a. Khawbung Branch YMA chuan kum 2005 bul lam aṭang khan a ngaihtuah ṭan a, Kum 2006-a hruaitute chu :

•    President          - H.Lalniliana
•    Vice President   - P.C. Lalluia
•    Secretary          - R. Vanlalthluanga
•    Asst. Secretary - C. Vanlalhnema
•    Treasurer           - B. Lalrinpuia
•    Fin. Secretary    - F. Vanlalriana te an ni.

Branch YMA Committee a\ang hian Hla Kungpui Committee ruat a ni a, chungte chu :

•     Chairman             -   P.C. Lalluia
•     Vice Chairman     -  C. Thangchuanga

                                            -  Zaneihmawia

•     Secretary           -  Lalniliana
•     Joint Secretaries-  C. Lalhmunsanga

                                          -  C. Vanlalhnema

                                          -  R. Lalchhuanliana

•    Treasurer           -  F. Ramengmawii
•   Fin. Secretary    -  K. Laldawla te an ni a,                   

Committee Member 30 lai an awm bawk. Tin, seng luh tûrte ngun taka ngaihtuaha thlang tûrin ‘Selection Committee’ atán hêngte hi ruat an ni bawk.   

•    Chairman           - B. Lalthangliana
•    Secretary         - Dr. Rotluanga
•    Member-te        - Dr. R.L. Thanmawia

                                       - R. Lallianzuala

                                       - K. Lalluaia

                                       - H. Roênga

Anniho hian a theih ang tawkin ngaihtuahna an seng a, a duh apiang tan rawtna siam theih a nih thu nitin chanchinbuah te an puang a. Ti chuan rawtna mumal tak siamin Committee puiah an thlen a, annin an lo pawm hnuin chawimawina lungphuna ziak tûr an duang leh a, chu chu Committee puiah bawk an thlen leh a. Annin an lo pawm hnuin lungphunah ziak a ni ta. Tichuan ziak mi 2 leh hla phuah thiam 4 seng luh a ni.

He thawh thumna hawn inkhawm ni 19 May 2006-a  neih chu P.C. Lalluia’n a kaihruai  a. Hun serh Rev. S.Lalhluma'n a hmang a, Pi Boichhingpuii, Director, Art & Culture Dept.-in lungphun thàrte a hawng a, khual zahawm Pu Lalthangfala Sailo, President, Mizo Academy of Letters te, Tahan Literacy Circle aiawha lokal Pu Lalhmingthanga leh Pu Vanlalpêka te leh Pu B. Lalthangliana te'n thu an sawi.

Chawhnu lam chu a bika sawm bus nen meuha ṭhahnem deuh lokal Seminar neih a ni a, Pu C. Chhuanvawra, Vice President, MAL-in a kaihruai a:

Sengluh thar,“Ziakmi pahnihte hnathawh” tih Paper Pu R. Lallianzuala’n,

“Hla Phuah Thiam Pangate Hla Thlirna” tih paper Dr R.L. Thanmawia’n a chhiar a,

ngaithlatute'n ngaihnawm an tiin hlâwk an ti hle. Tlai lamah ruai ṭheh nghal a ni.

Zan lam kal khawmnaah, “HlaKungpui Mual hi” tih thupui Pu Lalthangfala’n a sawi a,

“Lengkhawm leh Mizote” tih thupui Pu Darchhawna’n a sawi bawk.

Hun kaihruaitu P.C. Laitanga’n a thiam a, zaiho a nuam bawk nen, an tuiin an hlimthlang hle a, a ṭangkai bawk a ni.

 Thawhlîna ‘Silver Jubilee’ 2011:

Mizo HlaKungpui Mual tàna hunpui duhawm tak Kum 2011 (Silver Jubilee kum) a lo her chhuak ta reng mai a. Kum 2011 Silver Jubilee Lawm kuma hruaitute chu :

•     President          - H. Lalniliana
•     Vice President   - R. Vantluanga
•     Secretary          - P.C. Lalhmachhuana
•     Asst. Secretary -T. Laltlanfela
•     Treasurer          - B. Lalrinpuia
•      Fin. Secretary   - F. Vanlalriana

Mizo Hlakungpui Mual Silver Jubilee Committee kum 2009-ah din a ni, chung te chu :

•     Chairman            - Dr. Lalrengpuia Chinzah
•     Vice Chairman    - P.C. Rozika

                                           - H. Lalniliana

                                           - P.C. Lalluia

                                           - T. Vanlalhruaia

•         Secretary          - F. Lalrinfela
•         Joint Secretaries - T. Laltlanfela

                                    - F. Lalbiakṭhuama

•         Treasurer          - K. Laldawla
•        Fin. Secretary   - P.C. Lalhmachhuana

te an ni a, Executive Member 50 lai an awm a, Sub-Committee hrang hrang 23 lai siam a ni bawk.

Kum 10 dana seng luh tura ruahmanna lo awmsa tawh pawh chu a boruakin a ur tlu ngang a ni'ang, Silver Jubilee-ah meuh chuan seng luh tur an awm a nih chuan seng luh duhna a lian ta hle mai a. Silver Jubilee denchhena seng luh thar an neih loh chuan 'Khuang lova chai' ang dawn riauva hriatna chuan Committee member tin mai chu a zêm vêl a. 'Dem an hlawh ang' tih an hlauh rilrûkna te chu 'Ami lêng zawng hian âwm an tihpui ang' tih hmangin an hliah-khuh-chawptir a. Committee hmasa-in 'kum 10 dana' a lo tih tawh chu Kum 2006-ah pawh chu thu chu tisaah a lo chang tawh a, a hnu kum 5 lekah 'Committee thu chu committe vêkin a ṭhiat leh thei' tih an theihnghilh lohna chu a lian ta zawk a. Silver Jubilee hlawhtling taka làwm tur chuan seng luh thar neih loh chuan a 'Hlakungpui lo riau ang' tih chu committee huna dingchhuak ve ngam lote pawhin an hmutlang sa ngei ang. Seng luh thar neih tum chuan 'Selection Sub-Committee' chu din a ni ta a,  chungte chu :

•       Chairman           - C.Chawngthangpuia, Khawbung
•       Vice Chairman    - B.Lalthangliana, Aizawl
•        Secretary           - J. Zothangliana, Khawbung
•       Joint Secretary  - R. Lallianzuala, Aizawl
•        Treasurer           - F. Lalrempuia, Awizawl

te an ni a; Committee Member Khawbung lam 3, Aizawl lam 4 ruat an ni bawk. He Committee-in a chhawp chhuah, Committee puiin a pawm tawh ziak mi pakhat leh hla phuah thiam pathumte seng luh tûra tih fel a ni. Hêng seng luh tharte kutchhuak zir chianna Paper buatsaih tûrin heng mi 4-te hi sawm leh ngen an ni a:

·        Zirsangzela Hnamte leh a hla te  - Lalhruaitluanga Chawngte, Aizawl

·        Nuchhungi kutchhuakte              - T.C. Jonunsanga, Lunglei

·        Rev. Thangngura leh a hlate      - C. Lalnunchanga, Aizawl

·        P.S Chawngthu leh a hlate         - Mafaa Hauhnâr, Aizawl te an ni.

Eng zâwl mah ni si lova an lo hriatlâwkna chu a dik hle. A chunga tàrlan 4 (a ding lam ami te khi) an han che chhuak a. Tumahin sum-a an lei kir leh theih tawh loh tur; an thu leh hla mipuiin an han ngaithla kár paha thing buk hnuai a thlifîm fîm takin a rawn chhêm heuh heuh  te, sakhaw mumal nei lo tân chuan an thusawiah chandam ni tura lo inhlân palh an awm mai ang tih hlauhawm khawpa mipui suangtuahna zawng zawng Bawng rual thuawih tak khalh ang maia an han kawikhawmte kha a van ropui em!

Mizo Hlakungpui Mual Silver Jubilee (1986-2011) hi April 6 -7 lawm a ni a. Mikhual riak lût mi 900 vel niin lehlânga rawn hmang mi 300 vel an ni bawk. Hemi ni 2 hian ruai ṭheh ve ve a ni a. Sial =1, Vawk 20, Ar = 35 talh a ni a. Mi 2670 velin ni khatna-ah ruai an ṭheh a, ni hnihna-ah mi 3500 velin an ṭheh bawk. Khawbung mihring hi Samsun Printer ML-1640-in a print theihzât mi 2100 vel (k)an ni a. Mikhual 1400 velin an ṭheh anga chhût theih a ni.

Silver Jubilee-ah hian ruai vawikhat chauh  ṭheh tura inruahman a ni a, programmw in thlak ngai thut avangin Ruai pawh vawi 2 ṭheh a ni

Silver Jubilee Thiltumte

1.     Hlakungpui Mual luahtute sûlhnu, thuam, kut chhuak leh an chanchin ziahna lehkhabu dahna ‘Archive-cum-                        Library’ changtlung tak din.

2.      Hlakungpui Mual inenkawl zuina tur Foundation Fund Rs 300,000 aia tlem lo bank-a fixed deposit a dah.

3.       Chawimawina lungdawh chei thar leh seng luhâwmte seng luh a, phun belh.

4.       He hun remchâng hmanga khawtlang hmasawnna tur hrang hranga sorkar dawr.  

5.      Silver Jubilee Lawm nâna Ruaipui buatsaih.

Silver Jubillee hman zawk tâkah hian Rs 14 lakhs vel a hmunhma chei nan leh Jubilee lawm nân hian hman ral tawh a ni a. Foundation Fund-a dah tur Rs 3 lakhs fixed deposit-a dah tura ruahman pawh dah nghâl theih a ni a, April thla tawp lamah hian Rs 2 lakhs Foundation ami tur hmuh belh leh a ni dawn bawk a ni. Silver Jubilee hmanna tura project hrang hrang Budget Rs 36 lakhs ruahman chu Rs 11 lakhs-in khûm a ni tawh a. Rs 2 lakhs vel hmuh belh leh tura beisei a ni bawk. Heng sum tling khawm hi BADP, Art & Culture Department, Forest leh Mipui Thawhlawm aṭangte a ni deuh ber. Tunah hian Project lian zawk Rs 2.5 crores vel ruahmanna chu kalpui chhoh ṭan a ni bawk a. Hmun hrang hrang aṭang a duhsakna leh ṭanpuina lo lût khawm hi Zofate tàn chuan a lawmawm tak zet a ni.