Art & Culture Minister, Pu PC Zoramsangliana chuan Mizoram chu Mizo hnahthlakte tan inpui a ni tih sawiin, Mizo hnam chu ramri-in a then hrang theilo a ti.
Nilaini atanga Zirtawpni thleng awh, Manipur Group YMA buatsaih, Annual Conference vawi 25-na, Manipur, Sanping khuaa neih hmanpuiin he thu hi a sawi a, Pu PC Zoramsangliana chuan Zohnahthlak hmun hrang hranga mite chu an awmna hmun theuhah an himin an thlamuang tur a ni a ti a, Mizoram chu Zofate inpui, an Jerusalem a nih avangin Pu Lal Thanhawla kaihhruai, Mizoram sawrkar chuan Zohnahthlak khawi kipa mite tan pawh a tul ang zela hmalak a inpeih reng a ni a ti a, heng bakah hian Pu PC Zoramsangliana chuan YMA Member kal khawmte chu khawtlang nun siamthat kawnga an hmalakna turah mimal leh chhungkua theuha bul tan tur leh Ruihhlo avanga thalaite piansualna tam tak hre reng chunga nun uluk turin a fuih bawk a ni.
Pu PC Zoramsangliana hi Bialtu MLA leh Churachanpur DC ten an tawiawm a, Conference-ah hian Manipur Group YMA huam chhung Branch hrang hrangte chuan hnam lâm chi hrang hrang entirin, lengkhawm zai intihsiak pawh an nei bawk a ni.
Pu PC Zoramsangliana hian Imphal leh Lamkaa Mizoram House hmun tur pawh tlawhin, Regional Institute of Medical Science-a Mizo zirlai te pawh a titi -pui nghal bawk a, Churachanpur hmuna Salvation Army enkawl, Motherless Home tlawhin, Rs. 2,000/- a hlan bakah Churachanpur DC hnenah an thlatin Quota tur Buhfai, Chini leh Khawnvartui a ngensak chu DC chuan tihsak a tiam a, Manipur sawrkara Mizo Minister, Pu Phungzathanga, Power changtu pawh a kawm nghal bawk a ni.