MIZO MIPUI NGAIHVEN, MIZO ZAITHIAMTE TEL VENA TUR - INDIAN IDOL SEASON 5 (2010) TAN A NI TA !

LELTE : 2010, February thla inherchhuah phat atangin, “Indian Idol chu tan a ni ta, IDOL tiin chhu la 52525 ah sms thawn rawh, a nih loh paw’n 502525 ah be pawp la in ziak lut rawh” tiin Sony Entetainment Television chuan  TV Serial hmuhnawm tak tak chhuah karah an rawn tarlang zut ta mai a, Mizoram atang chuan Indian Idol-a tel tum te’n an thawn hlawhtling thei lova, an inbe pawp thei hek lo!(?) Indian Idol emaw a kaihhnawih site hrang hrang Internet-ah tlawh(search) a nih paw’n thil chiang tak tarlanna hmuh tur avang hle bawk! mahse, dawt a ni lo, inbumna a ni hek lo, kum 1 chhung nghah a nih hnuah tun tum zet chu a danglam dangdai dawn a, inpuah chahna an kalpui map map a; a tel tura te leh a thlirtute zingah boruak lo siam ‘Hot’ lawk nan hrim hrim boruak an rawn hlap chho a ni ber e !!  AMERICAN IDOL SEASON 9-in hmawrbawk lam a hnaih tihah INDIAN IDOL SEASON 5 chuan bul atan chho ve thung dawn a, April thla tawp emaw May thlatir atangin TV-a chhuah tan hman thei tura ruahman niin August-ah  Indian Idol tur chu  thlan fel hman theih tura ruahman a ni. Zaithiamber thlanna tichhuak hmasabertu ‘British Talent Search Television’-in ‘Pop Idol’ series zulzuia khawvel dapchhuak khawpa zaithiamber thlanna puithamtak Star World channel-a chhuah mek ‘American Idol’ chuan a vanglai a thleng chho mek a, hetihlai hian ‘American Idol’ thuneitute phalna la a ‘American Idol’ tihhmang zulzuia India Sony  Entertainment Television-in ‘Indian Idol’ a buatsaih ve thin chuan India mipui ngaihven leh hlut a hlawh chho mek zel.
   
Tun tum ‘Indian Idol’ chuan hmel thar a pu dawn a, a buatsaihtute pawh kum danga mi ni lo, mithar deuh vek an ni dawn a, tihdan kalphung thlak an duh tawh avangin hun reitak khel pawh a ni. 2008 kum atang khan kum hming pua kumtin Idol thlan (Indian Idol 2005, 2006,2007) thin chu harsatna tamtak a awm thin avangin leh kumtina bautsaih theih loh changte a awm theih avangin Season-a sawi chhoh tan (Season 4) a ni ta a; 2008 ah khan August atanga tan niin March 2009 ah Indian Idol 4 chu thlan fel theih hram a ni ta a; 2009 a han buatsaihleh nghal mai turin hun a chep avangin 2009 chhung khan huaihawt a ni ta lo a nih kha ! Tichuan, a huaihawt hna hi a hautak em avangin Season 5 neihleh tur contract hi tu ‘Producers’-in nge  emaw Unit-in nge ‘Auction’ chhang dawn? Tute chu nge ‘Contract’ hlan an nih ang tiin hun reitak chai a ni zuia; a tawp atawpah chuan ‘American Idol’-a thuneitute vek, Hmuhnawm khawvela huhang nei thaber pawl, ‘The X Factor’ buatsaih thuah pawh hming thatna lo chher tawh  Television Productions Private Limited (“Fre mantle”) -  leh Multi Screen Media (MSM) Private Ltd.te’n Mumbai-ah hmun khuarin Mumbai-ah vek hmun khuara awm, IIFA buatsaih thintu ‘Wizcraft International Entertainment Pvt.Ltd.’ te nen tangkawpin INDIAN IDOL SEASON 5 chu buatsaih mawhphurhna an kengkawh dawn ta a ni. Sony  Entertainment Television chhuahtu chauh a ni ve thung ang a; Sony-a thawktu emaw thuneitute Idol thlan thuah an inrawlh ve a rem dawn lo a nih chuh !  
   
Ka’n inzep lawk teh ang, khawngaih’n chhiartute’n min lo hrethiam lawk sela; tu’n inchhuang min ti suh se’ng !  Kum tina France ram tupui kama neih thin khawvel Film kut ropui ber Cannes De Festival entawna ram hrana huaihawt tawh lova, Goa  tuipui kama neih tawh tura ruahman hmasakber kum 2004, International Film Festival Of India (IFFI)-ah khan official-a Mizoram aiawha Mizo tel hmasaber ka nih thu Mizo mipui hriata puanchhuah a nih khan tel hmasaber chuhtu dang an rawn awm a, an chhui nghe nghe a ni awm e!! Amaherawhchu thuneitute’n ka nihna  thudik chu an lo hrilh a, ‘thudik’ chu a ‘lal’ ta nge nge a !  Mizo Indian Idol-ah tel hmasaber (tla pha hmasaber? min ti, ha ha...!!) ka nih khan hmasaber nih chuhtu chu fuihchhuah ni lo mahse tualchhung Cable TV show pakhatah chuan ka tel hma kuma tel anga insawi an awm hmanleh peka ! Indian Idol Record hluiah hming emaw Registration Number emaw ram(State)hmuh tur awmleh si lo, a pawi thin khawp mai!! Ni lo se chuan hmasaber nihna ka’n kian mai tura ! kan ‘Mizo Society’ Khawvel hi a mak ve hrim hrim a, a engahmah hma hma a thil zirchiang emaw finfiah hmasa te te lova ke pen mai kan chin thinna hian  mahni leh midangte harsatna a hun la lain thlen lo mahse nakin hun zelah a thlen fo thin a! Tute’n emaw thil tha ti (chhuak) se, puih a hnekin mahni tih chhuah, hmuhchhuah niawm fa hrana a ‘credit’ lo neih tal tum an awm thin a, chu mai bakah mi hmalakna tihthuanawp dan zawnga phi ta ruai leh chutiang tur lam hawia lo ‘misguide’ duh tawk lah vang lo! Hei hian kan hnam chu kawng hrang hranga hmasawn theilo turin min hnukhniam phah thei thin a ni tih hi Mizo diktak leh Christian diktakte chuan kan hai loh a tha awm e!
   
“The HUNT ho chu a’n va reh ta ve? An kal ta lo em ni?”  “...an kal dawn ta lo em ni? Engtikah nge the HUNT-a thlantlin ho chu Indian Idol-ah tel tura an kal ang?”   “ …te chauh an kal ta em ni?”  “India Hmarchhak(NE)a mite an tling zawn a, chuvangin hriatloh hlanin an lo nei daih tawh an ti a”   “…an kal a, an zuk tel a, an tla fai nghal vek  an tia, a ni em ni?” athlawna dawn theih zingah chuan heng zawhnate hi  ka dawng hnem hle!! THE HUNT huaihawttu GRAND SOCIETY OF MIZORAM (GSM) leh chhuahtu media LPS Vison hruaitute lu pawh a ti hai hle! kan lo chhan thin ang ngeiin a hunah chuan “hei Indian Idol thlan tur chu an rawn chhawpchhuak ta alawm!” !! kan ti a ni.  “Regional Auditions”  neihna hmun tur India ram khawpuilian- Calcutta, Delhi, Mumbai, Ahmedabad, Lucknow leh Indore te bakah hmun dang, India ram pawna audition neihna hmun tur te leh a hun (schedule)- te erawh ruahman chhinna(tentative) neih ni tawh mahse Producer lamte an la inbuatsaih fel hleihtheihloh avangin (he thu ziah thleng hi chuan)thutlukna feltak erawh an la nei thei lova hriat a ni. Tel tumte tan la tlailo tihna a nih chu! “Judges”  tur te pawh Producers-in tul a tih ang zela a chhawpchhuahte an nih thin avangin chiang taka biak fel an la nei theilo nia thu dawn a ni bawk. Hetihlai hian GSM hruaitute chuan THE HUNT TOP 5 te chu he INDIAN IDOL SEASON 5-a hruai thlaa an vanneihna chhin turin an inpuahchah nasa hle bawk. INDIAN IDOL SEASON 5 -a Mizo zaithiam tel tura hriatte chu THE HUNT TOP 5  Zonunmawii, Joseph Lalhmangaihzuala ,Tiny Mohini Thapa, Sangzuali Zote, Ravi Tamang -te bakah Mizo mipui’n kan la hmelhriatloh Aizawl Hmarchhak lam veng pakhata KC Lalmuanpuia, tuna Mumbai-a khawsa mek chuan tel a tum nia hriat a ni bawk, a ni hi a thlalak atangin leh ama siam album-a hla hrang hrang a sak a nu’n min ngaihthlak tir atanga ka  lo ral hmelhriat a ni a; thiam pawl tak leh Indian Idol-a tel atan zahpui awmlo tak tur niin ka hria !! Khaile ka thianpa James Ramdinmawia, LPS Mizoram Vision Winner nen theihtawp chhuaha kan han chhawpchhuah theih, tun Indian Idol Contest-a tel theih dan tur te chu lo thlir ila  :
   
He Indian Idol tura intihsiakna ah hian India khua leh tui diktak, a duh apiang, February 1, 2010 thlenga kum 15 leh 30 inkar te tan a tel theih a, a tel(Contestant) zinga kum 18 hnuai lam te tan bik, an dilna leh Release Form te chu an nu leh pa emaw, an legal guardian te emaw-in uluk taka an endik hnua an hriatpui a ni ngei tur a ni. Dilna (application)te chu Producer hnenah Regional Audition neih hunah thehluh tur a ni. Contestant -te chuan phone registration hmangin Regional Audition-a tel turin an in register thei a, a nih loh pawhin audition neihna tur hmun ruat atang te-a application form lak chhuah Regional Auditions form fill up-in a in register theih bawk. Application-a hming sign awm lo emaw, thehluh tlai emaw te chu Regional Audition-a tel tura an dilna ngaihtuah sak a ni lovang. Contestant- te chu Producer-in hun leh hmun a ruatah Regional Audition-a tel tura koh an ni ang a. Producer-te chuan Regional Audition piah lamah ama thuneihna hmangin, tul a tih chuan open audition neihna hmun tur a thlang thei a ni.Producers-MSM, FremantleMedia leh Wizcraft International Entertainment Pvt. Ltd. hnuaia full-time employee te leh, chung employee-te  chhungkaw member, Producer te’n tel thei lo tura an ngaih te, leh Company dang eng pawh, Competition buatsaihna atana tha thawhtu leh inhnamhnawihna nei te hnuaia thawktute, Lawmman tur thawhtu Company te huam vekin an tel phal a ni lo. Regional Audition neihna ah hian nisa vanvadak leh khawlum hnuaiah, contestant sing engemaw zah zingah,  ril tam leh tui hal  tak, chauh hnawp tur thlira intlar ve tura in huam angai a; nakina mipui thlir tura Video thla lo lak char char a nih dawn avangin ti rawh, ti rawh u tih ang chi te chu zawm zel peih angai dawn a; (mahse zawm vek loh thiam angai bawk) bawl theihna lakah inven angai takmeuh dawn a ni. Chutah Audition tur hian Producers ruat  Regional Judge round hnih hmachhawn an ngai a, he round hi pal tlang har berah ngaih a ni. Indian Idol thlanna hian a thlir leh hmuhchhuah a tum ber thin chu zaithei emaw zaithiam satliah nilo, Zathiamtak huapzo, dangdaibik a ni a; Rimawi emaw zaithiam lama zirna degree ‘Sangeet Visharad’  title nei tawh kan hnam dang unaute leh kei, Leilet phaizawl, thingkung buk hnuai, lui kam hmun fianrial thengthawa kum 14 chuang zai zira aw lo sawizawi ve tawh thin leh rampum huap hun pawimawh ah te pawh zaia National Award Dr.BR Ambedkar Best Vocalist Award hial lo dawng tawh hi ka tla thei a nih chuan Indian Idol ni tur chuan ‘Vanneihna’ a ngai tel hle a ni tih a chiang mai niin ka hria.