Mizoram a nat hmaa véng turin HM Zira'n YMA member-te a fuih

Home Minister R Lalzirliana chuan, khawchhak lam atanga Mizorama rawn lût thinte chungchangah, YMA chu dan chunga léng ni bik lo mah se, Mizoram a nat hmaa vêng turin a fuih.

Home Minister hian Inrinnia Armed Veng South branch YMA-in an kum 25-na (Silver Jubilee) an lawmnaah thu sawiin, "Khaw chhak lam atangin refugee tam tak, fel tak tak rawn kal an awm laiin, a behbâwmah eng emaw zat an rawn kal a, hengho hi Mizorama suahsualna thlentu ber an ni tih kan hriat chhung chuan, YMA leh V/C-te pawhin kan venga awm turte chhui chian a tul a ni," a ti a; in luah tur neite pawh pawisa ngawt ûm lo turin a ngen.

R Lalzirliana chuan, khaw­chhak lam atanga rawn chhukthla thin thenkhatte chu Mizo tho an nih avangin mi thenkhatin an khawngaih thu sawiin, "Hengho hian kei ni hi mi khawngaih ve lo. Dan angin kan police-in an man ang a, an sipaite hnenah kan hlan ang kan tih chu danin a phal lo a, dan hnuaia chhe chham kan ni si a, kan ti thei lo hi pawi kan ti," a ti.

Khawchhak lam atanga Mizorama pém lut mi thenkhatte chu thlah zalen an nih zel chuan, chhiatna nasa zawk an thlen dawn avangin, YMA-te chu dan hnuaia léng ni bik lo mah se, 'Prevention is better than cure' tih changchawia hma la turin Home Minister chuan a fuih a ni.

R Lalzirliana chuan, Mizo­ramah pawl tam tak, pressure group anga kal an awm thu sawiin, "Na tak takin mi an nawr a, corruption duh lo ber nia lang pawh ni se, officer an hmu a, an pawl tana pawisa an pek dawn chuan an tih dik loh zêppui tiam an awm tih ka hria," a ti. Pressure group zingah YMA chu a tel loh thu sawiin, chutiang taka pawl zahawm a nih zel theihna turin YMA chu an thuchhuahah pawh fimkhur turin a chah.

Jubilee lawmnaa khual­zahawm, bialtu MLA, Lalsawta, Education Minister pawhin thu sawiin, "Harsatna kan neih a, Mizote'n kan lungmuanpui, harsatnaa min thlamuan thei chu YMA hi an ni. Kan mamawhnaah YMA hian min tuam mawi a ni," a ti.

Armed Veng South branch YMA Silver Jubilee lawmna hi an President, R Zohmunsanga'n a kaihruai a, tlaiah khawtlangin ruai an theh.

Armed Veng South YMA hi kum 1986 khan din a ni a, tunah hian member 1,350, mipa 970 leh hmeichhia 380 an awm mek a ni.

Thulakna: Vanglaini