MIZORAM STATE MUSEUM-IN HLUT A HLAWH TAWK LO

Mizoram State Museum, Zarkawt ami chuan a ram mipuite hlut a hlawh tawk lo a, nikum 2009 khan 2008 aiin a let dawnin tlawhtu an thlahniam. Hetih lai hian India ram state dang leh foreign atanga Mizoram tlawhtu zinmite chuan an hlut a viau thung.

Mizoram State Museum-ah hian ‘object’ chi hrang hrang 3,445 dah a ni tawh a. Tlawhtu/entu zingah school naupang an tam ber. Hei pawh hi Museum Week laia tlawhtu an ni tlangpui tih thawktute chuan an sawi.

Kum 2008-ah khan Mizoram State Museum hi mi 20,646 in an tlawh a, nikumah chuan mi 15,491-ah a tlahniam. Kum 2007-ah khan tlawhtu mi 18,141 awmin 2008-a 20,000 an khum tawh chu 2009 ah a tlahniam leh a. Kum 2008-a tlawhtu an tam chhan hi a bul hnai Mizo High School field-a mi an punkhawm tam vang a ni mai thei, tih a ni.

“Museum hi thil hlui dah-khawmna satliahah mi tam takin an ngai ringawt a, tlawh enah pawh an en lo a ni ang,” tiin thawktu then-khat chuan an sawi a. Thenkhat chuan Museum enkawl hna thawktute chu an nuihzat lek lek a, Canteen Square-a Museum a awm lai phei chuan tlawhtu an awm ngai bar lo niin an sawi.

“India ram hmun dang mite leh foreign atanga lo zinte chu nitin tih theihin tlawhtu an deuh awm reng a. A hmuna awm chilh zawk, tualchhung mi lam erawh chu an tam lo khawp mai,” tiin museum hlut nachang hre tura inzirtir thar a tul hle a ni, thudawnna chuan a ti.

Mizoram State Museum-ah hian tun dinhmunah Gallery 6 - Zoological Gallery, History Gallery, Anthropological Gallery, Ethnological Gallery, Textile Gallery leh Archeological Gallery bakah Library a awm a. Gallery hrang hrangah hian hmanlai Mizo pi leh pute sulhnu leh thuamhnaw, thlalak leh thil dang tamtak dah a a ni.

Hman lai pi leh pute sulhnu hlui lam tuichilh rawlthar pakhat T.Lalhmangaihzuala chuan kum 2006 atang khan Mizoram khaw hrang hrangah kalin Mizoram State Museum-a donate tur hi a zawng kual tawh tih The Zozam Times a hrilh a. Rambuai laia India sipaiten tui an paina Bur te, lal zu inna ‘Dawnkawn’ leh Fei a donate tawh tih a sawi a. Hmanlai Mizo lal te zu inna hmanrua ‘Dawnkawn’ phei chu Mamte khaw lal F. Chhuankima  hnen atanga a dilchhuah a ni a, an ui ve hle niin a sawi.

Zemabawk tlangval kum 19 mi, Hmangaiha hian hmanlai thil hlui lam ngaihven hi a tui zawng tak a nih thu leh kum khat vel chu hetiang zawnga vahchhuah a la tum thu a sawi a. “Zinna senso tur hi chu keima’n ka tuak thin a, ka tuak ngah veleh ka zin chhuak mai thin. Chhungten min pek chang pawh a awm bawk,” tiin The Zozam Times zawhna a chhang a ni.

Mizoram State Museum hian February ni 22-26, 2010 chhung hian Museum Week an hmang leh ang.

Thulakna: The Zozam Times