Mizo Students' Union (MSU) chuan, hmun dang atanga lo lut, Tuikukte thiltih dan chu ngaihthiam zel harsa an tih thu sawiin, Tuikukte chu an duh chuan an awmna hmun nghet, Bangladesh-a haw vek turin an hriattir tih an puang.
MSU hian nimin khan thuchhuah siamin, MSU chuan, tunhnaia Tuikuk pawl hrang hrang intite'n Mizoram sorkar leh an chenna ram neitu, Mizo mipuite zahna neih miah loa February 15 hma ngeia Mizoram chhunga luh an duh thu leh, hemi hmaa hruai luh an nih loh chuan Mizoramah luh luih an tum thu an sawi hi palzam mai chi-a an ngaih loh thu an sawi a ni.
Tuikukte'n vawi tam tak Mizote lakah buaina leh harsatna an thlen hnu-ah pawh, Mizote tihthinur tuma tawngkam leh thiltih an nei reng niin MSU chuan an tarlang a, "Tuikukte hian Mizoram sorkar leh tlawmngai pawlte chu vawi khatmah hriattirna an pe tawh tur a ni lo," an ti.
Thulakna: Vanglaini