MZP-IN CM AN HMU - " MISUAL CHU POLICE-TEN AN UM ZEL ANG "

16/02/2010 23:35

MIZO AW : Chief Minister Pu Lal Thanhawla chuan nimina Mizo Zirlai Pawl Gen.Hqrs. hruaitute, an President Pu VL Krosshnehzova hoa amah hmutute hnenah Bru zinga misualten mi pawisawi lote chunga kut an thlakleh a nih chuan mipui ni lovin police-ten a tawp thlengin an um dawn tih a lo sawi niin MZP press release chuan a sawi.

MZP Gen.Hqrs. hruaitute leh Mizo Students Union (MSU) press release chuan nikum November thla laihawla Bungthuam thalai pakhat thah a nih hnuah helai velah hian Bru zinga misualten thawm an nei thar leh niawmin an sawi a. MZP hruaitute hian nunaute tithlabar zawnga che an awm thu Chief Minister chu an hrilh a. Chief Minister chuan hemi chungchang hi Tripura CM pawh a hriattir tawh thu a sawi niin MZP press release chuan a sawi.

MZP hruaitute hian CM hnenah hian stipend leh scholarship hrang hranga zirlaite harsatna tawh te, Scholarship Board tihchak tul an tih thu te an thlen chu chaktaka bawhzui mek a nih thu leh scholarship lak theihna tur order chu nimin khan tihchhuah a nih tur thu a sawi a ni MZP press release chuan a ti.

Mizorama oil leh natural gas leh thil hlu zawn chhuah mekah ram leilung fate tana chhenfakawm a nih theih dan zawnga hma la tura zirlai hruaituten an ngenna chu Chief Minister chuan dan awmsa kalha thil tih theih a ni lo a, dan kalh loa ram mipuite himna siam tura inremna siam a nihna turin hma lak mek a ni a ti.

MZP hruaituten Mizoram Public Sevice Commission tan Optical Mark Reader ngaihtuahsak tura an ngenna chu CM chuan a rang lama tihhlawhtlin a nih theih nan theihtawp chhuah a tum tih a sawi bawk a. MZP press release chuan Women Polytechnic Aizawl leh Mizoram Polytechnic Lunglei tan industrial tour nei tura an lo dil tawh chu MZP hruaitute chuan thlen nawn lehin CM chuan a bawhzui nghal a, a hlawhtlinna tura umzui zel a ni a ti.

Back