MZP leh ACCJSU-in Exam Question Sem Sual Chungchang Ngaihtuah

Mizo Zirlai Pawl leh Aizawl City College Joint Students’ Union (ACCJ-SU) hruaitute chuan nimin khan MZP Pisa Puiah College Examination question sem sual a nih chungchang an ngaihtuah ho a, MZP hruaitute leh ACCJSU hruaitute an kal kim hle.

Meeting chuan Dt. 15th February 2011-a Mi-zoram Univerisity hnuaia Degree Course Examination kalpui mek a nih laia Govt. Hrangbana College-a Mizo elective - III exam turah Environmental Studies (EVS) question paper semsual a ni chu tha lo a tiin hemi avanga exam beitute chiai taka an awm chu pawi a ti takzet a ni.  

Hun lo kal zel turah thil tha zawk leh exam tluang taka beih a nih theih nan thil tisual palhtute chungah University thuneituten a tul angin hma la se meeting chuan a duh. Tin, Environmental Studies Examination question hi dan lo anga kheuh hawn a nih tak avangin set that leh vek nise a ti.

He thil thleng hian tunhmaa question paper Police custody/strong room-a dah a; a chawp te tea lak chhuah thin kalsana, a hlawma Principal te kuta dah tura Mizoram University-in thutlukna a siam  a fuh tawk loh na tilangtuah meeting chuan a ngai a, hemi hian question vawnhim leh semchhuah kawngah fimkhur lehzual a tulzia a pholang chiang hleah a ngai bawk a ni.

Jt.Meeting chuan he thil thleng avang hian zirlai exam bei mektute chu chiai lova tluang leh tha taka Exam chhunzawm zel turin duhsakna hlan a, he Examination kalpui meka zir-laite’n harsatna an tawh loh na turin a tul angin hma a la zel dawn tih an sawi.