THE ZOZAM TIMES : Naktuk (17.2.10)hian Bungthuam khawtlang chuan nikum November ni 13-a Tuikuk hel nia inchhal ten an kahhlum tak Zarzokima lung an phun dawn nia hriat a ni. Lungphun hmanpui tur hian vawiin khan MSU hruaitute chuan Aizawl chhuahsanin Bungthuam an pan.
MSU hruaitute hi Vice President RB Lalmalsawma hova thawk chhuakin zanin khan Bungthuam an thleng a. Zarzokima ralna a chhungte hnenah Rs.2,000/- leh Dekchi lian an hlan nghal a, vawiin hian Bungthuam khawtlangin Zarzokima lung an phun tur chu an hmanpui nghal dawn tih an sawi.
Thudawnna sawi dan chuan tunhnai mai khan nikuma Zarzokima thihna bul velah Tuikuk mi thenkhat chu ralthuam nen an inlar leh a, Bungthuam khaw mi thenkhat chuan heng Tuikuk te hian Zarzokima thihna avanga Police ten an man chhuah ngiata engemaw tak tih an tum a ni maithei tih ngaihdan an nei mek.
Tuikuk mi thenkhatin vai hmunphiah la an vau tihte leh Zarzokima thihna hmun pala hungkual an tichhia tihte, ralthuam nen helai vela kal an hmu tihte sawi a awm bawk a. Mamit district Police lam kan palaiin a biaknaah chuan heng thil sawite fiah tur hian an intir a, mahse, han umzui tehchiam tur awmin a lang lo, tih a ni.
Vawiina Zarzokima lung khawtlang huapa phun tum chung-changah, Bungthuam khuaa IR platoon khat duty sate bak a hranpain phungbawm an insawm lem lo tih Mamit Police atanga thudawn chuan a sawi a. Vai hmunphiah la vau tih chungchangah chuan, helai hnai Teirei leh Tlawng vela hmunphiah latu vai thenkhat hnenah pawisa an lo dil pawh a ni thei, thudawnna chuan a ti.
Bungthuam khaw daiah hian tunhnai khan vai hmunphiah kekte chu Tuikuk mi 4-in haw tura an vau thu leh an haw duhlo a nih chuan a vautute hian sahhlumah an vau nia sawi a ni a. Hmunphiah kektute hi khawchhungah zual-kovin Bungthuam-a IR duty te leh Bungthuam tlangval ten an um a, an umpha ta lo niin an sawi.
Hei bakah hian Bungthuam-a IR duty te chuan February ni 14 khan mi tute emaw hnen atanga sms dawngin, sms thawntute hian February ni 13-ah Kolalian atanga chhuak Tuikuk hel 5 ten ralthuam an ken thu leh, Thinghlun bulah mi pakhat sava veh lai chu a Air-Rifle an chhuhsak thu te, heng mite hian Cachar Zaite lam an pan tur thu an sawi tihte a ni a. He thu ngaihtuah hian VC, VDP leh IR ten February ni 14 khan an inhmu-khawm nghe nghe nia thu dawn a ni.
Bungthuam khaw dai velan Tuikuk hel an inlar leh nia sawi awm chungchang hi nimin khan MZP hruaitute chuan Chief Minister an hmuhnaah sawi chhuakin, Zarzokima thahna hmuna Tuikuk ten thawm an neih thar thu leh, nunaute tithlabar zawnga an chetna chu ngaimawh-awm an tih thu an sawi a. Chief Minister Lal Thanhawla chuan hemi chungchang hi Tripura Sorkar pawh a hriattir tawh thu lo hrilhin, “Tuikuk te hian Mizo te chungah kut an thlak leh a nih chuan, mipui ni lovin kan sipai ten a tawp thlengin an um chhuak dawn a ni,” a ti niin an sawi.
Hetih lai hian Mizoram Police Special Investigation Team-te chuan Zarzokima thahnaa inhnamhnawih ngeia hriat mi 6 man tawhin midang pahnih thum vel an la zawng mek nia hriat a ni bawk.