MIZO MIZONA HUMHALH

Nghilhni Awm Lo Skul Run Rah Hmasak Ber Ni

01/11/2010 16:26

A rei ve ta. Tuk khat chu ka nu’n hma takah min kai tho va. Thawmhnaw thar – kawr var leh kekawrte hring min haktir a, artui lian tha leh tui chi nen tukthuan ka ei a. Ziak loh puan (lehkhabu) leh pencil chu ka ipte thar tial mawi tak maiah dahin, ka nu min kaihna lam, skul lamah phur vak lo chuan ka zui ta leuh leuh a.

Thui lutuk lo kan kal hnu chuan ka nuna a hmasa ber atan skul huan chu ka rap ta. Chu skul hung chhungah chuan naupang dang tam tak an lo awm a, an ri nuai nuai a. A then an nui a, an then an tap a, kei erawh ka tap ve lo. Nu leh pa dang tam tak pawh ka hmu.

Ka nu chuan mi kai phei zel a, keimah ang rual mi 50 vel awmna hmun pakhatah mi hruai a. Chu hmunah chuan nu thau deuh pakhat hian hmawlh keng chungin, hlim tak maiin min lo lawm a. Chu nu nen an inbiak hnu chuan ka nu chuan min chhuahsan ta daih. Chu nu chuan tlar hmasa bera thu turin, hlim hmel pu chungin aw nem takin min hrilh. Ka hawi kual hruk hruk a, nakin deuhah chuan chu nu thau deuh-nu chu min zirtirtu tur a ni tih ka hre ve ta chauh a.

Zirtirtu chuan kan hming theuh a lam hunah ding chunga “Awm ” ti zel turin min hrilh a, a hming lam chu  kan ngaithla thap. Tichuan zirtirtu chuan kan chhungkaw chanchin te, keimahni chanchinte min zawt a, amah chanchin pawh min hrilh bawk. Chutianga zaidam hmel tak maiin min ho avang chuan kei pawh chu ka ngaih a ngam ve tan ta hle a ni.

Zirtirtu chuan number chhiar dan – 1 atanga 20 thleng min zirtir a, tin; pencil vawn dan leh lehkha ziak dan min zirtir bawk. “ O”(zero) bial nalh taka ziak turin min tir leh bawk. Chumi hnu-ah thawnthu min hrilh a, a ngaihnawm hle.

Nakin nakinah chuan skul dar a rawn ri teng teng a, ka ipte chu ka ak vut a, chu hmun atang chuan ka tlan chhuak ta nghal a. Skul huan pawn lamah chak tak maiin ka tlan a, ka nu ka zawng kual nghal. Ka nu chu ka hming lam pahin ka lamah a rawn tlan a. Min pawmin min fawp a, “ Ka fapa i fel mang e....” tiin ka kut chu a kai a,  in lam panin kan haw ta nal nal.

Hunin kum tam lianpui tawh mah se, khami ni - fin-thiam zir tura skul ka kal hmasak ber ni kha ka theihnghilh thei lova, ka thinlungah hian engtik lai pawhin fiah tak maiin a  cham reng. Skul hung chhung ka rah hmasak ber ni khan ka hriatrengna hi a luah kumkhua tawh dawn a ni.

Comments

No comments found.
 

Contact

Search site

 

 

 

 

                  NGAIHDAN

 

    

     Ngotekherh         Puanchei

   

        Puandum           Hmaram

 

 

 

           THU KAM HNIH KHAT


ShoutMix chat widget

 

 

                TLAWHTUTE


counter globe

 

 

  MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

MizoMizo Kan Nih Kan Lawm E