Ni Thum Chhung Chawl Lova Internet Game Khelh Vangin Thi

22/02/2011 23:38

Kum 30 vela upa, a hming tarlan loh Chinese-pa chu ni thum chhung chawl lova Internet game a khelh avangin a thi, niin Thawhlehni chhuak The Beijing Times chuan a tarlang.

Beijing khawpui pawn Internet cafe pakhatah nit hum chhung chawl lova Internet game a khelh hnu-ah, he pa hi Thawhtanni(21/2/11) zan khan chhuatah a tlu tawp a, a bul hnai dawmdawi in panpui thuai a ni na-in, a nunna chhan hman a ni ta lo a ni. He pa hian January thla khan Internet game khelh nan yuan 10,000 ($ 1,500) a hmang ral a ni.

China-ah hian Internet atchilh an pung tual tual a, chhuituten an chhut danin tunah hian mi maktaduai 30 velin Internet an atchilh tawh a ni. Ram mipui zat atanga chhuta khawvela Internet game atchilh tamna ber ram pakhat chu South Korea a ni. Sorkarin a chhut danin mi maktaduai 2 velin online game an atchilh. South Korea-ah hian February 2010 khan kum 32-a upa pa pakhat chu internet dawrah chawl lova ni 5 chhung online game a khelh avangin a thi. Kum 15-a upa mipa naupang pakhat pawhin computer khawih a chawlhsan loh avanga hautu a nu a lo that tawh bawk. He pa hi amah leh amah a intihlum zui nghe nghe a ni! Nupa tuak khat pawh online lam thil buaipui luatah an fa hnute tui pek an theihnghilh a, nausen chu riltamin a thi a ni.

Back