“Islam sakhaw vuantu al-Queda firfiak ralhrat pawisak nei lo pawl hotu, ni 11 September 2001 –a New York khawvel insumdawn tawnna in sang (world trade center) sutchhiatnaa mawhphurtu Osama Bin La Den-a chu a thi tawh,” tiin US President Obama-a chuan mipui hriatah a puangzar. (CNN, BBC, Al Jazeera, Fox News, The New York Times)
Afghan official pawhin Bin La Den-a a thi a ni tih hi a nemnghet tawh a, a ruang chu US kutah a awm niin an sawi. (Al Jazeera)
Bin La Den-a hi chawlhkar khat liam taa US beihna bomb-in a nuai hlum niin Fox News chuan a sawi. US Intelligence report bawhzuia Islamabad khawpui pawna beihnaah, Bin La Dena hi a thi a ni. (BBC)
Osama Bin La Den-a thih thu thang avangin, Washington DC – White House kawtah mipui an pungkhawm a, “USA, USA” tiin an au rual thup thup a ni. (BBC)
Ni 11 September 2001 –a Islam sakhaw vuantu al-Queda firfiak ralhrat pawisak nei lo pawlin thlawhna 4 an hruai kawi a, 2-in New York khawvel insumdawn tawnna in sang (world trade center) a sutchhiat a, pa 2-in Whashington White House a tihbuai hnu, President George W.Bush-a kaihhruai sorkarin al-Queda firfiak ralhrat pawisak nei lo pawl hotu Osama Bin La Den-a chu man tur leh al-Queda firfiak ralhrat pawisak nei lo pawl chu nuai chimit tura Afghanistan leh Pakistan-a ralbeih beihpui an thlak vut vut atanga kum 10 dawn lai liam hnu-ah Bin La Den-a chu thah a ni ta a ni.