PIRACY LEH KAN RIMAWI KHAWVEL

-T.Zorampela

MIZO AW:Rimawi khawvelah cheng ve tawh lo mah ila, ka la hawisan lovin a par ka la tlan bang lo va. Ralkhat atangin kan rimawi khawvela Piracy a hluar lutuk vanga zaimite mangang au thawm ri hi ka lo hre ve thin a. ‘Ka thih hnua mite rawn buaipui ai chuan mahni ngeiin mahni hla phuah vete collection album siam a tha e ’ tia hma ka’n lak ve chiah atangin Zofate rimawi khawvelin piracy vanga an lo tawrh nasatzia chiang takin ka hmu ve ta a. Rin phak bakin a hliam a lo na a, kan rimawi khawvel chu a uaiin a khawro lo chauh hi a lo ni a. Chuvangin, a tawizawngin kan rimawi khawvel leh a runtu piracy chungchang hi mipui lo hriatah ka’n thet ve reng reng ang e.

Kan album-te cassette chauhva hralh chhuah a nih thin lai kha chuan copy a sing a sing tela hralh thei an awm thluah a, zaimi tam takin nunkhaw nawm phah nan an hmang thin kha a ni a. Tunah erawh chuan copy sang li hralh thei chu tawng sang ber pawl an ni ta, chu pawh KTP, TKP leh YMA-in inhlawh nana an zawrhpui ve thin Pathian hla(Fakna chauh ni lo) album lam chauh a ni nghe nghe a. Setana ang hiala kan puh \hin, lengzem leh hla lenglawng lam erawh copy sang khat pawh hralh harsa tak a ni ta. Album hralh tam a har viau lai hian album nei erawh kan pung nasa fe tawh zawk lawi si. Chuvang chuan, zaimite’n, ‘Ka pu Vawma tui tui, a in ngamin in r’u, a dawt ngamin dawt r’u’ tih ang hrimin album siam chu an Pu Vawma tui hmuh zo tawh tih chu chanchin bu leh anmahni ka ngei a\anga hriat tur tam ber a ni ta. Miin zaia an sawmna hlawh chhete te chu an sum hlawh chhuahna kawng awm chhun a ni ta ber a, concert siam lahin awmzia a nei tawh si lo. Hmuitu department nei ve lo leh dan leh hrai tlawhchhan tur awm ta lo chu miin eng anga nasa pawhin lo pirate mah se, thinur teuhva lo phun lungawi mai bak tih theih tak tak an nei lo.

Kan rimawi khawvelin piracy a tawrh dan chu a tlangpui chauh lo sawi thuak thuak ila. Album siam tur hian a hmasa berin musician hnenah music track (a remna chauh awm) siamtir phawt a ngai a. Chu music track hmang chuan recording studio-ah zai record a ni leh a, a hnuah musician hnenah bawk tingtang(lead) perh luhtir a ni leh a. A dawtah a cover tur a thiamte design-tirin phai lamah chhuttir a ngai leh a. Chumi hnuah chuan a cassette leh CD te lo copy pung(write/dubbing) turin chutiang lam timite hnenah pek luh a ngai ve leh a. Chung zawng zawng hnuah chuan a zuartute hnena sem chhuah theih a lo ni ta chauh thin a ni. Album pakhat puitling thei tur hian thiam lo thawha eizawn nana hmang mi chi 7 lai an awm a nih chu, rimawi khawvel tobul leh a chak(raw material) thehchhuaktu ber, tawngkam tha bak hlawh la nei pha ve lo hla phuahtute chhiar tel lovin.

Piracy vang hian chungtianga thiam lo thawhtu mi chi 7-te chu thawh tur nei mang lovin an thang chhuak hawi vak vak chu a ni ta ber a. Album lo copy punga sem darhtute phei chu an hawi hil a ni ta ber a, khaw tam takah phei chuan album zawrhna dawr pawh awm fumfe tawh mang lo hiala sawi a ni bawk. Sawi zahthlak mah ni se, sawi hmaih theih hauh si loh chu kan zaimi lar tak takte zingah pawh recording man pe tlingtla hlei thei lo an awm nual tih hi a ni.

Heti khawpa kan music industry a tlakchhiat chhan chu a bulpui berah chuan computer hi a ni a. Mi pakhatin album pakhat a lei chuan CD, pen drive, card reader, handset-te hmanga lo inpe chhawng zelin ni khat chhung lek pawhin chu album pakhat chuan thlah tam fe a nei hman tawh \hin a. Tunah chuan pisa tina computer thlengin Mizo hla an nei ten tun ta a nih hi. Sawi rik ngai pakhat chu, ‘Sap hla pawh kan pirate vek a, dan phal loh tho a lawm’ tia tan kan khawh thin hi a dik e. Mahse, helaia kan lo pirate ve leu leu te hi chu anni chuan an chhiatpui ve lovin an rimawi khawvelin a tuar pha hauh lo va, kan Mizo hla kan lo pirate ve erawh hi chu kan chhiatpui let der chu a nih hi. Rimawi huang leh film lam miten piracy hi huain hma han la ve bawk thin mah se, humtu dan leh hrai kan la neih miau loh avangin zawnga hmai chu sawi loh, mihring hmai eng pawh zah zo lova duham leh mahni hmasial vanga lo pirate \hin tute hi tih ngaihna tak a awm si lo.

A chhan dang leh chu, kan local TV network pathumte’n an pek chhuah theuh Hmehchhuah channel hi a ni ve leh a. He channel vang hian kan mit leh beng a rawp lo zo vek a, sum senga CD leh DVD lei lohvah kan ramtan phah nasa hle bawk. Cable TV kan neih hma leh neih hnua Mizo inchai te, concert te entu an intam hleih ta ang chiah hi a ni. Chuvangin, Hmehchhuah channel pawh hi tihtawpa Mizo Music TV channel siam ve ni se, kan rimawi khawvel chuan a thatpui zawk ang tih a chiang hle a ni.

Aw le, tunah chuan Mizoram State Law Commission chuan Piracy khapna dan duang chhuaka lek kawh a tum ve ta a. He thu baka kan rimawi khawvel tana ri mawi hi a awm thei chuang awm lo va, zaimite leh kan rimawi khawvel nena inkungkaihte tan kawl a eng thar leh dawn ta a ni ber e. Piracy khapna dan bakah hian hla phuahtute hamthatna tur, hla copy right hi kan mamawh ngawih ngawih a niin chak taka bawh zui a hun ve ta hle bawk. Hla phuahtuten hlawh an neih ve theiha hna ang hiala an neih theih hi kan rimawi khawvelin nasa lehzuala hma a sawnna tur kawng khat a ni ve tlat a ni.

Piracy khapna dan, dan platinum hi a rang thei ang bera hman theih turin Law Commission lam hian siam puitling thuai se tih hi zaimite leh rimawi huanga eizawng zawng zawngte duhthusam a ni a. Tunah chuan he dan thar lo piang tur hi Pathianni tuka daikilkar chhangchhepa ina ar sa theh, naupang leh ui pui lamin chilput duah duaha an lo thlir thap thin ang hian ring fanin kan lo thlir thap e. Rimawi huanga lo liluh ve thin leh rimawi ngaina bang lo ka nih venaah ka’n sawi ve duh chu, ‘Mizoram State Law Commission hmachhawp avang hian rimawi huanga chetlate leh rimawi ngainatute kan lawm tak zet a ni’ tih hi a ni e.