Quran Hal Vanga Afghanistan-a Thinurna leh A Kaihhnawih

Ni 20 March 2011 - America rama Islam sakhaw lehkhabu thianghlim ‘Quran’(‘Koran’ tih a ni bawk) hal a nih avanga lungawi lote, ni 1 April 2011 khan Afghanistan ram Mazar-i-Sharif khawpuia awm UN compound-ah  lutin buaina an siam a, UN hnathawktu mi 7 leh midang 5 te chu thah an ni.

Afghanistan hmun hrang hrangah Quran hal vanga thinurna hi a nasa chho zel a, ni 2 April 2011 khan Kandahar khawpuiah Quran hal vanga thinurna-in a siam buaina avangin mi 9 aia tlem lo an thi a, mi 73-in hliam an tuar a ni.

Ni 3 April 2011, Chawlhni khan Kandahar khawpuiah Quran hal vanga thinurna lantira buaina siamtute leh police  inkarah buaina a chhuak a, lung nen te an invawm a, mi 3 aia tlem lovin nunna an chan.

Thinurna lantirna hi a kal zel a, ni 5 April 2011 khan Kabul University-ah mi 1000 vel an intawkkhawm a, kawng zawhin  Quran hal duh lohna an lantir a ni. Ni 20 March 2011 - America rama Islam sakhaw lehkhabu thianghlim ‘Quran’ hal a nih hlimchhawn vel khan Pakistan ramah pawh thinurna a chhuak a, a so sang nasa hman tep a nih kha!

Afghanistan-a Quran hal duh loh lantirna hi Taliban pawl thenkhatten an thlawp thu an tichhuak a, America chu haw ngawih ngawih tura fuihna thu an thehdarh tel zel bawk a ni.

Organization of Islamic Conference (OIC) leh Islamic Republic of Iran, Tajikistan, Egypt, Pakistan, Morocco, Palestine ambassador-ten UN General Secretary Ban Ki-Moon-a chu hmuin, he Quran hal chungchang hi ngai pawimawh tur leh a haltute chungah hremna na tawk pe ngei turin an ngen. Ban Ki-Moon-a chuan Quran haltute chu a dem takzet thu a sawi.

America President Obama-a pawhin Quran hal chu a dem takzet thu a sawi a, chutih rual chuan thinurna lantirtute avanga pawi sawi loten nunna an chan a, UN hnathawktute nunna hial lak a nih pawh chu a dem takzet thu a sawi.

‘Quran’ Chu Tuten Nge Hal? Engvang Nge?

Kum 2010 khan Ganesville, Florida -  Dove World Church pastor Terry Jones-a’n “Islam Hi Setana A Ni (Islam Is Of The Devil)” tih lehkhabu a ziak a. Khawvel insumdawn tawnna in sang sutchhiat a nih champha vawi 9-naah pastor Terry Jones-a hian Islam sakhaw lehkhabu thianghlim Koran chu hal a tum a, Khawvel Pum Huap Koran Hal Ni (International Burn A Koran Day) pawh huaihawt nghal a ni. Pastor Terry Jones-a hian Koran hal tur hian Pathian-in thu a pe niin a sawi. Quran hal huaihawttute tanchhan chu I Johana 3:8 “Thil tisualtu chu diabolaa chhuak a ni; diabola chuan atir ata thil a tisual si a.Pathian Fapa lo lan chhan ber chu diabola hnathawhte a tihboral theih nan a ni.” tih hi a ni.

Koran hal tumna hi ni 9 September 2011-a Muslim mi firfiakten an sutchhiat tak khawvel insumdawn tawnna in sang (Ground Zero of World Trade Center) bula Muslim-ho tawngtaina hmun thianghlim din tumna (2010-a US mi tam takte inhnial buaina kha) duh lohna atanga lo irh chhuak niin a lang.

US sorkar mi pawimawh hrang hrangte, khawvel sakhaw hruaitu pawimawh tak takte, pawlho leh mimal tam tak atangin pastor Terry Jones-a chu Koran hal lo turin an ngen a, an vau a, an thlem bawk. Tichuan, khawvel insumdawn tawnna in sang (Ground Zero of World Trade Center) bulah Muslim tawngtaina hmun thianghlim din a ni leh dawn lo, tih thawm thang a lo chhuak a,  pastor Terry Jone-a chuan Khawvel Pum Huap Koran Hal Ni (International Burn A Koran Day) chu thulh leh hrih a nih thu a puang ta a ni.

Pastor Terry Jones-a hian hmun hrang hrang atangin vauna a dawng a, January 2011 khan “England Is Ours” (Muslim do tlat Kristian pawl) sawmna anga England kal a tum pawh, buaina siamchhuaktu a nih hlau-in Europe khawmual luh phalna an kharsak a ni.

Ni 20 March 2011, Chawlhni khan Ganesville, Florida -  pastor Jerry Jones-a kohhran Dove World Church inkhawmnaah, evangelical preacher Wayne Sapp-a’n Quran bu khat a hal ta a ni. He inkhawmah hian mi 30 vel an awm a ni.

Khawvel Sakhaw Lian Pali leh A Zuitu Zat

 Thulakna: CNN, Youtube, Wikipedia, Cafemom, Isna, Xinhaunet