RADIO REMINDS ME OF MY HOME FAR AWAY

Chhun leh zan in-leh-thal in-leh-thalin ka pian leh murna ka chhuahsanna paw'n thla tam a lo her liampui ve ta reng mai!Ka thlakhlelh em em hmun ka chhuahsan hnu,Malaysia-a mittui paral kuau chunga puitlin ka zirnaah hian lunglen hun hi nei em em thei lo mah ila,hun bithliah ang taka lunglen hun erawh ka nei tlat a nih hi.Ka hlaphuah hual min phuah khalhtu John Denver-a hlathu - "Radio-in Kar Hlaa Ka Run In Min Hriat Chhuahtir" tih hmang hian lunglen thu bawk ka han thai ve leh ang e.

Malaysia ka thlen hnu hian hna chithum vel ka thawk ve tawh a.Restaurant-a ka thawh lai khan Mobile ka la neih loh vang leh thil chinchang engmah ka la hriat loh a vangin Radio ka ngaithla ngai reng reng lo.A hnu deuhah Recycle for Charity khawlkhawmtu hna (Mi bawlhhlawh peih - TV,Fridge,Aircon,Computer ,chanchinbu,bur leh ilo etc. phelhdarh leh remkhawm) ka thawh lai chuan rangva nena sak Office te reuh te,chhuanawm vak lo te hi ka nei a.Chhun khawlum lutuk hian chu ka Office-ah chuan ka chawl hahdam thin.Chu ka Office-ah chuan Cassete Player hlui zet mai hi a awm a.Cassete play theih ni tawh loh mah se,Radio kha chu a la tha khawp mai.Hna ka thawh pahin chu ka Radio chu ka ngaithla a, ka lung hi eng emaw ti takin a leng tlat thin.Radio bulah chuan va kalin ka va en a,ka han herhsawn leh ta thin a.Lung a tileng em em ringawt mai thin.

Pathian zara tuna ka hnaa ka luh hnu hian zan mut pahin ka phone atang hian Radio ka ngaithla ziah.A chang hi chuan ka lo muthilh san a,zing ka thawh rual hian ka ngaithla chhunzawm leh mai thin.Hetianga zan mutnaa Radio ka ngaihthalk apiang hian kan in ka ngai a,hun kal tawh ka dawnkir ziah thin.A changin ka mittui te hi a tla thei dawn dawn zuk nia!Hetianga Radio-in ka lung a tih len em em chhan ka han ngaihtuah chian hi chuan lunglenna tur awm tak a nihzia ka hre chhuak leh thin.

Mite angin mi hausa chhungkuaa piang ni lovin,TV leh eng engemaw hriatna tizau thei nei ve phak lo mah ila,khawvel hnuchhawn rama tlan reng lo tura hriatna min petu pakhat kan inah kan kawl ve tlat kha chu vawiin thlenga min ti-vanneitu a la ni zel.Ka pian tirh atang khan vawiin thlen hian kan inah Radio kawl loh lai kan la nei awm lo ve.Kha kan Radio kha ka nu sawi danin kan upa ber Awmtea pian hma deuha an lei a ni .Ka nu ngaihdan chuan Radio hi "Finna min petu thian tha ber" a ni tawp mai a.Chuvang pawh chu a ni ngei ang - a fapa upa ber-ka u hian Radio ngaihthlak a peih em em ringawt mai a.A hun awl neih apiangin,a chhun a zan hian Radio hi a ngathla tlut tlut reng a.Ka nu lah chuti bawk.Chumi avang chuan Radio ri ringawt deuh thaw hian kan in hi a luahkhat reng thin.

A lo upa ve deuh ta a ni ang - kan Radio kha a tawng tawlh tawlh a,dawra kan siamtir pawhin "a hmanlai lutuka a thlakna tur bungraw mil a awm tawh lo,hei bak hi chu tihngaihna a awm tawh thlawt lo" tih kha min chhandan chu a ni deuh zel a.Radio ngaithla lo chuan kan chhungkua kha kan awm thiam si lo a,a theih ang angin kan han ngaithla lui a.A changin kan beng dawt dawt a,a changin hrui sei tawk hi a antena-ah vuahin in chungah kan han tawn thin a.Chuti chuan a theih ang angin kan Radio chuan ngaihthlak a la hlawh a,ka nu khan kha Radio kha a roh em em ringawt mai a ni.Chanchin thar awm hun,hla tha awm hun,hriatzauna awm hun te hi chu kan hmaih ngai chuang lo reng reng.

Ka lo tleirawl chho ve a, tlema nikhua ka lo hriat ve hnu chuan Radio ngaihthlak kha ka ching chho ve ta deuh a.Chanchin thar , hriatzauna leh hla tha tak tak ngaihthlak manhlatzia ka lo hre ve deuh deuh a.A hnu deuhah phei chuan kei,ka nau leh ka u,kan pathum hian Radio hi kan inchuh tih tih thin a.A upa ber leh huaisen ber tih takah ka u Awma hian a chang zing deuh ber a,a awm hun hi chu ama ngaihthlak duhzawng ngaihthlak hun turah kan dah ta deuh a.Zan mut pah hian ring fahrang mai hian a ngaithla thin a,chu chu kan chhungkua-in kan ngaithla a,ngaiah kan nei a.Zan mut hun hi ka u hunbi deuha kan neih avangin a zan leng a hawn tlai deuh chang te hi chuan kan khua a lo har hman hle thin.

Tlema kan Radio a lo tawng deuh hnu chuan a bena ben deuh vak te a lo tul ta a.Ngaihthlak laklawh laia " Tut....Krikh..." a han ti te hi chu kan buai thin teh asin..!!! Kan han herh a, kan han beng a, a awmna kan han sawn vel thul."Hei hi All India Radio ....tut...krikh.....","This is voice of America...krikh...tut....","Myanmah Tan Kah Set-Let...tut..tut...","Kabah Tadin...krikh...krikh..." tih vel kha a buaithlak thin khawp mai.Bung thing deuh deuha thu han hriat te kha a hrilhhaithlak thei thin teh mai a nia...

Chutianga kan Radio a chianloh hnu pawh chuan kan la ngaithla lui zel tho a,kan in nghaktu leh kan thian tha a ni zel tho mai.Vanneihthlak tak maia Radio thar kan neih hnu pawhin ka nu chuan kan Radio hlui kha a la roh em em tho a,miten lei rawn dil thin mah se,a phal lo reng reng.Ka u-in "Kan hmang tawh chuang lova..." a tih pawhin ka nu chuan a phal chuang lo reng reng.Tunah tak pawh hian kha kan Radio kha thingrem khawi maw laiah chuan ka nu chuan a la dah tha khiau....

Finna lam leh hriatna lam tam tak min lo zirtirtu,kan chhungkaw zia tih ni mai tur Radio ngaihthlak hi vawiin thleng hian nuam ka la ti a,ka la ching chhunzawm zel zawng a lo nih hi!Hetianga Radio ka ngaihthlak chang  hian kar hlaa kan in,englai pawha Radio ri hriatreng tur awmna kha ka ngai em em thin.Radio ri hrim hrim hian kan chhungkua,kan in leh kan vangkhua,ka nunhlui , ka thenrualte min hriatchhuahtir a,min ngaihtir thin.O...Radio Reminds Me of My Home Far Away....Radio Hian Kar Hlaa Kan Run In Kha Min Hriatchhuahtir-in Min Van Ti-Ngai Tak Em!!