Ruihhlo Rs.16,58,680 Man Hu Hal Ral

Tukin zing(23/7/11) dar 7:00 khan Pu Lal Thanzara, Parliamentary Secretary chuan Central YMA hnuaia ruihhlo do pawl Central Anti Drugs Squad (CADS) ten tun hnaia an man khawm Ruihhlo Rs.16,58,680 man hu chu Central YMA Office Tuikhuahtlang-ah a halral a. A mah tawiawmtu a nupui Pi Zohmingthangi chuan CADS tanpui nan Rs.10,000/- a hlan bawk.

Pu Lal Thanzara chuan thusawiin, hmelma pa Setana hnathawhin Mizo thalai tam tak chu ruihhlo hmangin suat an ni a. Hetiang a nih lai hian Central YMA chuan ruihhlo do chu engemaw ti chhung chawlhsan mahse tunah tha tharin tan a la leh ta hi a lawmawm hle a. He hna hi Pathian rawngbawlna pawimawh tak a ni a. CADS ten Mizoram tana rawng an bawlna hi Pathian rawngbawlna niin Thlarau tak a ni, a ti a. He rawngbawlna ah hian ruihhlo zuarte thlarau thlenga hmangaih a, an tana councelling leh Camping buatsaih a ni te hi a ropuiin a tha thlawt a ni, a ti.

Pu Lal Thanzara chuan, CADS hmalakna chu beng maia a lo hriat tawh thin thu sawiin, hnathawk tute chu fakawm a tih thu a sawi a. Sorkar ang pawha tun aia nasa a tanpui an phu thu a sawi a. A zuartute man an nih chungchangah Jail-a an tang rei lo thin lutuk pawh \"Dan dinglaite siam that a nih theih nan theih tawpin ka bawhzui ang\" tiin a in tiam bawk.

Tukin zinga ruihhlo an halralte hi Parvon/Proxyvon - 38,436 capsules; Heroin (No.4) - 4 Hawng, 105 Cans, 62 Caps ; Nitrosun/Alprozelum - 2043 Tablets; Ganja - 2Kgs,1 pkt. ; Cough Syrup - 82 Bottles niin Halral hlut zawng hi Rs.16,58,680 man hu a ni.

CADS-in a dintirh 29th May - 2010 -23 July, 2011 chhunga ruihhlo an man leh an hnathawh tawh dan chu hetiang hi a ni. 1) Nitrosun - 58,534 tablets; 2) Parvon/Proxyvon - 303907 capsules; 3) Ganja - 108 Kgs. 600grams, 1 pkt, Bur 4; 4) No. 4/Heroin - Hawng 135 - Cane 208 - Chhinsen 152; 5) Home/Centre-a dah - 164; 6) Excise/Police-a dah - 236; 7) Councelling pek zat - 1004; 8) Ruihhlo man hlutna - Rs. 2,08,78,552/-; 9) Tanpuina dawn zat - Rs. 11,71,505/-

Ruihhlo halral a nih hma hian inkhawmna hun tawite buatsaih a ni a, Lalbiakzuala Central YMA Gen. Secretary chuan kaihruaiin, he hunah hian CADS Convener Vanlalruata, Central YMA Asst. Secretary chuan R. Lalngheta Central YMA TReasurer hnenah CADS Convener mawhphurna chu a hlan nghal a ni.

CADS Convener kalchhuakta Vanlalruata chuan thusawiin, kumin chhungin ruihhlo Rs.72,82,414 man zet man a ni tawh a. Hemi atana sum hmanral pawh Rs.2,93,409 a ni a, cheng khatin ruihhlo cheng sawmhnih pali man kan ti chhia ang a ni a. Tun tuma ruihhlo kan halral hi halralna inkhawm kan buatsaih tawh zawng zawngah a tlem ber a la ni a, kan halral hi a tlem tulh tulh a, hei vang hian kan hmalakna hian awmzia a nei a niin ka hria a, kan lawm hle a ni, a ti.

CADS Convener thar R.Lalngheta pawhin thusawiin, ruihhlo do hi thil nuam a ni miah lo a, mahse abik leh ti biktu kan awm a ngai si a, kan tih loh chuan ramin a tuar zel bawk si a. Chuvang chuan tawngtaina hian thil a ti thei tih kan hria a, kohhran mite tawngtaipuina kan ngen tak meuh a ni, a ti.

Thulakna: DIPR