Sakhaw Dang Betute Zalen Lohna Pakistan-ah Christian Minister Kah Hlum A Ni

Ni 2 March 2011, Nilaini zing lam khan Pakistan cabinet-a Christian minister awmchhun, Minorities Minister Shahbaz Bhatti-a chu Islamabad khawpuia kah hlum a ni.

Shahbaz Bhatti-a hi a hna pawimawh thawk tura a in a chhuahsan atanga thui vak lovah, silai keng mi3/4 velin a car chu hualin an kap hlum ta a ni. Kum 42-a upa Shahbaz Bhatti-a hi Pakistan sorkarna chelhtu Pakistan People’s Party (PPP) hruaitu pakhat a ni a, Pakistana Islam sakhaw humhalhna dan khauh leh rum tak ‘blasphemy law’ dodaltu pakhat a ni.

Islamist mi firfiak pawl chuan Shahbaz Bhatti-a hian ‘plasphemy law’ a sawisel avanga kap hlum an nih thu an puang a, ‘plasphemy law’ dodal mi tupawh thah an nih zel tur thu an puang bawk.

‘Plasphemy law’-ah chuan Pakistan ram hming chu ‘Islamic Republic of Pakistan’ tih a ni. He dan hian Islam sakhua leh a kaihhnawih thil hmusita dodal reng reng chu thi turin hremna a pe thin a ni.

 Tun tuma kah hlum tak Shahbaz Bhatti-a hian ‘plasphemy law’ a dodal avangin vauna nasa tak a tawk tawh thin a, amah ngeiin, “He ‘plasphemy law’ hian Pakistan-a hnam tlem zawk leh sakhaw tlem zawk betute a ngheisain, a tirethei lutuk. Hei hian mihring dikna chanvo a bawhchhia a ni. He dan siamtha a, tidanglam tur hian ka nunna hial chan pawhin hma ka la dawn...,” tiin a sawi tawh thin.

January 2011 khan Punjab bial governor Salman Taseer-a pawh ‘plasphemy law’ sawisel vangin amah vengtu-in a kap hlum tawh bawk a ni.

Pakistan-ah hian mihring maktaduai 185 (167 millions) vel chengin, 96% vel chu Muslim an ni a, 1.5% vel chauh Christian an ni.

Thulakna: CNN, BBC, Wikipedia