Thil Bungrua leh Hmanrua I Hmangaih Lutuk Chhan Kha Hmangaihtu I Neih Loh Vang A Ni Thei !?

Hmangaihna kawrawng chu thil hmanrua leh bungrua(materials)-in mihringin hnawh khah a tum thin, tih hi i awih em? Khawvel hi a changkangin, intihhlimna hmun, bungrua leh thil a tam tial tial a, thil bungrua leh hmanrua kan ngaihlu deuh deuh a, chutih rual chuan mihring erawh a khawhar deuh deuh thung niin i (in)hre ve ngai em?  

University of New Hampshire leh Yale University mi thiamten an zirchiannaah - hmangaihna, duhsakna, ngaihsakna dawng lo nia inhriate aiin dawng nia inhriaten thil bungrua leh hmanrua an ngaih ropui dan leh ngaih hlut dan a nep zawk tih hmuhchhuah a nih thu,  Journal of Experimental Social Psychology chuan a tarlang.

Zirchianna kaihruaitu Edward Lemay-a chuan, “Mihringin thil neih(possessions) bungrua leh hmanrua(materials) a ngaih hlut a, a hmangaih em em chhan chu – chu’ng thilte chuan vemhimna, humhimna, khawhar lo tura hnemna leh nawmna a pe nia a hriat vang a ni. Hmangaih, duhsak leh ngaihsak hlawh nia inhriatna-in he’ng vemhimna, humhimna, khawhar lo tura hnemna leh nawmna te hi mihring rilru-ah a awmtir/neihtir thei a. Chuvangin, Hmangaih, duhsak leh ngaihsak hlawh nia inhriate chuan hlawh ve lo nia inhriate aiin thil bungrua leh hmanrua an ngaisangin an hmangaih lo deuh a ni,” tiin an chhuichianna-a an thil hmuhchhuah chu a sawi.

Hmangaihna leh inngaihsakna tlakchham avangin mihringin amah tibuai thei lo thil bungrua leh hmanrua-ah a hmangaihna a hlanin a vur ta chiam a ni, ti ila a sual tampui awm love.