Thinvung Hrik 'B'

- Dr. Lalfakzuala

T hin tivung thei natna chi hrang hrang kara kan hriat lar ber pakhat thinvung hrik 'B' (HBV) chungchang tlemin i lo bih chiang teh ang. HBV hi tunlai khawvelah a hluar em em a, thin cancer thlentu ber a tih theih hial awm e. A chanchin ziah leh sawite tam hle tawh mah se, chiangkuang taka la hre rih lo te tan a pawimawh zual chauh tarlang ta ila.

Q. HBV hrik chu enge ni?

A. Virus natna hrik te tak te a ni a, taksa chhunga a luhin thinah hmun khuarin thin a tivung ta thin a ni.

Q. Engtia kaichhawn theih nge a nih?

A. A bik takin mihring thisen atanga kaichhawn a ni a. HBV hrik veite thisen thun atang te, inchiuna hriau inhman tawm te, hmuihmul mehna leh hanawhna inhman tawm vangte leh thisen inkaihnawih theihna dangte avanga kai an tam hle. Tin, mipat-hmeichhiatna atanga kai a awl hle a, HIV aiin a let sawmin kai a awl zawk a ni. Chubakah HBV hrik pai nu atang a naupaiah a kaichhawng thei bawk. Chil, mittui, zun leh hnute tui atang te hian a kai chhawn theih chu an ti nain kaichhawng tak tak erawh an vang hle thung.

Q. Engtin nge HBV hrik awm leh awm loh kan hriat theih ang?

A. Thisen en in a hriat theih. HBV hrik tuamtu a kawr HBsAg thisena hmuh a nih chuan taksa chhungah a lut tawh thin tih a hriat theih a. HBeAg hmun a nih chuan hrik chu an pung mek a, midang tan pawh kaichhawn a awlsam bik tihna a ni. HBV dotu sipai Anti HBsAb hmuh a nih chuan hrik chu taksa in a do let a, a hneh tawh emaw, venhimna vaccine chiu tawh te tan venhimna a hlawhtling tawh tihna emaw a ni. HBV hrik tak tak enna chu a man to bakah hmunpuiah chauh en theih a ni.

Q. HBsAg thisena hmuh a nihin enkawl nghal a tul em?

A. HBV hrik vei zawng zawng zaa sawmkua vel chu enkawl ngai miah lovin, taksa sipaite tanpuina in an dam leh thin. Zaa sawm te erawh chuan HBV benvawn an paidawn a, chungte chu lamivudine thla ruk chhung peka enkawl tur a ni. Thlaruk ei hnua a la dam loh chuan lamivudine vek thla ruk chhung ei leh emaw damdawi dang (Tenofovir) emaw ei tur a ni. HBsAg hrik i thisenah an hmuh chuan damdawi ei nghal lovin Tenofovir emaw ei tur a ni. Tichuan thla ruk hnuah thisen check leh la, a la awm fo erawh chuan enkawl a ngai thei a ni.

Q. (HBV) natna vei te tan ei leh in insum turte a awm em?

A. Thin lam natna vei reng reng te tan zu in miah loh tur a ni. HBV natna veiin zu a in bawk chuan kum 5 chhung lekah thinro leh thin cancer in a tlakbuak thuai ang. Tin, damdawi reng reng doctor hriatpui loha tawng pawng hmawm tur a ni lo. Meizial leh kuhva nghei theih ngei a tha bawk. Thirchakna tha tam lutuk ei tur a ni lo. Vitamin C (cevit) pawh ei tlem deuh tur a ni. Sarep, sa rawh te, thil hmuar leh a uma um chi; (eg; tam um, etc) te ei loh hram a tha.

Q. Engtin nge HBV lak a ta kan invenhim ang?

A. Mi tupawh HBV venhimna vaccine a kima inchiu vek tur a ni. Nausen leh naupang venhimna chiu tur an tihin chiutir ve ngei tur a ni. Raipuar tawh phawt chuan HBsAg check theuh ila, a lo awm a nih chuan doctor hnenah a nausen venhim dan tur thurawn lak theuh tur a ni. Chhungkuaah HBV natna vei an awm chuan venhimna inchiu theuh tur a ni.

Thulakna: Chhaktiang , January 2011 Issue