16th May : Mizorama tlawmngai pawl hrang hrangte chuan Inrinni khan Central YMA Hall-ah Tuikuk raltlante lâk lêt mek chungchang an sawiho a; Tripura state chhung, Sakhan tlangdung atanga Tuikuk hoin Mizo chhungkua 80 chuang an ûm darhte hnena sorkarin zangnadawmna a pek hma chuan Tuikuk lâk kîr mek tihtawp an phût.
Central YMA Committee Room-a Tuikuk chungchang sawihona hi CYMA President, Lalchungnunga'n a kaihruai a; YMA, MHIP, MUP, MZP leh MSU aiawhte an tel. Pawl hranga hrangte chuan, Sakhan tlangdunga Mizo chhungkaw 80 chuang, tun thlenga sorkarin zangnadawmna a la pe lo leh Tuikuk ringawt a ngaihsak chu pawi an tih thu an sawi a ni.
NGO-te chuan, Sakhan tlangdunga Mizo awmte hi mahni thua Mizoram chhuahsan, Tuikukte'n rîkrâpa an ûm darh niin an sawi a; heng Mizote hi sorkarin zangnadawmna a pek hma chuan Tuikuk lâk kîr mek hi tihtawp ni se, an ti. Tripura-a Tuikuk raltlan, kum 1995 Electoral Roll atanga 2011 Electoral Roll-a an pun dan hriat tum ni se, an ti bawk.
Tlawmngai pawlte chuan, May 18-a Mizoram rawn tlawh tur, Union Home Minister, P Chidambaram hnenah, Lovely Professional University, Jalandhar-a Sudanese zirlaite kut tuara thi, Johny F Lalhmangaihzuala chhungte zangnadawmna pek phûtna lo thlen ni se, an ti a; India ram chhung hmun hrang hranga Mizo zirlai leh hnathawka awmte an him zawk nan sorkar laipuiin tan la rawh se, tih thlen ni se, an ti bawk.
He sawihonaah hian, Tuikuk lâk kîr chungchanga tun hnaia Home Minister, R Lalzirliana hoa sorkar leh tlawmngai pawl inhmuh khawm chungchang pawh sawi chhuah a ni a; kha inhmuh khawm chungchanga sorkar thuchhuah chu dik hlel deuha an hriat thu sawiin, sorkar thuchhuaha 'Kal khawmte'n sorkar hmalakna chu tha an ti a,' tih chu thu belhchian dâwl lo deuh niin an sawi.
Union Home Minister lo kal tur hnena thu thlen dan tur leh lo hmuh dan tur ngaihtuah turin NGO hrang hrangte hian political party-te pawh telin, vawiin hian inhmuh khawm leh an rel a ni.
Thulakna: Vanglaini