U.S. Dollar chu Hmanlai Thil, China Yuan chu Tunlai Thil: President Hu Jintao (Dollar vs Yuan)

Chinese President Hu Jintao-a chuan, U.S. Dollar chu hmanlai thil a ni a, China Yuan chu tunlai thil a nih thu a sawi a, khawvel insumdawn tawnna tangka atan U.S. Dollar hmang tawh lo a, China Yuan hman a hun tawh thu a sawi. (The Wall Street Journal –ah en rawh )

China President Hu Jintao-a hi ni 19 January 2011, Nilaini-ah U.S. a tlawh ang a, President Obama-a nen, China leh US insumdawn tawnna,  khawvel insumdawn tawnna leh Asia leh khawvel hmung hrang hranga harsatna leh thil dang dang an sawi dun dawn a ni.

Kan tarlang tawh thin na a, China than chakzia kan hriat theih nan kan rawn tarlang nawn leh e:-

China Hian U.S. A Khum Tawh Mai Lo Maw?

Khawvel ram ropui 20 inteltual (G20 )economy chungchang CNN Money -a a lan danin U.S. chu khawvel economy nei lian leh zau ber a la ni. Chutih rualin kawng tam takah China hian U.S. hi a khum tawh a ni. Ni 11–12 November 2010, South Korea-a neih 2010 G20 Seol Summit-ah pawh tuna khawvel economy nei lian leh zau ber U.S. hnung zui duhtu leh nakina khawvel economy nei lian leh zau ber lo ni tura rin China hnung zui duhtu an awm ta,niin 2010 G20 Seol Summit thlirtu mi tam tak chuan an hmu.

China chuan Japan chu khumin khawvel economy lian leh zau ber pahnihna a hauh tawh a, tun hnu kum 10-15 vel chuan U.S pawh a khum leh mai dawn niin mithiamte chuan an chhut. Mi tam tak, China hian U.S. a khum tawh nia ngai an awm bawk.

Pew Research Center-in nikuma American-ho ngaihdan a lakna-ah, 44% chuan China chu khawvel economic power pakhatna neitu a nih tawh an ring a, 27% chauhin U.S. economy chu a la sang ber a ni tih an hria!

Credit Suisse - Asia head Fan Cheuk-a chuan, kum 2020 khian China-in U.S. khumin khawvel thil siam leh bungrua hmangraltu (consumer) lian ber a nih a rin thu a sawi.

China-in U.S. a khum tawhna tlem lo tarlang tai la:-

1.Forbes-in tun hnaia tunlai khawvel mi tluklehdingawn 6.8 (6.8 billion) zinga mi thil tithei ber 68 a thlanna-ah China President Hu Jintao-a chu pakhatna a ni a, US President Obama-a chu pahnihna a ni.

2.China chu khawvela sipai nei ngah ber a ni.

3.Kum 2009 khan U.S.-ah lirthei / tawlailir (vehicle) maktaduai 10.4 hralh a nih laiin, China-ah chuan maktaduai 13.6 hralh a ni.

4.China Internet Network Information Center-in a tarlan danin, kum 2010 hian China-ah internet hmangtu maktaduai 420 (million) vel an awm a, chu chu U.S.-a internet hmangtute aiin an tam zawk a ni.

5.Kum 2009 khan China chuan bungrua $ 1.2 trillion man khawvel ram dangah thawnchhuakin, $1.1  trillion man thawnchhuaktu Germany a khum a, khawvela bungraw thawnchhuak hnem ber nihna a hauh ta a ni.

6.July 2010-a International Energy Agency (IEA)-in a tarlan danin, kum 2009 khan China chu oil maktaduai 2252 metric tons hmangtu niin, maktaduai 2170 tons hmangtu U.S. chu a khum a, khawvela energy hmang hnem ber ram a ni ta a ni. Energy hman nasat vangin kum 2009 khan China chu carbon gas tichhuak hnem ber a lo ni tawh a ni. U.S. aiin 14% zeta tamin China hian carbon a tichhuak a, khawvel boruak tikhawlo nasa ber a nih thu  Netherlands Environmental Assessment Agency chuan a sawi.

7.Earth Policy Institute-in a tarlan danin, China chu khawvela solar cells siamchhuak hnem ber a ni.

8.Kirin Institute-in a zirchianna-ah China chu khawvela beer in tam ber a ni a, kum 2008 khan khawvel beer 25% chu Chinese-hovin an in. Kum 2002 thleng khan U.S. chu khawvela beer in tam ber a ni.

9.WHO | World Health Organization-in a tarlan danin, China chu khawvel vaihlo tichhuak tam ber leh hmang tam ber a ni. China-ah zial zu mi maktadua 320 vel an awm a, chumi awmzia  chu khawvel zial zu zawng zawng zingah 33.3 %vel chu Chinese an ni tihna a ni.