Valentine's Day

Valentine’s day tih chu mi thianghlim Valentine-a Ni tihna a ni a. Tun laiah he ni hi Hmangaihte Ni ( cspfolrsm;aeY/Lovers’ Day) atan uar taka hman a ni ta a. Khawvel pumpuiah he ni hi Hmangaihte Ni atana hman a lo nih chhan hi chhui tham a awm.

Hman lai Romho chuan Feb. ni 15-ah “mihringte chi leh kuang inthlahpung thei an nihna changchawiin “Lupercalis/Lupercalia Kut” an hmang thin a. Kristiannain Europe khawmual a rawn luah atang khan kristian nih hmaa kut ni vangthla engemaw zat chu Kristian kut atan vuahremin an seng lut a. Chung zingah he “inthlahpunna kut” pawh hi Pope Gelasius-a chuan kum 490 AD khan mi thianghlim Valentine-a chawimawi nan Feb. ni 14, mi thianghlim Valentine-a thih ni, hi Valentine’s Day atana hmang turin a puang ta a ni. Kum zabi pathumna bawr vel khan Valentine-a hming pu mi thianghlim pathum an awm a. Pakhat chu Rome khuaa puithiam a ni a, a dang chu Terni khuaa Bishop a ni a, a pathumna chanchin erawh chu Africa ramah a thi tih bak hriat belh a ni ta lo va. A danglamna chu heng mi thianghlim pathum hi Feb. 14-ah martarin an thi a ni. Pope Galasius-a’n a changchawi taka chu AD 270 Feb. 14-a martara thi ta Rome khuaa puithiam Valentine-a kha a ni. Chutih lai chuan Rome sorkar chuan chhiat lam a pan a, a chhehvel ramdepa mite an rawn ding chhuak a. A ramawp thenkhat an laksak ta a. Rome Lal ber chuan a sipaite chak loh chhan chu nupui an neih vang niin a chhut chhuak ta a. Tichuan a ram chhunga tlangvalte chu tumah nupui nei lo turin thupek khauh tak a chhuah ta tiap mai a ni. Chu thupek chuan hmangaihna zunhruia lo inthlung nghet tawh nula tlangvalte a timangang ta hle mai a. Ral do turin mipa puitling tawh zawng zawng a phut bur bawk si a. Tihngaihna a awm ta lo. Rome lal ber thupek khauh tak chu puithiam Valentine-a pawh chuan dik a ti lo hle a; lal ber thupek kalhin nula tlangval inhmangaih ngawih ngawihte chu a rukin kut a suihsak a, mal a sawm bawk a. Chu thu chu a hriatin lal ber chuan puithiam Valentine-a chu lung in thimah a khung ta rup mai a ni.

Lung in chhungah chuan Pathian thiltihtheihna mak tak mai hian Valentine-a chu a awmpui a. Tang vengtu Asterius-a fanu nula mitdel chu Valentine-a rinna hmangin tihdam a lo ni ta a. Tichuan thian tha tak an ni chho va. Rome lal ber chuan Valentine-a chu a rinna phalsan a, Rome pathiante be turin a sawm a, Valentine-a’n lal ber chu Pathian nung be turin a sawm let ve ta a, chu chuan lal ber ngeng a chhun pawp thawih a, Valentine-a thah thu a pe ta a ni. He thu avang hian a thiannu chu a lungngai em em mai a. An thah hmain Valentine-a’n ziakfung a dil a, a thiannu hnenah lehkhathawn hnuhnung ber a ziak a, a lehkhathawn chu, “I Valentine-a” (from your valentine) tiin a titawp ta a. He thuziak hlawm te hian khawvel a deng chhuak ta a ni. Chhuttu thenkhat chuan kha nula leh Valentine-a hi induh/ inngaizawngin an sawi ve tho va, mahse he thlir dan hi a lar lem lo. Chuvangin, Valentine-a Ni hi mipat hmeichhiatna hmatheh induhna (Eros love)-a innghat lovin  Kristian hmangaihna (Christian love)-ah a innghat zawk a ni. He ni hi hmangaihna hrualhrui chi khat khata inthlung hringfaten, an inhmangaihna chu kawng engemaw ti tala an tihlanna ni duhawm atan an hmang chho ta zel a.

Source:https://www.theholidayspot.com/valentine/history_of_valentine.htm

Thulak chhawnna: Zo Kawtchhuah